એક ઓર્ડરમાં 3થી 5 કિલોથી વધુ નહીં મળે ખાંડ, ઓનલાઈન અને મોલમાં ખાંડની ખરીદી પર લાગુ કરી મર્યાદા
છેલ્લું અપડેટ : 26 Aug 2026
તહેવારોની સીઝન શરૂ થતાં જ ઘરોમાં મિઠાઈઓ અને વાનગીઓ બનાવવા માટે ખાંડની માગમાં અચાનક ઉછાળો આવ્યો છે. આ દરમિયાન જો તમે ઓનલાઈન ક્વિક-કોમર્સ એપ કે સુપરમાર્કેટમાંથી મોટા પ્રમાણમાં ખાંડ ખરીદવાનું વિચારી રહ્યા છો, તો આ સમાચાર તમારા માટે મહત્ત્વના છે. ગ્રાહકો દ્વારા થતી બિનજરૂરી સંગ્રહખોરી અને વેપારીઓ દ્વારા થતાં કાળાબજારને રોકવા માટે જાણીતા રિટેલર્સ અને ક્વિક-કોમર્સ પ્લેટફોર્મ્સે ખાંડની ખરીદી પર મર્યાદા લાગુ કરી દીધી છે.
એક ઓર્ડરમાં 3 થી 5 કિલોથી વધુ ખાંડ નહીં મળે
D-Mart, BigBasket, Blinkit અને Swiggy Instamart જેવા ઓનલાઈન અને ઓફલાઈન પ્લેટફોર્મ્સ પર ગ્રાહકો માટે ખાંડ ખરીદવાની આંતરિક મર્યાદા નક્કી કરવામાં આવી છે. હવેથી એક ગ્રાહક એક વખતમાં માત્ર 3 થી 5 કિલો સુધી જ ખાંડ ખરીદી શકશે. કેટલીક એપ્સે આ લિમિટ ઘટાડીને માત્ર 3 કિલો સુધીની કરી દીધી છે.
કંપનીઓ સ્પષ્ટ કર્યું છે કે, આ નિર્ણય કોઈ સરકારી આદેશથી નહીં પરંતુ તેમની પોતાની આંતરિક પોલિસી હેઠળ લેવાયો છે, જેથી દરેક ગ્રાહકને પૂરતો જથ્થો મળી રહે અને કોઈ એક જ વ્યક્તિ આખો સ્ટોક ખરીદીને કૃત્રિમ અછત ન ઊભી કરે.
દેશમાં સ્ટોકની કોઈ અછત નથી, ISMA અને સરકારની સ્પષ્ટતા
ખાંડની અછતના અહેવાલો વચ્ચે 'ઇન્ડિયન શુગર એન્ડ બાયો-એનર્જી મેન્યુફેક્ચરર્સ એસોસિએશન' (ISMA) અને સરકાર દ્વારા ગ્રાહકોને આશ્વાસન આપવામાં આવ્યું છે કે દેશમાં ખાંડનો પર્યાપ્ત જથ્થો ઉપલબ્ધ છે. નવી સીઝનમાં શેરડીનું પિલાણ શરૂ થતાં જ અને નવી આયાત આવતાં ખાંડના ભાવો પણ ટૂંક સમયમાં સામાન્ય થઈ જશે. તંત્રે નાગરિકોને અફવાઓથી દૂર રહીને માત્ર જરૂરિયાત મુજબ જ ખરીદી કરવા અપીલ કરી છે.