VIDEO: વાંગચૂકનો ઉપવાસ છોડવાનો ઇનકાર, કોર્ટે માંગ્યો હેલ્થ રિપોર્ટ, સોનમ વાંગચૂકની અરજી પર દિલ્હી હાઈકોર્ટમાં આજે સુનાવણી
છેલ્લું અપડેટ : 21 Jul 2026
પ્રખ્યાત પર્યાવરણવિદ્ અને સામાજિક કાર્યકર્તા સોનમ વાંગચૂકની અટકાયત અને સ્વાસ્થ્ય સ્થિતિને લઈને તેમની પત્ની ગીતાંજલિ અંગ્મો દ્વારા દાખલ કરવામાં આવેલી અરજી પર આજે દિલ્હી હાઈકોર્ટમાં ફરી સુનાવણી હાથ ધરવામાં આવશે. અગાઉની સુનાવણી દરમિયાન હાઈકોર્ટે વાંગચૂકનો તાજેતરનો હેલ્થ રિપોર્ટ રજૂ કરવા માટે નિર્દેશ આપ્યા હતા.
પત્ની ગીતાંજલિ અંગ્મોના ગંભીર આક્ષેપો
ગીતાંજલિ અંગ્મોએ હાઈકોર્ટમાં અરજી કરીને આક્ષેપ કર્યો હતો કે, સોનમ વાંગચૂકને ગેરકાયદેસર રીતે નજરકેદ રાખવામાં આવ્યા છે. તેમણે માંગ કરી હતી કે વાંગચૂકને તેમની પસંદગીની ખાનગી હોસ્પિટલમાં શિફ્ટ કરવામાં આવે. જોકે, આ બાબતે કોર્ટે મહત્વપૂર્ણ નોંધ લેતા જણાવ્યું હતું કે: સોનમ વાંગચૂકની કટોકટીપૂર્ણ સ્વાસ્થ્ય સ્થિતિને ધ્યાનમાં રાખીને જ સરકાર દ્વારા તેમને હોસ્પિટલ ખસેડવાનો નિર્ણય લેવાયો હતો, જે પ્રાથમિક દ્રષ્ટિએ ગેરકાયદેસર કે મનસ્વી જણાતો નથી.
સફદરજંગ હોસ્પિટલમાં સારવાર, વાંગચૂકે કહ્યું- 'પોલીસે બર્બરતા કરી'
સોનમ વાંગચૂક હાલમાં દિલ્હીની સફદરજંગ હોસ્પિટલમાં સારવાર હેઠળ છે, પરંતુ તેમણે હોસ્પિટલમાં પણ પોતાના ઉપવાસ તોડવાનો સ્પષ્ટ ઇનકાર કરી દીધો છે.
હોસ્પિટલમાંથી પ્રતિક્રિયા આપતાં વાંગચૂકે જણાવ્યું હતું કે, યુવાનો સંપૂર્ણપણે શાંતિપૂર્ણ રીતે પ્રદર્શન કરી રહ્યા હતા, પરંતુ તે દરમિયાન પોલીસે તેમની પર અત્યંત બર્બરતાપૂર્ણ કાર્યવાહી કરી છે. હવે આજે દિલ્હી હાઈકોર્ટમાં રજૂ થનારા હેલ્થ રિપોર્ટ અને કોર્ટના વલણ પર સૌની નજર ટકેલી છે.
