હનીમૂન મર્ડર કેસ: આરોપી પત્ની સોનમ રઘુવંશીને મોટી રાહત, જામીન પર સ્ટે આપવાનો સુપ્રીમ કોર્ટનો ઇનકાર
છેલ્લું અપડેટ : 03 Jul 2026
સુપ્રીમ કોર્ટે ૨૦૨૫માં હનીમૂન દરમિયાન પતિની હત્યા કરવાની આરોપી સોનમ રઘુવંશીને જામીન આપવાના મેઘાલય હાઈકોર્ટના આદેશ પર રોક લગાવવાનો શુક્રવારે ઇનકાર કરી દીધો છે.
ઇન્દોરના ટ્રાન્સપોર્ટ વેપારી રાજા રઘુવંશીની હત્યાના કેસમાં સુપ્રીમ કોર્ટે આરોપી સોનમ રઘુવંશીના જામીન પર સ્ટે આપવાનો ઇનકાર કર્યો છે. અદાલતે જણાવ્યું હતું કે સોનમ જામીન પર પહેલાથી જ જેલમુક્ત થઈ ચૂકી છે. હવે આ મામલે આગામી સુનાવણી ૯ જુલાઈએ હાથ ધરવામાં આવશે.
સુપ્રીમ કોર્ટે ઇન્દોરના રાજા રઘુવંશી હત્યાકાંડમાં આરોપી પત્ની સોનમ રઘુવંશીને મેઘાલય હાઈકોર્ટમાંથી મળેલા જામીન પર રોક લગાવવાની ના પાડી દીધી છે. જસ્ટિસ એમ. એમ. સુંદરેશ અને જસ્ટિસ શીલ નાગુની પીઠે જણાવ્યું હતું કે કેસની હકીકતો અને પરિસ્થિતિઓને જોતાં હાઈકોર્ટના આદેશ પર ગંભીર સવાલો ઊભા થાય છે, જે અંગે આગળ સુનાવણીની જરૂર છે.
મેઘાલય સરકારની દલીલ- સોનમ ફરાર થઈ જવાનો ખતરો:
સુનાવણી દરમિયાન સોલિસિટર જનરલ તુષાર મહેતાએ અદાલતને જણાવ્યું કે સોનમ પર લાગેલા આરોપો અત્યંત ગંભીર છે. આ પહેલાં પણ તેની જામીન અરજીઓ ફગાવી દેવામાં આવી હતી અને આ મામલો માત્ર ધરપકડ દરમિયાન થયેલી કોઈ ટેકનિકલ કે ક્લેરિકલ (કારકુની) ભૂલનો નથી. મેઘાલય સરકારની દલીલ છે કે જો સોનમ બહાર રહેશે તો તે ફરાર થઈ જાય તેવો ખતરો છે.
બીજી તરફ સોનમ રઘુવંશી વતી હાજર રહેલા વકીલે જણાવ્યું કે ધરપકડ સમયે તેમને ન તો વકીલ પૂરો પાડવામાં આવ્યો હતો અને ન તો ધરપકડના સ્પષ્ટ કારણો જણાવવામાં આવ્યા હતા. તેમનો દાવો હતો કે પોલીસે માત્ર એક ખાલી પ્રોફોર્મા આપ્યો હતો. આ મુદ્દે સુપ્રીમ કોર્ટે પૂછ્યું કે જો આ બાબત એટલી મહત્વની હતી તો તેને પહેલાં કેમ ન ઉઠાવવામાં આવી? કોર્ટે એ પણ પૂછ્યું કે જો જામીન માત્ર ટેકનિકલ આધાર પર આપવામાં આવ્યા હોય, તો શું કાયદો પોલીસને ફરીથી ધરપકડ કરતાં રોકે છે?
મેઘાલય સરકારે હાઈકોર્ટના આદેશને આપી હતી પડકાર:
જણાવી દઈએ કે ઇન્દોરના ટ્રાન્સપોર્ટ વ્યાપારી રાજા રઘુવંશીની હત્યાના કેસમાં મેઘાલય સરકારે સુપ્રીમ કોર્ટમાં મેઘાલય હાઈકોર્ટના એ આદેશને પડકાર્યો હતો, જેમાં સોનમ રઘુવંશીને મળેલા જામીનને યોગ્ય ઠેરવવામાં આવ્યા હતા. સોનમ પર મે ૨૦૨૫માં હનીમૂન દરમિયાન પોતાના પતિ રાજા રઘુવંશીની હત્યાની મુખ્ય કાવતરાખોર હોવાનો આરોપ છે.
હાઈકોર્ટમાંથી પણ રાજ્ય સરકારની અપીલ ફગાવી દેવાઈ હતી:
અગાઉ, મેઘાલય હાઈકોર્ટે ૨૯ જૂને શિલોંગ અદાલતના એ આદેશને યથાવત રાખ્યો હતો, જેમાં રાજા રઘુવંશી મર્ડર કેસની મુખ્ય આરોપી સોનમ રઘુવંશીને જામીન આપવામાં આવ્યા હતા. અદાલતે રાજ્ય સરકારની અપીલને ફગાવી દીધી હતી.
જસ્ટિસ ડબ્લ્યુ. ડિએન્ગડોહની સિંગલ બેન્ચે શિલોંગના એડિશનલ ડિસ્ટ્રિક્ટ એન્ડ સેશન્સ જજ (જ્યુડિશિયલ)ના એપ્રિલ ૨૦૨૬ના આદેશને પડકારતી રાજ્ય સરકારની અરજીને નામંજૂર કરી હતી. આ આદેશમાં ધરપકડમાં ગંભીર પ્રક્રિયાગત ખામીઓ જોવા મળ્યા બાદ સોનમને જામીન આપવામાં આવ્યા હતા. હાઈકોર્ટે ૧૦ જૂને બંને પક્ષોની વિગતવાર દલીલો સાંભળ્યા બાદ પોતાનો ચુકાદો અનામત રાખ્યો હતો.
શિલોંગ કોર્ટે સોનમને જામીન આપતી વખતે નોંધ્યું હતું કે તપાસ અધિકારીઓએ ધરપકડના આધારો યોગ્ય રીતે દર્શાવ્યા નહોતા, જેના કારણે આરોપીના બચાવના અધિકાર પર અસર પડી હતી.