VIDEO: ‘સાફાને હેલ્મેટ ન માનતા’; સેવા યાત્રીઓ સાથે PM મોદીની વાત, કહ્યું- ભારતને પુસ્તકોમાં નહીં, ગામડે-ગામડે ફરીને સમજો
છેલ્લું અપડેટ : 25 Sept 2026
વડનગરથી વારાણસી સુધીની (Bike Yatra) પર નીકળેલા ‘સેવા યાત્રીઓ’ સાથે વડાપ્રધાન નરેન્દ્ર મોદીએ વીડિયો કોન્ફરન્સિંગ (Video Conferencing) દ્વારા સંવાદ કર્યો હતો. આ દરમિયાન તેમણે સેવા, સામાજિક સુધારણા, સરકારી યોજનાઓના અસરકારક અમલ અને ભારતની સાંસ્કૃતિક વિવિધતાને નજીકથી સમજવાના મહત્વ અંગે વાત કરી હતી. પીએમ મોદીએ કહ્યું કે યાત્રા દરમિયાન મળતા અનુભવો જીવનભરની મૂડી બની શકે છે.
‘આ યાત્રા જીવનમાં નવી ઊર્જા ભરશે’
સેવા યાત્રીઓ સાથે વાતચીત દરમિયાન પીએમ મોદીએ કહ્યું કે સેવા સંકલ્પ યાત્રા અને કલશ યાત્રા દરમિયાન મળતા અનુભવો અમૂલ્ય છે. લોકો વચ્ચે જવું, તેમની સાથે જોડાવું અને સ્થાનિક જીવનશૈલીને સમજવી પોતાનામાં એક અલગ અનુભવ છે.
તેમણે કહ્યું કે દેશના અલગ-અલગ રાજ્યો અને ગામડાઓમાં પ્રવાસ કરતી વખતે યાત્રીઓને ભારતની વિશાળતા અને વિવિધતાનો સીધો અનુભવ થશે. ભારતને માત્ર પુસ્તકો વાંચીને સંપૂર્ણ રીતે સમજી શકાય નહીં, પરંતુ લોકોની વચ્ચે જઈને અને તેમના જીવનને નજીકથી જોઈને દેશને વધુ સારી રીતે સમજવાની તક મળે છે.
અલગ પ્રદેશોની પરંપરા અને જીવનશૈલી સમજવાની તક
વડાપ્રધાને કહ્યું કે ભારતના અલગ-અલગ વિસ્તારોમાં પરંપરા, ખાણીપીણી અને જીવનશૈલીમાં વિવિધતા જોવા મળે છે. સેવા કાર્યો દરમિયાન લોકો સાથે જોડાવાથી સમાજ કેવી રીતે પરસ્પર સહયોગથી આગળ વધે છે તે પણ સમજાય છે.
તેમણે સેવા યાત્રીઓને આ અનુભવને માત્ર પ્રવાસ તરીકે નહીં પરંતુ શીખવાની તક તરીકે જીવવા જણાવ્યું. સમાજના લોકો દ્વારા કરવામાં આવતા વિવિધ સેવા કાર્યો અને તેમના અનુભવોમાંથી પણ નવી ઊર્જા મળી શકે છે, તેમ તેમણે જણાવ્યું.
‘સાફાને હેલ્મેટ ન સમજતા’, પીએમ મોદીની હળવી ટકોર
સંવાદ દરમિયાન પીએમ મોદીએ સેવા યાત્રીઓના કેસરિયા સાફાનો પણ ઉલ્લેખ કર્યો. તેમણે પૂછ્યું કે શું ગામના લોકોએ આ સાફા યાત્રીઓને ભેટમાં આપ્યા છે. ગામડાંમાં મળેલા આત્મીય સ્વાગત બદલ તેમણે ગ્રામજનોનો આભાર માન્યો.
ત્યારબાદ હળવા અંદાજમાં તેમણે યાત્રીઓને બાઈક ચલાવતી વખતે સાફાની જગ્યાએ હેલ્મેટ પહેરવાની સલાહ આપી. તેમણે કહ્યું કે ‘સાફાને હેલ્મેટ ન માનતા.’ આ રીતે તેમણે યાત્રા દરમિયાન માર્ગ સલામતીનું મહત્વ પણ યાદ અપાવ્યું.
યોજના ત્યારે સફળ જ્યારે અંતિમ વ્યક્તિ સુધી લાભ પહોંચે
પીએમ મોદીએ સરકારી યોજનાઓના (Implementation) મુદ્દે પણ સેવા યાત્રીઓ સાથે વાત કરી. તેમણે કહ્યું કે માત્ર યોજના બનાવવી અથવા તેના માટે નાણાં ફાળવવા પૂરતું નથી. યોજનાનો સાચો હેતુ ત્યારે પૂર્ણ થાય છે જ્યારે તેનો લાભ સમાજના અંતિમ વ્યક્તિ સુધી પહોંચે અને તેના જીવનમાં વાસ્તવિક પરિવર્તન આવે.
તેમણે કહ્યું કે કોઈ સરકારી યોજના દ્વારા જ્યારે વ્યક્તિના જીવનમાં નવી તક ઊભી થાય અથવા તેની પરિસ્થિતિ બદલાય ત્યારે મળતો સંતોષ અલગ પ્રકારનો હોય છે. સેવા યાત્રીઓ માટે આવા અનુભવો એક પ્રકારની તાલીમ સમાન બની શકે છે.
મહાત્મા ગાંધીના સામાજિક સુધારણા કાર્યનો ઉલ્લેખ
વડાપ્રધાને મહાત્મા ગાંધીના જીવનનો ઉલ્લેખ કરતાં કહ્યું કે સ્વતંત્રતા આંદોલન ઉપરાંત ગાંધીજીએ સમાજમાં રહેલી વિવિધ સમસ્યાઓ અને સામાજિક કુરિવાજો સામે પણ કામ કર્યું હતું.
પીએમ મોદીએ સમાજમાં સતત સુધારણા અને સકારાત્મક પરિવર્તન માટે કામ કરવાની જરૂરિયાત પર ભાર મૂક્યો. તેમણે સેવા સાથે જોડાયેલા લોકોના યોગદાનને સન્માન આપવાની વાત પણ કરી.
સફાઈ કર્મચારીઓના સન્માન પર ભાર
પીએમ મોદીએ સફાઈ કર્મચારીઓના યોગદાનનો પણ ઉલ્લેખ કર્યો. તેમણે કહ્યું કે સમાજને સ્વચ્છ રાખવામાં મહત્વપૂર્ણ ભૂમિકા ભજવનારા સફાઈ કર્મચારીઓને સન્માન અને ગૌરવ મળવું જોઈએ.
તેમણે પ્રયાગરાજમાં કુંભ દરમિયાન સફાઈ કર્મચારીઓના કાર્યનો ઉલ્લેખ કરતાં કહ્યું કે આવા લોકોની સેવા દેશની પ્રતિષ્ઠા સાથે પણ જોડાયેલી છે. સમાજમાં સફાઈ કાર્ય સાથે સંકળાયેલા લોકો પ્રત્યે સન્માનની ભાવના વિકસાવવી જરૂરી છે.
પંડિત દીનદયાળ ઉપાધ્યાયના ‘ચરૈવતિ’ મંત્રની વાત
પીએમ મોદીએ પંડિત દીનદયાળ ઉપાધ્યાયની જન્મજયંતિનો ઉલ્લેખ કરીને ‘ચરૈવતિ-ચરૈવતિ-ચરૈવતિ’ના મંત્રની વાત કરી. તેમણે સતત આગળ વધતા રહેવા અને સેવા કાર્યમાં સતત જોડાયેલા રહેવાનો સંદેશ આપ્યો.
તેમણે પંડિત દીનદયાળ ઉપાધ્યાયના વિચારો અને ‘એકાત્મ માનવદર્શન’નો ઉલ્લેખ કરતાં સેવા ભાવનાને મહત્વપૂર્ણ ગણાવી હતી.
વાસ્તવિક ભારતને સમજવા ગામડાં સુધી પહોંચવાનો સંદેશ
વડનગર અને વારાણસી વચ્ચેની આ સેવા યાત્રા વિશાળ સેવા સંકલ્પ અભિયાનનો ભાગ છે. આ અભિયાનમાં વિવિધ રાજ્યો અને ગામડાઓ સુધી પહોંચીને સેવા, જનસંપર્ક અને સામાજિક પ્રવૃત્તિઓ સાથે જોડાવા પર ભાર મૂકવામાં આવ્યો છે.
વડાપ્રધાન મોદીએ સેવા યાત્રીઓ સાથેના સંવાદમાં લોકોની વચ્ચે રહીને તેમની જીવનશૈલી, સમસ્યાઓ અને સેવા ભાવનાને સમજવાનો સંદેશ આપ્યો. તેમના સંબોધનનો મુખ્ય ભાર એ રહ્યો કે દેશને સમજવા માટે માત્ર પુસ્તકી જ્ઞાન પૂરતું નથી, પરંતુ ભારતના ગામડાં અને લોકો સાથે સીધો સંપર્ક પણ મહત્વપૂર્ણ છે.
