VIDEO: દક્ષિણ કાશ્મીરના અનંતનાગમાં આતંકી હુમલો, ગંભીર રીતે ઘવાયેલા હેડ કોન્સ્ટેબલ શહીદ
છેલ્લું અપડેટ : 22 Jul 2026
દક્ષિણ કાશ્મીરમાં અનંતનાગના લાલ ચોક વિસ્તારમાં કોકેરનાગ રોડ પર પેટ્રોલિંગ કરી રહેલી પોલીસ ટુકડી પર આતંકવાદીઓએ અચાનક હુમલો કર્યો હતો. આ ગોળીબારમાં ગંભીર રીતે ઘવાયેલા પોલીસ જવાન હેડ કોન્સ્ટેબલ આશિક હુસૈન કુરેશીનું હોસ્પિટલમાં સારવાર દરમિયાન મોત નીપજ્યું હતું અને તેઓ શહીદ થયા હતા.
કારમાં આવેલા આતંકીઓએ કર્યો અંધાધૂંધ ગોળીબાર
ગુપ્તચર સૂત્રોના જણાવ્યા અનુસાર, હેડ કોન્સ્ટેબલ આશિક હુસૈન કુરેશી લાલ ચોક નજીક કોકેરનાગ તરફ જતા માર્ગ પર પોતાની ફરજ પર તૈનાત હતા. એ જ સમયે અચાનક એક વાહનમાં આવેલા આતંકવાદીઓએ તેમને નિશાન બનાવીને અંધાધૂંધ ગોળીબાર શરૂ કરી દીધો હતો. ગોળી વાગવાને કારણે આશિક હુસૈન ઘટનાસ્થળે જ ગંભીર રીતે ઘાયલ થઈને ઢળી પડ્યા હતા. આ ઘટનાને અંજામ આપ્યા બાદ હુમલાખોરો સ્થળ પરથી ફરાર થઈ ગયા હતા. હુમલાની તુરંત જ બાદ સાથી જવાનો અને સ્થાનિક લોકોની મદદથી તેમને સારવાર માટે નજીકની જીએમસી (GMC) અનંતનાગ હોસ્પિટલમાં ખસેડવામાં આવ્યા હતા.
ગંભીર ઇજાઓને કારણે જાન ન બચાવી શકાઈ
હોસ્પિટલના ડોક્ટરોએ હેડ કોન્સ્ટેબલને બચાવવાનો ભારે પ્રયાસ કર્યો હતો, પરંતુ ઇજાઓ અત્યંત ગંભીર હોવાને કારણે તેમને બચાવી શકાયા નહોતા અને ડોક્ટરોએ તેમને મૃત જાહેર કર્યા હતા. ૩૫ વર્ષીય શહીદ હેડ કોન્સ્ટેબલ આશિક હુસૈન કુરેશી (બેલ્ટ નંબર 20, IR 3rd બટાલિયન) બડગામના બીરૂ વિસ્તારના રહેવાસી હતા. પોલીસ પ્રશાસન દ્વારા નિયમોનુસાર આગળની કાયદાકીય અને મેડિકલ પ્રક્રિયા હાથ ધરવામાં આવી રહી છે.
સુરક્ષા દળોએ સમગ્ર વિસ્તારને ઘેર્યો, સર્ચ ઓપરેશન ચાલુ
હુમલાની માહિતી મળતા જ પોલીસ અને સેનાની વધારાની ટુકડીઓ ઘટનાસ્થળે પહોંચી ગઈ હતી. સુરક્ષા દળોએ સમગ્ર લાલ ચોક અને આસપાસના વિસ્તારોની ઘેરાબંધી કરી લીધી છે. હુમલાખોર આતંકવાદીઓને ઝડપી પાડવા માટે વિસ્તારમાં વ્યાપક સર્ચ ઓપરેશન હાથ ધરવામાં આવ્યું છે. અધિકારીઓનું કહેવું છે કે આતંકીઓની શોધખોળ ચાલુ છે અને ટૂંક સમયમાં જ આ હુમલામાં સામેલ દોષિતોને પકડી પાડવામાં આવશે. આ ઘટના બાદ સમગ્ર વિસ્તારમાં સુરક્ષા વ્યવસ્થા અત્યંત કડક કરી દેવામાં આવી છે.
