VIDEO: પોલીસ કસ્ટડી માત્ર દેખાડો કે અસલી એક્શન? સ્વતંત્ર ભારદ્વાજના રિમાન્ડ પર AAPનો ભાજપ સામે સનસનાટીભર્યો આરોપ!
છેલ્લું અપડેટ : 05 Sept 2026
નવી દિલ્હી ખાતે આમ આદમી પાર્ટી (AAP)ના રાષ્ટ્રીય મીડિયા ઇન્ચાર્જ અનુરાગ ઢાંડાએ સ્વતંત્ર ભારદ્વાજના પોલીસ રિમાન્ડ મામલે ભાજપ અને કેન્દ્ર સરકાર પર આકરા પ્રહારો કર્યા છે. તેમણે દાવો કર્યો હતો કે આ ઘટના એ તમામ તત્વો માટે સ્પષ્ટ સંદેશ છે જેઓ રાજકીય ઇશારે સમાજમાં નફરત ફેલાવવાનું અને લોકો પર હુમલા કરવાનું કામ કરે છે.
"પોલીસ કસ્ટડી માત્ર ઔપચારિકતા છે કે નક્કર પગલાં?"
પત્રકારો સાથે વાતચીત કરતાં અનુરાગ ઢાંડાએ જણાવ્યું હતું કે, "આ એવા તમામ નફરત ફેલાવનારાઓ માટે સ્પષ્ટ સંદેશ છે કે ભાજપ તેમનો ઉપયોગ સમાજમાં વૈમનસ્ય ફેલાવવા અને લોકો પર હુમલા કરાવવા માટે કરે છે. હવે સવાલ એ છે કે તેને પોલીસ કસ્ટડીમાં માત્ર ઔપચારિકતા ખાતર રાખવામાં આવ્યો છે કે પછી ખરેખર કડક કાર્યવાહી કરવામાં આવશે? આનાથી જ ભાજપ સરકારની સાચી દાનત છતી થશે." આ લોકો ભાજપના ઇશારે કેવા પ્રકારની નફરત ફેલાવી રહ્યા છે તેમાં હવે એક ટકાની પણ શંકા રહી નથી, કારણ કે આ વ્યક્તિએ પોતે જે કૃત્યો કર્યા છે તેની કબૂલાત કરી છે.
લોકશાહીમાં દાદાગીરી લાંબો સમય નહીં ટકે
ભાજપ શાસન પર પ્રહાર કરતાં 'આપ' નેતાએ કહ્યું કે, "કોઈપણ લોકશાહીમાં ગુંડાગર્દી, દાદાગીરી અને સરમુખત્યારશાહી લાંબો સમય ટકી શકતી નથી. ભાજપના ઈશારે નફરત ફેલાવતા તમામ લોકોને મારો સ્પષ્ટ સંદેશ છે: જો આજે સ્વતંત્ર ભારદ્વાજ સાથે આવું થઈ રહ્યું છે, તો કાલે તમારી સાથે પણ આ જ થશે."
કાયદા અને બંધારણથી કોઈ બચી નહીં શકે
અનુરાગ ઢાંડાએ ચેતવણીના સૂરમાં જણાવ્યું કે, "આજે તમે ભલે પોલીસ કે તંત્રની મદદથી બચી જાવ, પરંતુ કાયદો અને દેશનું બંધારણ કોઈને છોડશે નહીં. સરકારો કાયમ રહેતી નથી, સરકારો બદલાય છે અને જ્યારે સત્તા પલટાશે ત્યારે તમારે તમારી આખી જિંદગી જેલના સળિયા પાછળ કાપવી પડી શકે છે."