VIDEO: "ફોર્મ-૬માં ફેરફાર કરવાનો ચૂંટણી પંચને કોઈ અધિકાર નથી": સુપ્રીમ કોર્ટના ચુકાદા બાદ BJD નેતાનો ECI અને CEC પર કટાક્ષ
છેલ્લું અપડેટ : 05 Oct 2026
મતદાર યાદીમાં નવા મતદારો ઉમેરવા માટેના ‘ફોર્મ-૬’ તેમજ સ્પેશિયલ ઇન્ટેન્સિવ રિવિઝન (SIR) પ્રક્રિયાને લઈને સુપ્રીમ કોર્ટે આપેલા મહત્વના આદેશ બાદ વિપક્ષી પક્ષો વધુ આક્રમક બન્યા છે. બીજુ જનતા દળ (BJD)ના વરિષ્ઠ નેતા ડૉ. લેખશ્રી સામંતસિંઘારે સુપ્રીમ કોર્ટના ચુકાદાનું સ્વાગત કરતા ભારતીય ચૂંટણી પંચ (ECI) અને મુખ્ય ચૂંટણી કમિશનર (CEC) પર અત્યંત ગંભીર આક્ષેપો કર્યા છે.
સુપ્રીમ કોર્ટના વલણ અંગે વિગતો આપતાં લેખશ્રી સામંતસિંઘારે જણાવ્યું હતું કે, "આજે સુપ્રીમ કોર્ટે ખૂબ જ મહત્વનો આદેશ આપ્યો છે. સર્વોચ્ચ અદાલતે સ્પષ્ટ કર્યું છે કે ફોર્મ-૬માં પોતાની મરજીથી ફેરફાર કરવાનો અધિકાર ચૂંટણી પંચ પાસે નથી, આવા કોઈ પણ ફેરફાર લાવવાનો અધિકાર માત્ર ભારત સરકાર પાસે છે. આ ઉપરાંત અદાલતે CEC અને અન્ય ચૂંટણી કમિશનરોને નોટિસ જારી કરી છે, જેનાથી સમગ્ર SIR પ્રક્રિયા સામે મોટો પ્રશ્નાર્થ ચિહ્ન ઊભો થયો છે."
તેમણે આરોપ લગાવ્યો હતો કે તમામ વિપક્ષી દળો સાથે બીજુ જનતા દળે પણ આ મામલે વારંવાર ચૂંટણી પંચ સમક્ષ રજૂઆતો કરી હતી, છતાં મનસ્વી રીતે મતદારોના નામ કમી કરવામાં આવ્યા. તેમણે સનસનાટીભર્યા આંકડા રજૂ કરતાં કહ્યું કે
-
ઓડિશામાં ૨૭.૫ લાખ મતદારો: માત્ર ઓડિશા રાજ્યમાં જ લાખો અસલી મતદારોના નામ લિસ્ટમાંથી ગાયબ કરી દેવાયા છે.
-
દેશભરમાં ૧૩ કરોડ નામ રદ: સમગ્ર દેશમાં આશરે ૧૩ કરોડ મતદારોના નામ એક AI-આધારિત એપ (ECI Net) દ્વારા મનમાની રીતે કાઢી નાખવામાં આવ્યા છે.
-
ERO ની ડિજિટલ સહીનો દુરુપયોગ: ચૂંટણી અધિકારીઓની (ERO) ડિજિટલ સાઇન લઈને દિલ્હી સ્થિત પંચ દ્વારા જ તેનું સંચાલન કરવામાં આવ્યું હોવાનો પણ તેમણે દાવો કર્યો હતો.
BJD નેતાએ આક્ષેપ કર્યો કે સમગ્ર SIR પ્રક્રિયા ખામીયુક્ત અને ગેરકાયદે છે. "કોઈ એક ચોક્કસ રાજકીય પક્ષને સતત ચૂંટણીઓ જિતાડવા માટે જો CEC તેમના ઈશારે મતદારોના અધિકાર છીનવે, તો આ દેશનો કોઈ પણ નાગરિક તેને સહન નહીં કરે. ભારતીય બંધારણમાં લોકશાહી પ્રક્રિયા સાથે ચેડાં કરવાની છૂટ નથી. સુપ્રીમ કોર્ટે આ સમગ્ર ગેરરીતિ સામે કડક વલણ દાખવ્યું છે, જે લોકશાહી અને પારદર્શિતા માટે અત્યંત જરૂરી હતું," તેમ તેમણે ઉમેર્યું હતું.