અભિજીત દિપકે, સૌરવ દાસ અને આશુતોષ રાંકા ક્યાં ? CJPએ દિલ્હી પોલીસ પાસેથી જવાબ માંગ્યો
છેલ્લું અપડેટ : 11 Oct 2026
'કોકરોચ જનતા પાર્ટી' (CJP) એ અભિજીત દીપકે, સૌરવ દાસ અને આશુતોષ રંકાની અટકાયત અંગે દિલ્હી પોલીસ સમક્ષ સવાલો ઉઠાવ્યા છે. પાર્ટીનો આરોપ છે કે મુંબઈથી દિલ્હી આગમન બાદ વિમાનની અંદર જ આ ત્રણેય નેતાઓની અટકાયત કરવામાં આવી હતી અને ૧૨ કલાક વીતી ગયા હોવા છતાં, તેઓ ક્યાં છે અથવા તેમની વર્તમાન સ્થિતિ શું છે તે અંગે કોઈ માહિતી આપવામાં આવી નથી. પાર્ટીએ માંગ કરી છે કે પોલીસ તાત્કાલિક તેમની સ્થિતિ સ્પષ્ટ કરે અને તેમને કાનૂની સલાહકારની મદદ લેવાની મંજૂરી આપે.
કોકરોચ જનતા પાર્ટી (CJP) ના સંગઠનાત્મક પ્રભારી અજિંક્ય શિંદેએ પોલીસ કમિશનરને પત્ર લખીને પાર્ટીના રાષ્ટ્રીય સંયોજક અભિજીત દીપકે તથા સહ-સંયોજકો સૌરવ દાસ અને આશુતોષ રંકાની સ્થિતિ વિશે વિગતો માંગી છે. પત્રમાં જણાવવામાં આવ્યું છે કે શનિવારે સવારે મુંબઈથી નવી દિલ્હી આવ્યા બાદ દિલ્હી પોલીસે વિમાનની અંદરથી જ આ ત્રણેયની અટકાયત કરી હતી.પાર્ટીનો દાવો છે કે અટકાયતના ૧૨ કલાક પછી પણ તેમના પરિવારોને કોઈ માહિતી આપવામાં આવી નથી. વધુમાં, એવો પણ આરોપ છે કે વકીલોથી પણ માહિતી છુપાવવામાં આવી છે. CJP એ સવાલ ઉઠાવ્યો છે કે ત્રણેય નેતાઓને ક્યાં રાખવામાં આવ્યા છે, તેમને સાથે રાખવામાં આવ્યા છે કે અલગ-અલગ, અને કઈ એજન્સીએ તેમની અટકાયત કરી છે તે અંગે કોઈ સ્પષ્ટ માહિતી કેમ આપવામાં આવતી નથી.
