VIDEO: જે.પી. નડ્ડા અને જિતેન્દ્ર સિંહે મેદાંતા હોસ્પિટલમાં સોનમ વાંગચુકની મુલાકાત લીધી, વાતચીત માટે કરાઈ પહેલ!
છેલ્લું અપડેટ : 22 Jul 2026
છેલ્લા કેટલાક સમયથી અનિશ્ચિતકાલીન ભૂખ હડતાળ પર ઉતરેલા જાણીતા સામાજિક કાર્યકર્તા સોનમ વાંગચુક સાથે સરકારે વાતચીતના એંધાણ આપ્યા છે. ગુડગાંવની મેદાંતા હોસ્પિટલમાં સારવાર હેઠળ રહેલા વાંગચુકની મુલાકાત લેવા માટે કેન્દ્રીય મંત્રી જે.પી. નડ્ડા અને જિતેન્દ્ર સિંહ પહોંચ્યા હતા. આ મુલાકાત બાદ હવે માનવામાં આવી રહ્યું છે કે સરકાર અને વાંગચુક વચ્ચે સર્જાયેલા ગતિરોધને ઉકેલવા તરફ પગલાં લેવાઈ રહ્યા છે.
દિલ્હી હાઇકોર્ટના આદેશથી મેદાંતા શિફ્ટ કરાયા
સોનમ વાંગચુકની બગડતી તબિયતને ધ્યાનમાં રાખીને તેમની પત્ની ગીતાંજલિ આંગ્મોએ દિલ્હી હાઇકોર્ટમાં અરજી કરી હતી. હાઇકોર્ટે સફદરજંગ હોસ્પિટલમાંથી તેમને તુરંત વધુ સારા ઇલાજ માટે ગુડગાંવની મેદાંતા હોસ્પિટલમાં શિફ્ટ કરવાનો આદેશ આપ્યો હતો. મેડિકલ રિપોર્ટ અનુસાર વાંગચુકના શરીરમાં પોટેશિયમનું સ્તર ઘટી ગયું છે અને ટીએલસી (TLC) રિપોર્ટ પણ ચિંતાજનક હોવાથી નિષ્ણાત ડોક્ટરોની સતત દેખરેખ જરૂરી જણાવાઈ હતી.
શિક્ષણ પ્રણાલીમાં સુધારાની માગણીઓ
ઉલ્લેખનીય છે કે સોનમ વાંગચુક શિક્ષણ પ્રણાલીમાં જવાબદેહી નક્કી કરવાની માગ સાથે 28 જૂનથી અનિશ્ચિતકાલીન ભૂખ હડતાળ પર છે. તેમની મુખ્ય માગણીઓમાં નીટ (NEET) સહિતની વિવિધ પરીક્ષાઓના પેપર લીક અને ગડબડીઓ મુદ્દે શિક્ષણ મંત્રીના રાજીનામા તેમજ વિદ્યાર્થીઓના હિતમાં નક્કર નિર્ણયો લેવાનો સમાવેશ થાય છે.
GSTVની એપ્લિકેશન ડાઉનલોડ કરો
