Video: "કેરળની 6000 નર્સોનું યોગદાન ક્યારેય ભુલાવી શકાય નહીં": ભારત-જર્મની સંબંધો પર કેન્દ્રીય મંત્રી પિયુષ ગોયલનું બર્લિનમાં મોટું નિવેદન

ભારત અને જર્મની વચ્ચેના મજબૂત સંબંધો અને ઐતિહાસિક મિત્રતાને બિરદાવતાં કેન્દ્રીય વાણિજ્ય અને ઉદ્યોગ મંત્રી પિયુષ ગોયલે ૧૯૬૦ના દાયકામાં જર્મની ગયેલી કેરળની હજારો નર્સોના અસાધારણ યોગદાનને યાદ કર્યું હતું. તેમણે જણાવ્યું કે બંને દેશો વચ્ચેના વિશ્વાસનો પાયો આ ભારતીય સ્વાસ્થ્ય કર્મચારીઓએ મજબૂત કર્યો હતો.

૧૯૬૦ના દાયકાની કટોકટી અને ભારતીય નર્સોની મદદ

બર્લિનમાં એક કાર્યક્રમ દરમિયાન પિયુષ ગોયલે ઐતિહાસિક સંદર્ભ આપતાં જણાવ્યું કે, 1960ના દાયકામાં પશ્ચિમ જર્મની તેની હોસ્પિટલો માટે નર્સોની ભારે અછતનો સામનો કરી રહ્યું હતું. તે સમયે જર્મનીએ કેરળમાંથી ૬,૦૦૦ નર્સોને આમંત્રિત કરી હતી. તેમણે અહીંની હોસ્પિટલો અને કેર હોમ્સમાં અસાધારણ દર્દી સંભાળ પૂરી પાડી, પરિવારોને મદદ કરી અને એક નવા દેશમાં પોતાની ઉત્તમ ઓળખ બનાવી.

ગોયલે ભારપૂર્વક કહ્યું કે, આ 6000 નર્સોના યોગદાનને ક્યારેય ભૂલી શકાય નહીં કે નજરઅંદાજ કરી શકાય નહીં. તેમણે ભારત અને જર્મની વચ્ચે પરસ્પર વિશ્વાસનું એવું વાતાવરણ ઊભું કર્યું, જે સમય જતાં એક અત્યંત વ્યૂહાત્મક ભાગીદારીમાં પરિવર્તિત થયું.

રાજદ્વારી સંબંધોનો સુવર્ણ કાળ

તેમણે ઉમેર્યું કે ગયા વર્ષે બંને દેશોએ આ વ્યૂહાત્મક ભાગીદારીના 25 વર્ષ પૂર્ણ થવાની ઉજવણી કરી હતી અને હવે ભારત-જર્મનીના રાજદ્વારી સંબંધોના 75 વર્ષની ઐતિહાસિક ક્ષણની ઉજવણી કરવામાં આવી રહી છે.