બિહાર વિધાનસભા ચૂંટણી: બીજા તબક્કા માટે પ્રચારના પડઘમ શાંત થયા, 122 બેઠકો માટે 11 નવેમ્બરે મતદાન
છેલ્લું અપડેટ : 09 Nov 2025
બિહાર વિધાનસભા ચૂંટણીના બીજા અને અંતિમ તબક્કા માટેનો પ્રચાર રવિવાર (9 નવેમ્બર) સાંજે પૂર્ણ થઈ ગયો છે. બીજા તબક્કા માટે મતદાન 11 નવેમ્બરે થશે, અને મતગણતરી 14 નવેમ્બરે થશે. આ તબક્કામાં 122 મતવિસ્તારોમાં મતદાન થશે, જ્યારે પહેલા તબક્કામાં 121 મતવિસ્તારો માટે મતદાન થયું હતું.
પ્રથમ તબક્કાનું મતદાન 6 નવેમ્બરે થયું હતું, જેમાં રેકોર્ડ 65 ટકા મતદાન થયું હતું. પ્રચારના અંતિમ દિવસે ગૃહમંત્રી અમિત શાહ, સંરક્ષણ મંત્રી રાજનાથ સિંહ અને કોંગ્રેસના વરિષ્ઠ નેતા રાહુલ ગાંધીએ તેમના પ્રચારને અંતિમ સ્વરૂપ આપ્યું હતું.
રાહુલ ગાંધીએ 15 તો PM મોદીએ 14 જાહેર સભાઓ યોજી
પૂર્વ કોંગ્રેસ પ્રમુખ રાહુલ ગાંધીએ સીમાંચલ ક્ષેત્રના કિશનગંજ અને પૂર્ણિયા જિલ્લામાં રેલીઓ યોજી હતી. રાહુલ ગાંધીએ કુલ 15 જાહેર સભાઓને સંબોધિત કરી હતી. ગૃહમંત્રી અમિત શાહે સૌથી વ્યાપક અને સઘન પ્રચાર કર્યો. તેઓ ઘણા દિવસોથી બિહારમાં કેમ્પિંગ કરી રહ્યા હતા અને 37 રેલીઓ યોજી હતી. રાજનાથ સિંહે પણ ઘણી રેલીઓ યોજી હતી. PM નરેન્દ્ર મોદીએ કુલ 14 રેલીઓ કરી અને એક રોડ શોમાં હાજર રહ્યા હતા. કોંગ્રેસના મહાસચિવ પ્રિયંકા ગાંધી વાડ્રાએ પણ પહેલીવાર બિહારમાં પ્રચાર કર્યો હતો. તેમણે 10 રેલીઓ અને એક રોડ શો યોજ્યો હતો.
ભાજપના સ્ટાર પ્રચારકોએ કર્યો પ્રચાર
ભાજપના સ્ટાર પ્રચારકોમાં પાર્ટી પ્રમુખ જે.પી. નડ્ડા, કેન્દ્રીય મંત્રીઓ નીતિન ગડકરી અને શિવરાજ સિંહ ચૌહાણ, તેમજ ઉત્તર પ્રદેશના મુખ્યમંત્રી યોગી આદિત્યનાથ, આસામના મુખ્યમંત્રી હિમંત બિસ્વા શર્મા, મધ્ય પ્રદેશના મુખ્યમંત્રી મોહન યાદવ અને અભિનેતામાંથી રાજકારણી બનેલા રવિ કિશન અને મનોજ તિવારી પણ સામેલ છે. મહારાષ્ટ્રના નાયબ મુખ્યમંત્રી એકનાથ શિંદે (શિવસેના) અને આંધ્ર પ્રદેશના મંત્રી સહિત અન્ય રાજ્યોના નેતાઓએ પણ બિહારમાં એનડીએ માટે પ્રચાર કર્યો.
બિહારની સ્થાનિક પાર્ટીઓેનો પ્રચાર
મુખ્યમંત્રી અને જેડી(યુ)ના ટોચના નેતા નીતિશ કુમારે પ્રમાણમાં શાંત પરંતુ દૃઢ નિશ્ચયી પ્રચાર કર્યો. હરીફ, તેજસ્વી યાદવે મુખ્યમંત્રી પદના ઉમેદવાર તરીકે જોરશોરથી પ્રચાર કર્યો. જન સૂરાજ પાર્ટીએ પણ પ્રશાંત કિશોરના નેતૃત્વ હેઠળ સંપૂર્ણપણે પરંપરાગત જનસંપર્ક પદ્ધતિઓ દ્વારા પ્રચાર કર્યો.
