લોકસભામાં મહિલા અનામત બિલ પસાર ન થતા પક્ષ-વિપક્ષના નેતાઓની આવી પ્રતિક્રિયા, જાણો રાહુલ-પ્રિયંકાએ શું કહ્યું?

લોકસભાના વિશેષ સત્રમાં આખરે મહિલા અનામત બિલ પસાર થઈ ના શક્યું. મહિલા અનામત અને સીમાંકન માટે આજે (17 એપ્રિલ) લોકસભામાં બંધારણીય સુધારા (Constitution Amendment Bill) વિધેયક પર મતદાન કરાયું હતું, પરંતુ બે તૃતિયાંશ બહુમતી ના મળતા આ બિલ પસાર થઈ શક્યું નથી. હવે બિલ મુદ્દે અનેક નેતાઓની પ્રતિક્રિયા સામે આવી છે.

સરકારે મહિલાઓના નામે યુક્તિનો ઉપયોગ કર્યો : રાહુલ ગાંધી

લોકસભામાં વિપક્ષ નેતા રાહુલ ગાંધીએ સોશિયલ મીડિયા એક્સ પર ટ્વિટ કરીને લખ્યું છે કે, ‘સુધારા બિલ પડી ગયું છે. તેમણે (કેન્દ્ર સરકાર) બંધારણને તોડવા માટે મહિલાઓના નામે ગેરબંધારણીય યુક્તિનો ઉપયોગ કર્યો હતો. ભારતે તે જોયું છે. INDIA ગઠબંધને તેને અટકાવ્યું છે. બંધારણનો વિજય થયો.’

આ આપણા દેશમાં લોકશાહી માટે એક મોટી જીત છે: પ્રિયંકા ગાંધી

કોંગ્રેસના સાંસદ પ્રિયંકા ગાંધી વાડ્રાએ કહ્યું, 'આ મહિલા અનામત અંગે નહીં પરંતુ લોકશાહી વિશે હતું. અમે ક્યારેય સીમાંકનને મહિલા અનામત સાથે જોડવા માટે સંમત થઈ શકીએ નહીં. આ બિલ પસાર થાય તે શક્ય નહોતું. આ આપણા દેશમાં લોકશાહી માટે એક મોટી જીત છે. જે લોકોએ હાથરસ, ઉન્નાવ અને મણિપુરમાં કોઈ કાર્યવાહી કરી ન હતી તેઓ આ વિશે વાત કરી રહ્યા છે. 

દેશની મહિલાઓ માફ નહીં કરે : પૂનમ માડમ

ભાજપના સાંસદ પૂનમબેન માડમે જણાવ્યું કે, ‘વર્ષ 2023માં એ નક્કી કરવામાં આવ્યું હતું કે 2029ની સામાન્ય ચૂંટણીઓ સુધીમાં સમગ્ર દેશમાં મહિલા અનામત બિલ લાગુ કરવામાં આવશે. જ્યારે સરકાર આ બિલ લઈને આવી, ત્યારે રાહુલ ગાંધીના નેતૃત્વ હેઠળના ઈન્ડિ (INDI) ગઠબંધને આનો સંપૂર્ણ વિરોધ કર્યો અને બિલને પસાર થતું અટકાવ્યું. દેશની મહિલાઓ રાહુલ ગાંધી અને ઈન્ડિ ગઠબંધનને ક્યારેય માફ નહીં કરે. તેઓએ દેશની મહિલાઓ સાથે મોટો અન્યાય અને વિશ્વાસઘાત કર્યો છે.’

મહિલા અનામત બિલને વિપક્ષે સાથ ના આપ્યો: કિરેન રિજિજૂ

સંસદીય કાર્ય મંત્રી કિરેન રિજિજૂએ કહ્યું કે, આ મહિલાઓના સન્માન અને અધિકાર આપવાથી જોડાયેલું ઐતિહાસિક અને મહત્ત્વપૂર્ણ બિલ હતું. પણ વિપક્ષે તેમાં સાથ ના આપ્યો. ખુબ દુઃખની વાત છે. તમે એક ઐતિહાસિક મોકો ગુમાવી દીધો. મહિલાઓને સન્માન અને અધિકારી આપવાનું અમારું અભિયાન શરૂ રહેશે અને અમે તેમને અધિકાર અપાવીની રહીશું.

સપા કે વિપક્ષે મહિલા અનામતનો વિરોધ નથી કર્યો: અખિલેશ યાદવ

સપા અધ્યક્ષ અખિલેશ યાદવે કહ્યું કે, 'જે અમારો પક્ષ છે, તેને અમે બિલકુલ સ્પષ્ટ કરી દીધો છે. લાગે છે કે ગાડીઓ અટકી રહી છે, લાગે છે કે પ્રયાસમાં કોઈ કમી રહી ગઈ હોય. અમે મહિલા અનામતના પક્ષમાં છીએ. મહિલાઓને અનામત મળે, તેમને સુરક્ષા મળે, તેમનું સન્માન વધે, તેમને સ્થાન મળે અને લોકશાહીમાં તેમને જે સ્થાન મળવું જોઈતું હતું અમે તેના પક્ષમાં છીએ. સમાજવાદી પાર્ટી અથવા વિપક્ષમાં કોઈએ પણ મહિલા અનામતનો વિરોધ નથી કર્યો. પરંતુ તેમની સાથે જે મહિલાઓના હક-અધિકારને જ છીનવવા ઈચ્છતા હતા, તો લક્ષ્મણ રેખા વિપક્ષે એવી ખેંચી કે તેઓ તેના પાર ના કરી શક્યા.'

મહિલાઓ સાથે વિશ્વાસઘાત : બાંસુરી સ્વરાજ

ભાજપના સાંસદ બાંસુરી સ્વરાજે કહ્યું કે, ‘આજે વચનો પૂરા કરવાનો દિવસ હતો. આજે નારી શક્તિ વંદન અધિનિયમ લાગુ કરવાનો દિવસ હતો; એવું લાગે છે કે કોંગ્રેસ પાર્ટી અને સમગ્ર ઈન્ડિ ગઠબંધન પર માત્ર રાજકીય સ્વાર્થ હાવી થઈ ગયો છે. તેઓએ મહિલાઓ સાથે વિશ્વાસઘાત કર્યો છે, તેમનો ભરોસો તોડ્યો છે.’

મહિલાઓની આશા તૂટી : પ્રિયંકા ચતુર્વેદી

મહિના અનામત બિલ પાસ ન થતા શિવસેના યુબીટીના નેતા અને રાજ્યસભાના પૂર્વ સાંસદ પ્રિયંકા ચતુર્વેદીએ નારાજગી વ્યક્ત કરી છે. તેમણે કહ્યું કે, મહિલા બિલ પાસ ન થવું તે ભારતની તે મહિલાઓ માટે દુઃખદ દિવસ છે, જેમણે સંસદ કે વિધાનસભામાં પોતાની જગ્યા બનાવવાની આશા રાખી હતી.

અમે તેઓને ધિક્કારીએ છીએ : અઠાવલેના વિપક્ષ પર પ્રહાર

કેન્દ્રીય મંત્રી રામદાસ અઠાવલેએ કહ્યું કે, ‘મને લાગે છે કે, કોંગ્રેસ અને વિપક્ષ મહિલા અનામતની વિરોધી છે. આ લોકતંત્ર માટે ખૂબ મોટું નુકસાન છે. કોંગ્રેસ અને વિપક્ષે આવું રાજકારણ કરી મહિલાઓને મળતા અનામત બિલનો વિરોધ કર્યો, બિલને નાપાસ કરવાનું કામ કર્યું. અમે તેઓને ધિક્કારીએ છીએ. એનડીએ અને વડાપ્રધાન નરેન્દ્ર મોદી મહિલાઓની સાથે છે.’

કેન્દ્ર સરકારે કશું જ આપવું ન હતું : ઈમરાન મસૂદ

કોંગ્રેસ સાંસદ ઈમરાન મસૂદે કહ્યું કે, ‘ભાજપ મહિલાઓને અનામત આપવા નથી માંગતી, માત્ર કાર્યક્રમ કરવા માંગે છે. આ ભાજપનું ઇવેન્ટ મેનેજમેન્ટ હતું, જે નિષ્ફળ ગયું છે. કાલથી તેઓ પૂતળા દહન કરતા જોવા મળશે. તેમને આપવું કશું જ નહોતું, માત્ર વાતો જ કરવી હતી. એ જ બધું થયું છે.’

મહિલા અનામત બિલની વિરુદ્ધમાં 230 મત પડ્યા

ઉલ્લેખનીય છે કે, મહિલા અનામત બિલ મુદ્દે 528 સભ્યોએ મતદાન કર્યું છે. આ પૈકી તરફેણમાં 298 મત પડ્યા છે, જ્યારે 230 સભ્યોએ વિરુદ્ધમાં મત આપ્યો છે. આ સાથે જ લોકસભા સ્પીકર ઓમ બિરલાએ મતદાનના પરિણામોની સત્તાવાર જાહેરાત કરીને બિલના પરાજયની પુષ્ટિ કરી હતી. જ્યારબાદ લોકસભા અધ્યક્ષ ઓમ બિરલાએ લોકસભાને આવતીકાલ (શનિવાર) સવારે 11 વાગ્યા સુધી સ્થગિત કરી દીધી છે. હવે લોકસભા શનિવારે સવારે 11 વાગ્યે ફરી મળશે.