VIDEO: ઉત્તરાખંડના રુદ્રપ્રયાગમાં ભારે વરસાદ: અલકનંદા અને મંદાકિની નદીઓ ભયજનક સપાટી વટાવી
છેલ્લું અપડેટ : 28 Jul 2026
ઉત્તરાખંડના રુદ્રપ્રયાગ જિલ્લામાં સતત વરસી રહેલા મુસળધાર વરસાદના કારણે સ્થિતિ અત્યંત ગંભીર બની ગઈ છે. પહાડી વિસ્તારોમાં ભારે વરસાદને પગલે અલકનંદા અને મંદાકિની નદીઓની જળસપાટી ચેતવણીના નિશાનને વટાવી ગઈ છે, જેને પગલે જિલ્લા પ્રશાસન દ્વારા સમગ્ર વિસ્તારમાં હાઇ એલર્ટ જાહેર કરી દેવામાં આવ્યું છે.
નદી કિનારે રહેતા લોકોને સુરક્ષિત સ્થળે ખસવા અપીલ
સ્થિતિની ગંભીરતાને ધ્યાનમાં રાખીને તંત્ર દ્વારા તમામ સંબંધિત વિભાગોને અત્યંત સતર્ક રહેવાના આદેશ આપવામાં આવ્યા છે. આ સાથે જ અલકનંદા અને મંદાકિની નદીના કાંઠે આવેલા વિસ્તારોમાં વસતા સ્થાનિક રહીશોને સાવચેત રહેવા અને જરૂર જણાયે તાત્કાલિક સુરક્ષિત સ્થળોએ ખસી જવા માટે અપીલ કરવામાં આવી છે.
હવામાન વિભાગની આગાહી બાદ તંત્ર એલર્ટ મોડ પર
ભારતીય હવામાન વિભાગ (IMD) દ્વારા આપવામાં આવેલી વરસાદની ચેતવણીને પગલે જિલ્લા પ્રશાસને તમામ અધિકારીઓને પોતપોતાના વિસ્તારોમાં ચાંપતી નજર રાખવા સૂચના આપી છે.
આપત્તિ વ્યવસ્થાપન તૈયાર, રેસ્ક્યુ ટીમો સ્ટેન્ડબાય
કોઈપણ સંભવિત કુદરતી આપત્તિ કે ભૂસ્ખલન (Landslide) જેવી કટોકટીની સ્થિતિને પહોંચી વળવા માટે તમામ સરકારી વિભાગોને પૂરતી તૈયારીઓ સાથે સજ્જ રહેવા જણાવાયું છે. બચાવ અને રાહત કામગીરી માટે તમામ જરૂરી સંસાધનો સાથે એનડીઆરએફ (NDRF) અને એસડીઆરએફ (SDRF) સહિતની રેસ્ક્યુ ટીમોને એલર્ટ મોડ પર રાખવામાં આવી છે.