Video: ટાઇગર શ્રોફ પર ફાયરિંગ: ફડણવીસની ચેતવણી- કોઈ પણ ગેંગને છોડવામાં નહીં આવે
માયાનગરી મુંબઈમાં સેલેબ્રિટીઝની સુરક્ષા સામે ફરી એકવાર મોટો પ્રશ્નાર્થ ચિહ્ન ઊભો થયો છે. જાણીતા બોલિવૂડ એક્ટર ટાઇગર શ્રોફ પર થયેલા જીવલેણ હુમલાએ સિનેમા જગતમાં સનસનાટી મચાવી દીધી છે. રવિવારે રાત્રે બનેલી આ ઘટના મામલે હવે મહારાષ્ટ્રના મુખ્યમંત્રી દેવેન્દ્ર ફડણવીસનું નિવેદન સામે આવ્યું છે. તેમણે ચેતવણી આપી છે કે હુમલાના માસ્ટરમાઇન્ડ દુનિયાના ગમે તે ખૂણે છુપાયેલા હશે, કાયદો તેમને શોધી કાઢશે. રવિવારે રાત્રે બનેલી ઘટના બાદ મુખ્યમંત્રીએ ટાઇગર શ્રોફ સાથે ટેલિફોનિક વાતચીત કરીને તેમના ખબર-અંતર પૂછ્યા હતા અને સરકાર તેમની પડખે હોવાની ખાતરી આપી હતી.
સોમવારે પત્રકારો સાથે વાતચીત કરતાં મુખ્યમંત્રી દેવેન્દ્ર ફડણવીસે જણાવ્યું હતું કે મુંબઈ પોલીસે આ ઘટનાને અત્યંત ગંભીરતાથી લીધી છે. તેમણે કહ્યું કે, આ ખૂબ જ ગંભીર અને નિંદનીય બાબત છે. પોલીસે આને ગંભીરતાથી લીધી છે. પોલીસને કેટલાક પુરાવા મળ્યા છે. પોલીસે ઓળખ કરી છે કે આ લોકો દેશની બહારથી ઓપરેટ કરી રહ્યા છે. આ ડરપોક લોકો છે, જે છુપાઈ-છુપાઈને વાર કરવાનું કામ કરે છે. કોઈ પણ ગેંગ હોય, તેને છોડવામાં નહીં આવે. સીધા કેવી રીતે કરવા એ મુંબઈ પોલીસ સારી રીતે જાણે છે. આમના આકા ગમે ત્યાં બેઠા હોય, કાયદાકીય પ્રક્રિયા પૂરી કરીને તેમને શોધી કાઢીશું. વિપક્ષ આ મામલાને હાઇજેક કરવાનો પ્રયાસ કરી રહ્યો છે. આ એ જ લોકો છે જે અગાઉ પોતાની પોલીસ પાસે હત્યાઓ કરાવતા હતા અને બદલી-પોસ્ટિંગમાં પૈસા ખાતા હતા. કોઈ પણ ગેંગ હોય, કોઈને છોડવામાં નહીં આવે.
આ દરમિયાન, ફડણવીસે આ મુદ્દે વિપક્ષ દ્વારા કરવામાં આવેલા પ્રહારોનો જવાબ આપ્યો હતો. તેમણે કહ્યું, "વિપક્ષ સરકારને નિશાન બનાવવાનો પ્રયાસ કરી રહ્યો છે. તેમણે આત્મનિરીક્ષણ કરવું જોઈએ—આ એ જ લોકો છે જેમની સત્તા દરમિયાન સરકારે પોતાના જ પોલીસ દળનો ઉપયોગ હત્યાઓ કરવા માટે કર્યો હતો. શું તેઓ મનસુખ હિરેનની હત્યા ભૂલી ગયા છે?"
અગાઉના શાસનો પર નિશાન સાધતા ફડણવીસે આક્ષેપ કર્યો કે તેઓ બદલીઓ અને નિમણૂકોમાંથી લાભ મેળવતા હતા. તેમણે ઉલ્લેખ કર્યો કે તેમના મંત્રીઓએ જેલમાં જવું પડ્યું હતું, અને નોંધ્યું કે તેમના શાસનકાળ દરમિયાન દેશના સૌથી અગ્રણી ઉદ્યોગપતિ પણ સુરક્ષિત નહોતા—તેમની પોતાની પોલીસે જ તેમના ઘરની બહાર બોમ્બ મૂક્યો હતો. તેથી, વિપક્ષ ગમે તે દાવા કરે, પરંતુ જનતા અને બોલિવૂડ જગત બંનેનો મુંબઈ પોલીસ પર વિશ્વાસ અકબંધ છે. મેં ટાઈગર શ્રોફને ખાતરી આપી છે કે તેમણે ચિંતા કરવાની જરૂર નથી; આ કૃત્ય માટે જવાબદાર લોકો સુધી ચોક્કસ પહોંચવામાં આવશે.
