VIDEO: ખાનગી સ્કૂલમાં શિક્ષિકાએ 6 વર્ષના બાળકને થપ્પડ મારી, અચાનક ઢળી પડ્યો અને મોત
છેલ્લું અપડેટ : 21 Aug 2026
આંધ્રપ્રદેશના વિશાખાપટ્ટણમમાં એક ખાનગી સ્કૂલમાં 6 વર્ષના LKGના વિદ્યાર્થીનું રહસ્યમય સંજોગોમાં મોત થતાં ચકચાર મચી ગઈ છે. પરિવારનો આરોપ છે કે હોમવર્ક પૂર્ણ ન કરવા બદલ શિક્ષિકાએ બાળકને માર માર્યો હતો. ત્યારબાદ બાળક ડરી ગયો, રડવા અને ઉધરસ કરવા લાગ્યો અને થોડા સમય બાદ અચાનક ઢળી પડ્યો.
પરિવારે શિક્ષિકા પર માર મારવાનો આરોપ લગાવ્યો છે, જોકે બાળકના મોતનું ચોક્કસ કારણ હજુ સુધી સ્પષ્ટ થયું નથી. પોલીસ સમગ્ર મામલાની તપાસ કરી રહી છે.
CCTVમાં શિક્ષિકા બાળકને થપ્પડ મારતી જોવા મળી
અધિકારીઓને મળેલા સ્કૂલના CCTV ફૂટેજ (CCTV Footage)માં શિક્ષિકા બાળકને ઠપકો આપતી જોવા મળે છે. ફૂટેજમાં બાળક રડતો અને શિક્ષિકા સામે હાથ હલાવતો જોવા મળે છે, જાણે તે તેમને વિનંતી કરી રહ્યો હોય.
ત્યારબાદ શિક્ષિકા બાળકનો શર્ટ અને પેન્ટ ઠીક કરતી જોવા મળે છે અને પછી તેને થપ્પડ મારતી હોવાનું ફૂટેજમાં દેખાય છે. થોડી જ સેકન્ડ બાદ બાળક શિક્ષિકાના ખોળામાં ઢળી પડે છે.
શિક્ષિકા બેઠેલી સ્થિતિમાં તેને ઊભો કરવાનો પ્રયાસ કરતી જોવા મળે છે, પરંતુ બાળક તરફથી કોઈ પ્રતિક્રિયા મળતી નથી. પોલીસે આ CCTV ફૂટેજને તપાસનો મહત્વપૂર્ણ ભાગ બનાવ્યો છે.
પરિવારનો ગંભીર આરોપ
પરિવારના જણાવ્યા મુજબ, બાળક સ્કૂલમાં હતો ત્યારે ઘટના બની હતી. શિક્ષિકાએ કથિત રીતે તેને હોમવર્ક ન કરવા બદલ માર માર્યો હતો. ત્યારબાદ બાળક ખૂબ ડરી ગયો અને રડવા લાગ્યો. તેને ઉધરસ પણ આવી હતી અને ત્યારબાદ તે બેભાન થઈને ઢળી પડ્યો હતો.
પરિવારે આરોપ લગાવ્યો છે કે બાળકને હોસ્પિટલ લઈ જવામાં આવ્યો ત્યારે તે પહેલેથી જ મૃત હતો. પરિવારજનોએ શિક્ષિકા અને સ્કૂલ મેનેજમેન્ટ સામે કડક કાર્યવાહી કરવાની માંગ કરી છે.
પિતાએ કહ્યું- સ્કૂલમાંથી કોઈ ફોન આવ્યો નહોતો
બાળકના પિતાનો દાવો છે કે સ્કૂલ તરફથી તેમને ઘટનાની કોઈ જાણ કરવામાં આવી નહોતી. તેમના જણાવ્યા મુજબ, તેમના સાળાના ત્યાં કામ કરતા સ્થાનિક રસોઈયાઓ પાસેથી તેમને ઘટનાની માહિતી મળી હતી. પિતાએ એ વાતને પણ નકારી કાઢી હતી કે ઘટના દિવસે સ્કૂલે જતાં પહેલાં બાળકની તબિયત ખરાબ હતી.
પોલીસની તપાસ શરૂ
પોલીસે આ મામલે કેસ નોંધ્યો છે અને તપાસ શરૂ કરી છે. ઘટનાસ્થળે હાજર રહેલા લોકોની પૂછપરછ કરવામાં આવી રહી છે. સાથે જ CCTV ફૂટેજ અને અન્ય પુરાવાઓની તપાસ કરવામાં આવી રહી છે, જેથી બાળક સાથે ખરેખર શું થયું હતું તે જાણી શકાય.
બાળકના મોતનું ચોક્કસ કારણ હજુ સુધી સામે આવ્યું નથી. પોસ્ટમોર્ટમ (Post-mortem) રિપોર્ટની રાહ જોવામાં આવી રહી છે.
મંત્રી નારા લોકેશે વ્યક્ત કરી સંવેદના
આંધ્રપ્રદેશના માનવ સંસાધન વિકાસ મંત્રી નારા લોકેશે બાળકના મોત પર દુઃખ વ્યક્ત કર્યું છે. તેમણે કહ્યું કે શિક્ષિકા દ્વારા કથિત રીતે માર મારવામાં આવ્યા બાદ માત્ર 6 વર્ષના બાળકનું મોત થવું અત્યંત હૃદયદ્રાવક છે.
વિદ્યાર્થીના માતા-પિતાને સંબોધતા લોકેશે કહ્યું કે સરકાર આરોપીઓ અને સ્કૂલ મેનેજમેન્ટ સામે કાયદેસરની કાર્યવાહી કરશે. તેમણે પરિવારને હિંમત રાખવા જણાવ્યું અને ખાતરી આપી કે સરકાર દરેક શક્ય રીતે પરિવારની સાથે રહેશે.
BNSSની કલમ 194 હેઠળ પ્રાથમિક તપાસ
આ મામલે ભારતીય નાગરિક સુરક્ષા સંહિતા (BNSS)ની કલમ 194 હેઠળ પ્રાથમિક તપાસ શરૂ કરવામાં આવી છે. આ કલમ અસ્વાભાવિક અથવા શંકાસ્પદ સંજોગોમાં થયેલા મોત અંગે પોલીસ તપાસ અને રિપોર્ટની પ્રક્રિયા સાથે સંબંધિત છે.
હાલમાં બાળકના મોતનું ચોક્કસ કારણ પોસ્ટમોર્ટમ રિપોર્ટ આવ્યા બાદ જ સ્પષ્ટ થશે. પોલીસ CCTV ફૂટેજ, સાક્ષીઓના નિવેદનો અને અન્ય પુરાવાઓના આધારે આગળની કાર્યવાહી કરી રહી છે.
