'રાહુલ ગાંધી તિરંગાનું અપમાન કરી વિરોધ કરી રહ્યા છે!' ભાજપ નેતા શાઝિયા ઇલ્મીનો દાવો

વિરોધ પ્રદર્શન દરમિયાન રાષ્ટ્રધ્વજના ઉપયોગને લઈને ભારતીય જનતા પાર્ટી (BJP)એ કોંગ્રેસ નેતા રાહુલ ગાંધી અને આમ આદમી પાર્ટી (AAP) સામે મોરચો ખોલ્યો છે. ભાજપના નેતા શાઝિયા ઇલ્મીએ રાહુલ ગાંધી પર આકરા પ્રહારો કરતા આરોપ લગાવ્યો છે કે તેઓ પ્રદર્શનમાં રાષ્ટ્રધ્વજનો દુરુપયોગ કરીને તેનું અપમાન કરી રહ્યા છે.

નવી દિલ્હીમાં મીડિયા સમક્ષ નિવેદન આપતાં શાઝિયા ઇલ્મીએ જણાવ્યું હતું કે, "એક તરફ રાહુલ ગાંધી અને કોંગ્રેસ છે, તો બીજી તરફ આમ આદમી પાર્ટીની પ્રોક્સી ટીમ છે. રાહુલ ગાંધી પોતાના રાજકીય વિરોધ પ્રદર્શનોમાં રાષ્ટ્રધ્વજનો ઉપયોગ કરી રહ્યા છે. જે રીતે તમે વિરોધ કરવા માટે દેશના રાષ્ટ્રધ્વજનો ઉપયોગ કરી રહ્યા છો, તે વાસ્તવમાં તેનું ઘોર અપમાન છે."

ઇલ્મીએ વધુમાં આરોપ લગાવ્યો કે વિપક્ષ પોતાના સંકુચિત રાજકીય એજન્ડાને આગળ ધપાવવા અને જનતાનું ધ્યાન ખેંચવા માટે દેશના ગૌરવ સમાન તિરંગાનો સહારો લઈ રહ્યો છે, જે લોકશાહી અને રાષ્ટ્રીય સન્માનની વિરુદ્ધ છે. શાઝિયા ઇલ્મીના આ નિવેદન બાદ દિલ્હીના રાજકીય વર્તુળોમાં ફરી એકવાર ભાજપ, કોંગ્રેસ અને આમ આદમી પાર્ટી વચ્ચે વાકયુદ્ધ તેજ બન્યું છે.