પાકિસ્તાનમાં ટ્રેનિંગ, બબ્બર ખાલસા સાથે કનેક્શન... જાણો કોણ છે સુખબીર બાદલ પર ફાયરિંગ કરનાર

શિરોમણી અકાલી દળના નેતા અને પંજાબના પૂર્વ સીએમ સુખબીર સિંહ બાદલ પર જીવલેણ હુમલો થયો છે. આ ઘટના અમૃતસરના સુવર્ણ મંદિરના પ્રવેશ દ્વાર પર બની હતી. હુમલાખોરનું નામ નારાયણ સિંહ ચૌરા છે અને તે બબ્બર ખાલસા ઈન્ટરનેશનલ (BKI)નો આતંકી રહી ચૂક્યો છે. સ્થળ પર હાજર લોકોએ હુમલાખોરને પકડીને પોલીસને હવાલે કર્યો હતો.

બાદલ આ હુમલામાં બચી ગયા છે. આ ઘટના સુવર્ણ મંદિરના પ્રવેશદ્વાર પર બની હતી. શિરોમણી અકાલી દળના નેતા અને પંજાબના પૂર્વ નાયબ મુખ્યમંત્રી સુખબીર સિંહ બાદલ ધાર્મિક સજા તરીકે સુરક્ષા કરી રહ્યા હતા ત્યારે જ તેમની પર જીવલેણ હુમલો કરવામાં આવ્યો હતો. સુખબીરને પગમાં ફ્રેક્ચર છે, તેથી તેઓ  વ્હીલચેર પર બેઠા હતા. અને હાથમાં ભાલો લઈને નજર રાખી રહ્યા હતા. 

આ દરમિયાન હુમલાખોર હાથમાં પિસ્તોલ લહેરાવતો આવ્યો અને સુખબીરને નિશાન બનાવવા લાગ્યો. જોકે, ત્યાં હાજર લોકો સતર્ક થઈ ગયા અને હુમલાખોરનો સીધો સામનો કર્યો. દરમિયાન હુમલાખોરે ટ્રિગર દબાવ્યું અને ગોળી હવામાં ઉડી ગઈ.

ટોળાએ હુમલાખોરને પકડીને પોલીસને હવાલે કર્યો છે. તેની પૂછપરછ કરવામાં આવી રહી છે. હુમલાખોરે પોતાનું નામ નારાયણ સિંહ ચૌરા હોવાનું જણાવ્યું છે. મળતી માહિતી મુજબ આરોપી બબ્બર ખાલસા સાથે સંકળાયેલો છે અને પાકિસ્તાન પણ ગયો હતો.

આ પણ વાંચો : સુખબીરસિંહ બાદલ પર હુમલો, અમૃતસરમાં ગોલ્ડન ટેમ્પલમાં ફાયરિંગ

કોણ છે નારાયણ સિંહ?

સૂત્રોના જણાવ્યા અનુસાર હુમલાખોર નારાયણ સિંહ ચૌરા બબ્બર ખાલસા ઈન્ટરનેશનલ (BKI)નો આતંકી રહી ચુક્યો છે. નારાયણ ચૌરા 1984માં પાકિસ્તાન ગયા હતા અને આતંકવાદના પ્રારંભિક તબક્કા દરમિયાન પંજાબમાં હથિયારો અને વિસ્ફોટકોના મોટા કન્સાઇનમેન્ટની દાણચોરીમાં મહત્ત્વની ભૂમિકા ભજવી હતી. પાકિસ્તાનમાં રહેતા તેણે ગેરિલા યુદ્ધ અને રાજદ્રોહ સાહિત્ય પર એક પુસ્તક પણ લખ્યું હોવાના અહેવાલ છે. તે બુદૈલ જેલબ્રેક કેસમાં પણ આરોપી છે. નારાયણ અગાઉ પંજાબની જેલમાં સજા ભોગવી ચૂક્યો છે.

શિરોમણી અકાલી દળનું કહેવું છે કે નારાયણ સિંહ ચૌરાના ભાઈ નરેન્દ્ર સિંહ ડેરા બાબા નાનકમાં ચૌરા બજાર સમિતિના પ્રમુખ છે અને તેઓ કોંગ્રેસના સાંસદ સુખજિંદર રંધાવાના નજીકના છે.