અમેરિકી વાયુસેનાનું F-35A ભારતની ધરતી પર, યુએસએ ભારતીય વાયુસેનાને ગણાવી ખાસ ભાગીદાર
છેલ્લું અપડેટ : 29 Sept 2026
ભારતીય જમીન પર મોટા પાયે યોજાનારી એક એક્સરસાઇઝ (યુદ્ધાભ્યાસ)માં પ્રથમ વખત ભાગ લેવા માટે, 26 સપ્ટેમ્બરે U.S. એરફોર્સના છ F-35A ફાઇટર જેટ્સ અને 200 થી વધુ એરમેન (વાયુસૈનિકો) ભારત પહોંચ્યા. આ એક્સરસાઇઝ 26 સપ્ટેમ્બરથી 12 ઓક્ટોબર સુધી ચાલશે.
યુએસ એમ્બેસી ઇન્ડિયાએ સોશિયલ મીડિયા પર F-35A લાઇનિંગ IIsના સામેલ થવાની માહિતી આપી છે. તેમણે લખ્યું, યુએસ એરફોર્સના F-35A Lightning IIs ભારતમાં 'તરંગ શક્તિ' અભ્યાસમાં પ્રથમ વખત ભાગ લઈ રહ્યા છે. સ્ટેલ્થ (છુપાઈને હુમલો કરવાની ક્ષમતા), એડવાન્સ્ડ સેન્સર અને માહિતી શેર કરવાની ક્ષમતાઓ સાથે, F-35s ભારતીય વાયુસેના અને અન્ય સહયોગીઓ સાથે ટ્રેનિંગની નવી તકો લાવે છે, જેનાથી પરસ્પર તાલમેલ અને તૈયારી વધુ મજબૂત થાય છે.
જોધપુર એરફોર્સ સ્ટેશન પર આયોજિત કરાઈ એક્સરસાઇઝ
ભારતીય વાયુસેના (IAF) ની યજમાનીમાં બહુરાષ્ટ્રીય હવાઈ યુદ્ધાભ્યાસ 'તરંગ શક્તિ 2026' ની બીજી આવૃત્તિ 26 સપ્ટેમ્બરથી 12 ઓક્ટોબર સુધી રાજસ્થાનના જોધપુર એરફોર્સ સ્ટેશન પર આયોજિત કરવામાં આવી રહી છે. ભારતમાં યુએસ રાજદૂત સર્જિયો ગોરે એક્સરસાઇઝ શરૂ થવાની માહિતી આપી હતી. સર્જિયો ગોરે સોશિયલ મીડિયા પર એક પોસ્ટમાં લખ્યું હતું કે અમેરિકી વાયુ શક્તિ જોધપુર પહોંચી ચૂકી છે. છ F-35 લાઇનિંગ-II વિમાન અને 200 થી વધુ વાયુસૈનિકો પ્રથમ વખત તરંગ શક્તિ અભ્યાસમાં ભાગ લેવા માટે ભારતમાં છે. અમેરિકાના સર્વશ્રેષ્ઠ પાંચમી પેઢીના લડાકુ વિમાનોને તરંગ શક્તિ અભ્યાસમાં પ્રથમ વખત ઉડાન ભરતા જોવા રોમાંચક છે.
આ મહાઅભ્યાસમાં ભારત સહિત 8 દેશો (અમેરિકા, ફ્રાન્સ, જર્મની, ઓસ્ટ્રેલિયા, બાંગ્લાદેશ, શ્રીલંકા અને યુએઈ) પોતાના લડાકુ વિમાનો સાથે સીધી રીતે ભાગ લઈ રહ્યા છે, જ્યારે 32 અન્ય દેશો ઓબ્ઝર્વર (નિરીક્ષક) તરીકે સામેલ છે.
આ પહેલાં ભારતીય વાયુસેનાએ વર્ષ 2024 માં પોતાના સૌથી મોટા મલ્ટીનેશનલ વાયુ સૈન્ય અભ્યાસ ‘તરંગ શક્તિ’ ની શરૂઆત કરી હતી. તરંગ શક્તિની પ્રથમ આવૃત્તિ બે તબક્કામાં આયોજિત કરવામાં આવી હતી. પહેલો તબક્કો તમિલનાડુના સુલૂર એરબેઝ અને બીજો તબક્કો રાજસ્થાનના જોધપુર એરબેઝ પર આયોજિત થયો હતો.