VIDEO:3 દિવસના વિલંબ બાદ ચોમાસું એક્શનમાં, કેરળમાં રેડ એલર્ટ
છેલ્લું અપડેટ : 06 Jun 2026
3 દિવસના વિલંબથી આવ્યા બાદ ચોમાસાએ ગતિ પકડી છે. કેરળ, કર્ણાટક અને તમિલનાડુને પાર કર્યા પછી તે ગોવા અને દક્ષિણ મહારાષ્ટ્ર સુધી પહોંચી ગયું છે. તે ટૂંક સમયમાં મુંબઈ પહોંચવાની પણ શક્યતા છે. હાલમાં, પણજી, બેંગલુરુ, સેલમ અને પંબનમાં ભારે વરસાદ પડી રહ્યો છે. આ દરમિયાન, આજે કેરળમાં વરસાદ માટે રેડ એલર્ટ જારી કરવામાં આવ્યું છે. રેડ એલર્ટનો અર્થ એ છે કે આગામી 24 કલાકમાં 20 સેમીથી વધુ વરસાદ પડવાની સંભાવના છે. વાયનાડ અને કાસરગોડમાં આજે સ્કૂલો બંધ રહેશે. ટુરિસ્ટ ટ્રેકિંગ સ્પોટ પર જવા, રાત્રે પર્વતીય રસ્તાઓ પર મુસાફરી કરવા અને પથ્થરની ખાણકામ પર પ્રતિબંધ મૂકવામાં આવ્યો છે. IMD મુજબ, ચોમાસું ત્રણ દિવસમાં આસામ, મેઘાલય, મિઝોરમ, ત્રિપુરા, મણિપુર, નાગાલેન્ડ, અરુણાચલ પ્રદેશ અને બંગાળના કેટલાક ભાગોમાં પહોંચી શકે છે. તે 10 દિવસમાં બિહાર, ઝારખંડ અને ઓડિશામાં પહોંચી શકે છે. જોકે, ચોમાસું પાછળથી અટકી શકે છે. સ્કાયમેટના હવામાન નિષ્ણાત જી.પી. શર્માના મતે, મધ્યપ્રદેશ, છત્તીસગઢ, ઓડિશા અને પશ્ચિમ બંગાળમાં ચોમાસાને આગળ વધારવા માટે બંગાળની ખાડીમાં એક મજબૂત સિસ્ટમની જરૂર છે, જે હાલમાં ઉપલબ્ધ નથી. પરિણામે, આ રાજ્યોમાં ચોમાસાની ગતિ ધીમી પડી શકે છે. ગુજરાત સિવાયના તમામ રાજ્યોમાં પ્રી-મોન્સુન સક્રિય છે. રાજસ્થાનમાં શુક્રવારે ધૂળની ડમરીઓ અને ભારે વરસાદને કારણે ચાર લોકોના મોત થયા હતા.
