VIDEO: 'સુધરી જાઓ નહિતર આંદોલન કરીશ', સ્વાતંત્ર્ય પર્વ પર રામદેવે 'કોકરોચ પાર્ટી' સાથે મિલાવ્યો સૂર
છેલ્લું અપડેટ : 15 Aug 2026
સ્વાતંત્ર્ય દિવસ (Independence Day) ના અવસર પર આયોજિત એક કાર્યક્રમમાં પત્રકારો સાથે વાતચીત કરતી વખતે યોગગુરુ રામદેવે (Yoga Guru Ramdev) દેશની શિક્ષણ વ્યવસ્થા અને ભરતી પ્રક્રિયા (Recruitment Process) માં વ્યાપ્ત ભ્રષ્ટાચાર અંગે ગંભીર સવાલો ઉઠાવ્યા છે. હાલમાં જ ચર્ચામાં આવેલી 'કોકરોચ જનતા પાર્ટી' (Cockroach Janata Party - CJP) ના સૂરમાં સૂર મિલાવતા તેમણે ચેતવણી આપી છે કે જો સ્થિતિમાં સુધારો નહીં થાય તો તેમણે પણ ફરી એકવાર ધરણાં પર બેસવું પડશે.
જોકે, રામદેવે સ્પષ્ટ કર્યું હતું કે તેઓ આંદોલનના નામે દેશમાં કોઈ પણ પ્રકારની અરાજકતા (Anarchy) ના સમર્થક નથી.
'દેશમાં ચારેય તરફ હંગામો છે'
રામદેવે શિક્ષણ ક્ષેત્રની નબળી સ્થિતિ પર પ્રહારો કરતા કહ્યું કે, દેશમાં ચારેય તરફ હંગામો મચેલો છે. નાના-નાના શાળાના બાળકો રસ્તા પર આવીને કહી રહ્યા છે કે તેમની શાળાઓમાં શિક્ષકો, વીજળી, પાણી અને શૌચાલય જેવી પાયાની સુવિધાઓ (Basic Amenities) પણ નથી.
તેમણે ઉમેર્યું કે, જ્યાં પુસ્તકો છે ત્યાં શિક્ષકો નથી અને જ્યાં શિક્ષકો છે ત્યાં પુસ્તકો નથી. પુસ્તકો હોય તો પેપર લીક (Paper Leak) થઈ જાય છે. ૧૦મી અને ૧૨મી બોર્ડની પરીક્ષાઓનો ક્યાંય ઉપયોગ થતો નથી અને સ્પર્ધાત્મક પરીક્ષાઓ (Competitive Exams) ના આધારે જ એડમિશન મળે છે.
સરકારી ભરતીઓમાં ભ્રષ્ટાચારનો આક્ષેપ
સરકારી નોકરીઓની ભરતી પ્રક્રિયા પર સવાલ ઉઠાવતા રામદેવે કહ્યું કે, ઇન્ટરવ્યુ (Interview) દરમિયાન ૯૦ થી ૯૯ ટકા કૌભાંડો થાય છે. પોતાની વિચારસરણી, સંગઠન, જ્ઞાતિ અને વર્ગના લોકોને પસંદ કરી લેવામાં આવે છે અને બાકીના યોગ્ય ઉમેદવારોને બહાર ફેંકી દેવાય છે. એક તરફ આપણે 'સત્યમેવ જયતે' કહીએ છીએ અને બીજી તરફ ભરતી પહેલા જ કરોડો રૂપિયાના વ્યવહારો નક્કી થઈ જાય છે.
ફરી આંદોલન કરવાની આપી ધમકી
ચિંતા વ્યક્ત કરતા તેમણે કહ્યું કે, જો આ જ રીતે આંદોલન (Protest) કરવા પડશે તો દેશ કેવી રીતે ચાલશે? તેથી જ જવાબદારો સુધરી જાય નહિતર દેશમાં વધુ આંદોલનો થશે. ક્યાંક એવું ન થાય કે બાબા રામદેવે ફરીથી આંદોલનના મેદાનમાં ઊતરવું પડે.
CJP નો નવો મોરચો અને અમિત શાહ પર નિશાન
નોંધનીય છે કે નીટ (NEET) પેપર લીક મામલે કોકરોચ જનતા પાર્ટીએ જંતર-મંતર પર ૩૬ દિવસ સુધી આંદોલન કર્યું હતું, ત્યારબાદ શિક્ષણ મંત્રી ધર્મેન્દ્ર પ્રધાને રાજીનામું આપવું પડ્યું હતું. હવે CJP ના સ્થાપક અભિજિત દીપકે શાળાઓમાં પાયાની સુવિધાઓ માટે નવું અભિયાન શરૂ કરી રહ્યા છે.
દીપકે ૨૦ જુલાઈના રોજ વિરોધ પ્રદર્શન દરમિયાન થયેલા લાઠીચાર્જ (Lathicharge) અને ટીયર ગેસ (Tear Gas) નો ઉલ્લેખ કરીને કેન્દ્રીય ગૃહમંત્રી અમિત શાહ (Amit Shah) પર નિશાન સાધ્યું હતું અને સંસદમાં માફી માંગવાની માંગ કરી હતી.
