VIDEO: આસામ સ્ટેટ ઝૂ આધુનિકીકરણ પ્રોજેક્ટની મુખ્યમંત્રીએ સમીક્ષા કરી
છેલ્લું અપડેટ : 11 Jul 2026
આસામના મુખ્યમંત્રી હિમંતા બિસ્વા શર્માએ ગુવાહાટીમાં ચાલી રહેલા રૂ. ૩૬૦ કરોડના મહત્વાકાંક્ષી આસામ સ્ટેટ ઝૂ અને બોટનિકલ ગાર્ડન આધુનિકીકરણ પ્રોજેક્ટની પ્રગતિની જાતે સમીક્ષા કરી હતી. મુખ્યમંત્રીએ પ્રોજેક્ટ સ્થળની મુલાકાત લઈને અત્યાર સુધી થયેલી કામગીરીનું ઝીણવટભર્યું નિરીક્ષણ કર્યું હતું અને અધિકારીઓને જરૂરી સૂચનો આપ્યા હતા. આ પ્રોજેક્ટનો મુખ્ય ઉદ્દેશ્ય પ્રાણીઓના કલ્યાણમાં સુધારો કરવાની સાથે મુલાકાતીઓ માટે વિશ્વસ્તરીય સુવિધાઓ ઊભી કરવાનો છે. આ આધુનિકીકરણ હેઠળ અદ્યતન વેટરનરી હોસ્પિટલ, વન્યજીવ બચાવ કેન્દ્ર, આધુનિક પાંજરા અને સંભવતઃ વિશ્વના સૌથી મોટા પક્ષી સંગ્રહાલય (એવિયરી)નું નિર્માણ કરવામાં આવી રહ્યું છે. મુખ્યમંત્રીએ જણાવ્યું હતું કે આશરે ૨૭ ટકા કામગીરી પૂર્ણ થઈ ચૂકી છે અને આગામી બે થી ત્રણ વર્ષમાં આ ઝૂ દેશના અગ્રણી વન્યજીવ સંરક્ષણ અને પ્રવાસન કેન્દ્ર તરીકે ઉભરી આવશે.
