Pahalgam Attack: બીજી એરસ્ટ્રાઈકની તૈયારી? PoKમાં 42 આતંકવાદી કેમ્પ પર ભારતીય સેનાની નજર; જાણો CCS બેઠકમાં શું ચર્ચા થઈ
છેલ્લું અપડેટ : 23 Apr 2025
Pahalgam Attack: જમ્મુ-કાશ્મીરના પહેલગામમાં થયેલા આતંકવાદી હુમલા બાદ સુરક્ષા દળોએ કાર્યવાહી શરૂ કરી દીધી છે. આ દરમિયાન, સેનાએ પીઓકેમાં 42 આતંકવાદી કેમ્પોની ઓળખ કરી. એવું કહેવામાં આવી રહ્યું છે કે જો જરૂર પડશે તો આ કેમ્પોનો નાશ કરવામાં આવશે. આમાં 10 ઉત્તર પીર પંજાલ રેન્જ (કાશ્મીરની બીજી બાજુ પીઓકેમાં) અને 32 દક્ષિણ પીર પંજાલ રેન્જ (જમ્મુની બીજી બાજુ પીઓકેમાં)નો સમાવેશ થાય છે.
પીઓકેમાં ૧૩૦ લોન્ચ પેડ હોવાની શક્યતા છે
પીઓકેમાં કુલ ૧૧૦થી ૧૩૦ આતંકવાદી લોન્ચ પેડ હોવાની શક્યતા છે. ઉત્તર પીર પંજાલમાં 30થી 35 આતંકવાદી લોન્ચ પેડ છે. પીઓકેમાં દક્ષિણ પીર પંજાલ વિસ્તારમાં લગભગ 100 આતંકવાદી લોન્ચ પેડ છે. પહેલગામમાં થયેલા ક્રૂર આતંકવાદી હુમલાના એક દિવસ પછી, વડા પ્રધાન નરેન્દ્ર મોદીના નેતૃત્વ હેઠળની સુરક્ષા પરની કેબિનેટ સમિતિ (CCS) બુધવારે સાંજે બેઠક કરી રહી છે.
પીએમ મોદીની અધ્યક્ષતામાં CCS બેઠક
પીએમ મોદી ઉપરાંત, સુરક્ષા અંગેની કેબિનેટ સમિતિમાં ગૃહમંત્રી અમિત શાહ, સંરક્ષણ મંત્રી રાજનાથ સિંહ, વિદેશ મંત્રી એસ જયશંકર અને નાણામંત્રી નિર્મલા સીતારમણનો સમાવેશ થાય છે. પહેલગામ હુમલા બાદ ભારત કડક કાર્યવાહી કરી શકે છે. પ્રધાનમંત્રીની અધ્યક્ષતામાં મળનારી સીસીએસ બેઠકમાં પાકિસ્તાન સાથે રાજદ્વારી સંબંધો સમાપ્ત કરવાનો નિર્ણય લેવામાં આવી શકે છે. સિંધુ જળ સંધિ પર પણ મોટો નિર્ણય લેવામાં આવી શકે છે.
ભારતને ડરાવી શકાય નહીં - સંરક્ષણ પ્રધાન
સંરક્ષણ મંત્રી રાજનાથ સિંહે પહેલગામ આતંકવાદી હુમલાની નિંદા કરી. તેમણે દેશવાસીઓને ખાતરી આપી કે સરકાર દરેક જરૂરી પગલાં લેશે. તેમણે કહ્યું, "આતંકવાદ સામે અમારી ઝીરો ટોલરન્સ નીતિ છે. ભારતનો દરેક નાગરિક આ કાયરતાપૂર્ણ કૃત્ય સામે એકજૂથ છે. ભારતને ડરાવી શકાય નહીં. હું દેશવાસીઓને ખાતરી આપું છું કે આ ઘટનાને ધ્યાનમાં રાખીને, ભારત સરકાર દરેક જરૂરી અને યોગ્ય પગલું ભરશે." અગાઉ, ગૃહમંત્રી અમિત શાહે પહેલગામના બૈસરનની મુલાકાત લીધી હતી, જ્યાં આતંકવાદીઓએ હુમલો કર્યો હતો.
