તારિક રહેમાનના શપથ સમારોહમાં પીએમ મોદીને બોલાવવાની તૈયારી, BNP આપી શકે છે આમંત્રણ

બાંગ્લાદેશમાં ફેબ્રુઆરી 2026માં યોજાયલી ચૂંટણીમાં પ્રચંડ વિજય મેળવ્યા બાદ તારિક રહેમાન દેશના આગામી વડા પ્રધાન તરીકે શપથ લેવાના છે. આ ઐતિહાસિક પ્રસંગે BNP એ ભારત સાથેના સંબંધોમાં "નવી શરૂઆત" નો સંકેત આપ્યો છે. સૂત્રોના જણાવ્યા અનુસાર, BNP પાર્ટી  ભારતના વડાપ્રધાન નરેન્દ્ર મોદીને આમંત્રણ આપવાની તૈયારી કરી રહી છે. વધુમાં BNP તમામ પ્રાદેશિક રાષ્ટ્રપ્રમુખોને પણ આમંત્રણ આપી શકે છે.

તારિક રહેમાનના વિદેશ બાબતોના સલાહકાર હુમાયુ કબીરે કહ્યું છે કે, બંને દેશોએ તેમની જૂની ધારણાઓ બદલવાનો સમય આવી ગયો છે. તેમણે કહ્યું, ભારતે સમજવું જોઈએ કે હવે આજના બાંગ્લાદેશમાં શેખ હસીના અને આવામી લીગનું અસ્તિત્વ બચ્યું નથી.

BNP એ ભારતને અપીલ કરી છે કે, શેખ હસીના જેવા "આતંકવાદી" ને આશ્રય ન આપે, જેમણે બાંગ્લાદેશને અસ્થિર કરવાનો પ્રયાસ કર્યો છે. હુમાયુ કબીરના મતે જો ભારત 'પહેલો પાડોશી' નીતિ હેઠળ આદરપૂર્વક વર્તે છે, તો બંને દેશો વિકાસની નવી ઊંચાઈઓ સુધી પહોંચી શકે છે.

પીએમ મોદી અને તારિક રહેમાન વચ્ચે વાતચીત

ચૂંટણી પરિણામો પછી તરત જ, 13 ફેબ્રુઆરી, 2026 ના રોજ, વડા પ્રધાન મોદીએ તારિક રહેમાન સાથે ફોન પર વાત કરી અને તેમને તેમની શાનદાર જીત બદલ અભિનંદન આપ્યા હતા. બંને નેતાઓ વચ્ચે અત્યંત સૌહાર્દપૂર્ણ વાતચીત રહી, જેમાં પીએમ મોદીએ લોકશાહી અને સમાવેશી બાંગ્લાદેશ માટે ભારતના સમર્થનનો પુનરોચ્ચાર કર્યો. પીએમ મોદીએ તારિક રહેમાનને તેમની સુવિધા મુજબ ભારતની મુલાકાત લેવા આમંત્રણ પણ આપ્યું.