MLC ચૂંટણીમાં ઉદ્ધવ ઠાકરે, શરદ પવાર અને કોંગ્રેસનો સફાયો; ભાજપ ગઠબંધનનો ભવ્ય વિજય
છેલ્લું અપડેટ : 22 Jun 2026
મહારાષ્ટ્ર વિધાન પરિષદ (MLC) ચૂંટણીમાં કોંગ્રેસ, ઉદ્ધવ ઠાકરે અને શરદ પવારની પાર્ટીનું ખાતું પણ ખૂલ્યું નથી, જ્યારે ભાજપના નેતૃત્વવાળી 'મહાયુતિ' ક્લીન સ્વીપ કરવામાં સફળ રહી છે. 17 એમએલસી બેઠકો પર યોજાયેલી ચૂંટણીમાં 16 બેઠકો ભાજપ, એકનાથ શિંદેની શિવસેના અને અજિત પવારની એનસીપી (મહાયુતિ ગઠબંધન) જીતવામાં સફળ રહી છે, જ્યારે એક બેઠક ભાજપના બળવાખોર ઉમેદવારે જીતી છે.
વિધાન પરિષદની કુલ 17 બેઠકોમાંથી 6 બેઠકો પર ઉમેદવારો પહેલાથી જ બિનહરીફ ચૂંટાઈ આવ્યા હતા, જ્યારે બાકીની 11 બેઠકોના પરિણામો સોમવારે જાહેર થયા છે.
મહારાષ્ટ્રમાં શિવસેના (UBT) ના ધારાસભ્યોના રાજકીય બળવા વચ્ચે આવેલી આ એમએલસી ચૂંટણીએ વિપક્ષને મોટો ઝટકો આપ્યો છે. એક તરફ ઉદ્ધવ ઠાકરેની પાર્ટી પહેલાથી જ તૂટી ચૂકી છે અને હવે એમએલસી ચૂંટણીમાં તેનું ખાતું પણ ખૂલી શક્યું નથી. જોકે, નાસિકમાં મોટો રાજકીય ઉલટફેર જોવા મળ્યો છે, જ્યાં એકનાથ શિંદેની પાર્ટીને ભાજપના જ બળવાખોર ઉમેદવાર સામે હારનો સામનો કરવો પડ્યો છે.
મહારાષ્ટ્ર MLC ચૂંટણીના પરિણામો
મહારાષ્ટ્ર વિધાન પરિષદ ચૂંટણીમાં સાંગલી-સાતારા, નાગપુર, ભંડારા-ગોંદિયા, અમરાવતી અને ધારાશિવમાં ભાજપ જીતવામાં સફળ રહી છે, જ્યારે શિવસેનાના મુસ્લિમ ઉમેદવાર સઈદ ખાને પરભણી-હિંગોલીમાં જીત મેળવી છે. નાસિક બેઠક પર શિંદે જૂથની શિવસેનાને મોટો ઝટકો લાગ્યો છે.
બીજી તરફ, જે 6 બેઠકો પર ઉમેદવારો બિનહરીફ ચૂંટાયા છે, તેમાં વિક્રમ કાકડે (પુણે), પ્રાજક્ત તનપુરે (અહલ્યાનગર), રવીન્દ્ર ફાટક (ઠાણે), અનિકેત તટકરે (કોંકણ), દુષ્યંત ચતુર્વેદી (યવતમાળ) અને અરુણ લખની (વર્ધા-ગઢચિરોલી-ચંદ્રપુર) સામેલ છે. બિનહરીફ ચૂંટણી જીતનારા આ તમામ ઉમેદવારો સત્તાધારી પક્ષના છે.
ભાજપના બળવાખોરે શિંદેની ગેમ બગાડી
નાસિકમાં શિવસેના (એકનાથ શિંદે જૂથ) ના ઉમેદવાર નરેન્દ્ર દરાડેને હારનો સામનો કરવો પડ્યો છે. તેમને ગોકુલ ગીતેએ હરાવ્યા છે. ખાસ વાત એ છે કે ગોકુલ ગીતે ભાજપના નેતા છે, પરંતુ પાર્ટીએ તેમને ટિકિટ ન આપતા તેમણે અપક્ષ તરીકે ચૂંટણી લડી હતી અને જીત મેળવી છે. ચૂંટણી પહેલા શિવસેના અને ભાજપે પોતાના નગરસેવકોને તૂટતા બચાવવા માટે ઠાણેની એક હોટેલમાં રાખ્યા હતા, કારણ કે હોર્સ-ટ્રેડિંગનો ડર હતો. જોકે, ભાજપ અને શિવસેનાની આ વ્યૂહરચના નાસિકમાં કામ ન આવી અને અપક્ષ ગોકુલ ગીતેએ મહાયુતિના ઉમેદવારને હરાવી દીધા.
નાંદેડથી લઈને નાગપુર સુધીના પરિણામો
નાંદેડ: આ બેઠક પર ભાજપના અમરનાથ રાજુરકર જીત્યા છે. તેમણે કોંગ્રેસના ઉમેદવાર રામદાસ પાટીલને હરાવ્યા છે.
પરભણી-હિંગોલી આ બેઠક પરથી શિવસેનાના સઈદ ખાન 242 મતો સાથે વિજેતા બન્યા છે. તેમણે ઉદ્ધવ ઠાકરે જૂથના ઉમેદવાર ડૉ. વિવેક નાવંદરને માત આપી છે.
અમરાવતી: ભાજપના પૂર્વ મંત્રી પ્રવીણ પોટેએ 390 મતો મેળવીને શાનદાર જીત નોંધાવી છે. કોંગ્રેસના ઉમેદવાર હર્ષજીત દેશમુખને એક પણ મત મળ્યો નથી, જ્યારે વંચિત બહુજન અગાડીના નિલેશ વિશ્વકર્માને 31 મત મળ્યા છે.
નાગપુર: નાગપુર એમએલસી બેઠકની પેટાચૂંટણીમાં ભાજપના ડૉ. રાજીવ પોતદાર 682 મતો સાથે જીત્યા છે.
ધારાશિવ-લાતુર-બીડ: ભાજપના બસવરાજ પાટીલે (845 મત) કોંગ્રેસના મહેશ દેશમુખ (124 મત) ને 721 મતોથી હરાવ્યા.
ભંડારા-ગોંદિયા ભાજપના અવિનાશ બ્રહ્મણકરે (304 મત) કોંગ્રેસ સમર્થિત અપક્ષ ઉમેદવાર નરેશ ઈશ્વરકરને 148 મતોથી હરાવીને જીત મેળવી.
સાંગલી-સાતારા: ભાજપના ધૈર્યશીલ કદમે (593 મત) મહા વિકાસ અગાડીના અભયસિંહ જગતાપ (292 મત) ને 301 મતોથી હરાવ્યા.
જલગાંવ: ભાજપના નંદકિશોર મહાજને (577 મત) મહા વિકાસ અગાડી (ઉદ્ધવ જૂથ) ના શરદ તાયડેને કરારી હાર આપી છે. તાયડેને માત્ર 5 મત મળ્યા હતા.
છત્રપતિ સંભાજીનગર-જાલના: ભાજપના સુહાસ શિરસાટે (455 મતો) મેળવીને જીત નોંધાવી છે. ઠાકરે જૂથના ગણેશ લોખંડેને 135 મત મળ્યા, જ્યારે MIM સમર્થિત અપક્ષ ઉમેદવાર ઇસાક ખાનને 35 મત મળ્યા.
સોલાપુર: ભાજપના રાજેન્દ્ર રાઉતે (483 મત) એનસીપીના વસંતરાવ દેશમુખ (118 મત) ને 365 મતોથી હરાવ્યા છે.