કપડાં ખેંચી, વાળ પકડી ઢસડી.., નાઈટક્લબમાં મહિલા સાથે મારામારી, જાણો ક્યાં બની આ ઘટના?
છેલ્લું અપડેટ : 04 Oct 2026
અસમના ગુવાહાટીમાં નાઈટક્લબ (Nightclub)ની અંદર એક મહિલા સાથે ગંભીર મારપીટની ઘટના સામે આવી છે. ખાનાપારા વિસ્તારમાં આવેલા ‘ધ લોકલ્સ’ કેફે એન્ડ લાઉન્જમાં 1 ઓક્ટોબરની મોડી રાત્રે બનેલી આ ઘટનાના વીડિયો સોશિયલ મીડિયા (Social Media) પર વાયરલ થયા બાદ મામલો ચર્ચામાં આવ્યો છે. પોલીસે નાઈટક્લબના મેનેજર (Manager), ઈવેન્ટ મેનેજર, ફ્રન્ટ ઓફિસ એક્ઝિક્યુટિવ અને બાઉન્સર સહિત કુલ 7 લોકોની ધરપકડ કરી છે.
નાઈટક્લબમાં મહિલા સાથે મારપીટનો આરોપ
મળતી માહિતી મુજબ, નાઈટક્લબમાં કથિત રીતે નશાની હાલતમાં થયેલી બોલાચાલી બાદ મામલો મારપીટ સુધી પહોંચ્યો હતો. આરોપ છે કે મહિલાને પહેલા જમીન પર ધકેલી દેવામાં આવી અને ત્યારબાદ તેના કપડાં ખેંચવામાં આવ્યા. ઘટનામાં પુરુષ અને મહિલા બાઉન્સર (Bouncer) પણ સામેલ હોવાનો આરોપ છે.
પોલીસના જણાવ્યા મુજબ, CCTV ફૂટેજ (CCTV Footage)માં જોવા મળ્યું કે સવારે લગભગ 2:30 વાગ્યે કેટલાક લોકોના જૂથે મહિલા પર હુમલો કર્યો હતો. ત્યારબાદ તેના વાળ અને કપડાં ખેંચીને તેને બેઝમેન્ટ (Basement) તરફ ઢસડવામાં આવી હતી, જ્યાં ફરી તેની સાથે મારપીટ કરવામાં આવી હતી.
વાયરલ વીડિયોમાં દેખાઈ ઘટનાની ભયાનક તસવીર
ઘટના સાથે જોડાયેલા કેટલાક વીડિયો સોશિયલ મીડિયા પર વાયરલ થયા છે. એક વીડિયોમાં મહિલા જમીન પર પડેલી જોવા મળે છે અને તેની આસપાસ કેટલાક લોકો દેખાય છે. અન્ય વીડિયોમાં એક મહિલા તેને ઊભી કરવાનો પ્રયાસ કરતી જોવા મળે છે.
જોકે, વાયરલ વીડિયોની દરેક વિગતોની સ્વતંત્ર રીતે પુષ્ટિ થઈ નથી. પોલીસ હવે CCTV અને અન્ય ઉપલબ્ધ પુરાવાના આધારે સમગ્ર ઘટનાની તપાસ કરી રહી છે.
બાઉન્સર સહિત 7 લોકોની ધરપકડ
પોલીસે આ કેસમાં નાઈટક્લબ મેનેજર સહિત કુલ 7 લોકોની ધરપકડ કરી છે. ધરપકડ કરાયેલા લોકોની ઉંમર 21થી 30 વર્ષની વચ્ચે હોવાનું જણાવાયું છે. તેમાં ત્રણ મહિલાઓનો પણ સમાવેશ થાય છે.
પોલીસનું કહેવું છે કે ઘટનામાં સામેલ કેટલાક લોકો ક્લબ સાથે જોડાયેલા હતા અથવા ત્યાં કર્મચારી તરીકે કામ કરતા હતા. વધુમાં, નાઈટક્લબ મેનેજમેન્ટે ઘટના અંગે સ્થાનિક પોલીસ સ્ટેશનને જાણ કરી ન હોવાનું પણ તપાસમાં સામે આવ્યું છે.
મહિલા બાઉન્સર પર બીયરની બોટલથી હુમલાનો દાવો
પોલીસને બિલ્ડિંગમાં કામ કરતા એક સિક્યોરિટી ગાર્ડ (Security Guard) પાસેથી એવી માહિતી મળી છે કે કથિત રીતે મહિલાએ ક્લબની અંદર એક મહિલા બાઉન્સર પર બીયરની બોટલથી હુમલો કર્યો હતો. આ દાવાની પણ પોલીસ તપાસ કરી રહી છે.
પોલીસ હવે ઘટનાની શરૂઆત કેવી રીતે થઈ અને ત્યારબાદ મારપીટમાં કોણ-કોણ સામેલ હતું તેની કડી જોડવાનો પ્રયાસ કરી રહી છે.
નક્કી સમય બાદ પણ ક્લબ કેમ ખુલ્લો હતો?
આ સમગ્ર મામલામાં નાઈટક્લબના સંચાલનને લઈને પણ પોલીસ તપાસ કરી રહી છે. પોલીસના જણાવ્યા મુજબ, ક્લબનો નિર્ધારિત બંધ થવાનો સમય રાત્રે 12:30 વાગ્યાનો હતો. તેમ છતાં ઘટના સમયે ક્લબ લાંબા સમય સુધી ચાલુ કેમ રહ્યું, તેની પણ તપાસ કરવામાં આવી રહી છે.
ગુવાહાટી ઈસ્ટના DCP તબુ રામ પેગુએ જણાવ્યું કે પોલીસને ઘટનાની જાણ થયા બાદ CCTV ફૂટેજની તપાસ કરવામાં આવી હતી. ફૂટેજના આધારે હુમલાની વિગતો સામે આવી અને પોલીસે પોતે જ ઘટનાની નોંધ લઈને તપાસ શરૂ કરી હતી.
હવે પોલીસ આરોપીઓની ભૂમિકા, ક્લબ મેનેજમેન્ટની જવાબદારી અને ઘટનાની સંપૂર્ણ પરિસ્થિતિ અંગે વધુ તપાસ કરી રહી છે.
