જમુઈની ઘટના બાદ દિલ્હી પણ શર્મસાર, કાલકાજી મંદિર નજીક સગીરા પર સામૂહિક દુષ્કર્મ

બિહારના જમુઈમાં બનેલી ચોંકાવનારી ઘટના બાદ, દિલ્હીથી પણ એક કિસ્સો સામે આવ્યો છે જ્યાં કાલકાજી મંદિર નજીક પોલીસકર્મી હોવાનો ઢોંગ કરનારા ત્રણ શખ્સોએ ૧૭ વર્ષીય યુવતી પર સામૂહિક બળાત્કાર ગુજાર્યો હતો. પીડિતા મંદિરે દર્શન કર્યા બાદ નજીકના પાર્કમાં તેના મિત્ર સાથે સમય વિતાવી રહી હતી. ઘટનાની માહિતી મળતાં જ ત્વરિત કાર્યવાહી કરીને દિલ્હી પોલીસે મંગળવારે વહેલી સવારે થયેલા એન્કાઉન્ટર બાદ એક આરોપીની ધરપકડ કરી હતી. ધરપકડ કરાયેલ વ્યક્તિની ઓળખ આસિફ તરીકે થઈ છે. પોલીસ તપાસ ચલાવી રહી છે અને અન્ય બે આરોપીઓને શોધવાના પ્રયાસો કરી રહી છે.

 

અહેવાલો અનુસાર, ૧૭ વર્ષીય યુવતી પર સામૂહિક બળાત્કારની ઘટના સોમવારે સાંજે કાલકાજી મંદિર નજીક આવેલા આસ્થા કુંજ પાર્કમાં બની હતી. પીડિતાએ આરોપ લગાવ્યો છે કે ત્રણ યુવકોએ દિલ્હી પોલીસના કર્મચારી હોવાનો દાવો કરીને તેને અને તેના મિત્રને ધમકાવ્યા હતા અને ત્યારબાદ તેના પર સામૂહિક બળાત્કાર ગુજાર્યો હતો. પોલીસે કેસ નોંધી લીધો છે અને આરોપીઓની ઓળખ કરી લીધી છે.

 

પોલીસે જણાવ્યું હતું કે પીડિતા દક્ષિણ દિલ્હીમાં તેના પરિવાર સાથે રહે છે. સોમવારે કાલકાજી મંદિરની મુલાકાત લીધા પછી, તે અને તેનો મિત્ર સાંજે લગભગ ૭:૩૦ વાગ્યે આસ્થા કુંજ પાર્ક પહોંચ્યા હતા. આરોપ છે કે થોડીવાર પછી ત્રણ યુવકો તેમની પાસે આવ્યા અને તેમને રોક્યા. તેમણે પોતાની ઓળખ પોલીસ અધિકારી તરીકે આપી અને કાયદાકીય કાર્યવાહીની ધમકી આપી, જેનાથી બંને ગભરાઈ ગયા. કથિત રીતે, એક યુવકે યુવતીના મિત્રને કાબૂમાં રાખ્યો જ્યારે અન્ય બેએ યુવતી પર બળાત્કાર ગુજાર્યો. ઘટના બાદ ત્રણેય આરોપીઓ સ્થળ પરથી ફરાર થઈ ગયા હતા.

 

રાત્રે લગભગ ૮:૪૫ વાગ્યે ઘટનાની માહિતી મળતાં જ કાલકાજી પોલીસ ઘટનાસ્થળે પહોંચી હતી અને પીડિતાની તબીબી તપાસ કરવામાં આવી હતી. પોલીસની સંયુક્ત ટીમો હાલમાં પાર્ક અને આસપાસના વિસ્તારોના સીસીટીવી ફૂટેજની તપાસ કરી રહી છે. ઘટના સમયે આસપાસના વિસ્તારમાં સક્રિય મોબાઈલ નંબરની માહિતી પણ એકત્ર કરવામાં આવી રહી છે.