ઈરાન મુદ્દે ઉદ્ધવ સેનાના નેતા પ્રિયંકા ચતુર્વેદી સરકારની સાથે, વિદેશ મંત્રી જયશંકરના ‘દલાલ’ વાળા નિવેદનને ગણાવ્યું યોગ્ય

નવી દિલ્હી: મધ્ય પૂર્વના યુદ્ધ અને અમેરિકા-ઈરાન વચ્ચે ચાલી રહેલી સીઝફાયરની મંત્રણા વચ્ચે ભારતમાં રાજકારણ ગરમાયું છે. વિપક્ષના કેટલાક નેતાઓ પાકિસ્તાનની મધ્યસ્થીને લઈને ભારત સરકાર પર સવાલ ઉઠાવી રહ્યા છે, ત્યારે ઉદ્ધવ સેનાના રાજ્યસભા સાંસદ પ્રિયંકા ચતુર્વેદીએ (Priyanka Chaturvedi) ભારત સરકારના વલણની પ્રશંસા કરી છે.

‘આ આપણું યુદ્ધ નથી’: પ્રિયંકા ચતુર્વેદી

સોશિયલ મીડિયા પ્લેટફોર્મ 'X' પર પોસ્ટ કરતા પ્રિયંકા ચતુર્વેદીએ લખ્યું કે, ભારતને અમેરિકા અને ઈરાન વચ્ચેની મંત્રણાના ટેબલ પર હોવાની કોઈ જરૂર નથી. તેમણે ટીકાકારોને જવાબ આપતા કહ્યું કે, "આ આપણું યુદ્ધ નથી, તેથી ભારતનું તેનાથી અંતર જાળવવું તે પ્રશંસનીય છે."

પાકિસ્તાન પર આકરા પ્રહાર

પાકિસ્તાનની ભૂમિકા પર કટાક્ષ કરતા તેમણે વિદેશ મંત્રી એસ. જયશંકરના (S. Jayashankar) નિવેદનને સમર્થન આપ્યું હતું. તેમણે કહ્યું: "પાકિસ્તાન વર્ષોથી 'વચેટિયા ની ભૂમિકા ભજવી રહ્યું છે અને તેના માટે 'ફી' પણ વસૂલે છે. વિદેશ મંત્રીએ સર્વદળીય બેઠકમાં પાકિસ્તાનને જે 'દલાલ' દેશ કહ્યો હતો, તે એકદમ સાચું છે."

પ્રિયંકા ચતુર્વેદીએ વર્તમાન સ્થિતિનું સચોટ વિશ્લેષણ કરતા જણાવ્યું હતું કે:

• ઈરાન: પોતાનો પક્ષ રાખવામાં સફળ રહ્યું.

• અમેરિકા: પોતાનો ચહેરો બચાવવાનો પ્રયાસ કર્યો.

• ઈઝરાયેલ: પોતાની જમીની હકીકત સમજાઈ ગઈ.

• પાકિસ્તાન: મધ્યસ્થી બદલ માત્ર એક 'થેંક્યું નોટ' મળી.

• ભારત: પોતાની તેલની જરૂરિયાતો (Oil Supply) પૂરી કરવામાં સફળ રહ્યું.

ટ્રમ્પની ધમકી પર વળતો પ્રહાર

ડોનાલ્ડ ટ્રમ્પે (Donald Trump) ઈરાની સભ્યતા ખતમ કરવાની જે ધમકી આપી હતી, તેના પર પ્રિયંકાએ કહ્યું કે, "કોઈપણ સત્તા કે તેમાં બેઠેલા લોકો જ સભ્યતા (Civilization) નથી હોતા. દેશની સામુહિક શક્તિ અને સંઘર્ષની ક્ષમતા સભ્યતા બનાવે છે. કોઈ સુપરપાવર નક્કી નથી કરી શકતું કે સભ્યતા બચશે કે નહીં."

પ્રિયંકા ચતુર્વેદીનું આ સ્ટેન્ડ દર્શાવે છે કે વિદેશ નીતિ અને રાષ્ટ્રીય હિતના મુદ્દે ભારતમાં પક્ષબંધીથી ઉપર ઉઠીને એકતા જોવા મળી રહી છે. વિદેશ મંત્રી જયશંકરની 'સ્પષ્ટવક્તા' છબીને હવે વિપક્ષના નેતાઓનો પણ સાથ મળી રહ્યો છે.