VIDEO: 75 કિમીની ઝડપે પવન, ‘અર્નબ’ વાવાઝોડાનું લેન્ડફોલ, 10 જિલ્લામાં શાળાઓ બંધ; 22 રાજ્યોમાં ભારે વરસાદનું એલર્ટ
છેલ્લું અપડેટ : 25 Sept 2026
બંગાળની ખાડીમાં સર્જાયેલું ચક્રવાતી તોફાન ‘અર્નબ’ મોડી રાત્રે 11થી 1 વાગ્યાના સમયગાળા દરમિયાન ઉત્તર આંધ્રપ્રદેશ અને દક્ષિણ ઓડિશાના દરિયાકાંઠે ત્રાટક્યું હતું. વાવાઝોડાના લેન્ડફોલ (Landfall) દરમિયાન બંને રાજ્યોના તટીય વિસ્તારોમાં 75 કિલોમીટર પ્રતિ કલાકની ઝડપે પવન ફૂંકાયો હતો અને અનેક વિસ્તારોમાં મુસળધાર વરસાદ વરસ્યો હતો. વાવાઝોડાની અસરને પગલે ઓડિશા અને આંધ્રપ્રદેશમાં જનજીવન ખોરવાયું છે. બીજી તરફ, ભારતીય હવામાન વિભાગ (IMD)એ દિલ્હી-એનસીઆર સહિત દેશના 22 રાજ્યો અને કેન્દ્રશાસિત પ્રદેશોમાં વરસાદની આગાહી કરી છે.
22 રાજ્યોમાં ભારે વરસાદની આગાહી
ભારતીય હવામાન વિભાગ (IMD) અનુસાર, ચક્રવાતી પ્રણાલીની વ્યાપક અસરને કારણે શુક્રવારે દેશના 22 રાજ્યો અને કેન્દ્રશાસિત પ્રદેશોમાં વરસાદની સંભાવના છે. ઓડિશા, છત્તીસગઢ, મધ્યપ્રદેશ, મહારાષ્ટ્ર, પશ્ચિમ બંગાળ, સિક્કિમ, ઉત્તરાખંડ, ઉત્તર પ્રદેશ, બિહાર, ઝારખંડ, આંધ્રપ્રદેશ અને તેલંગાણામાં ભારેથી અતિ ભારે વરસાદ (Extremely Heavy Rainfall) પડી શકે છે.
આ ઉપરાંત દિલ્હી-એનસીઆર, કર્ણાટક, પૂર્વોત્તર રાજ્યો, અંદમાન-નિકોબાર અને કેરળમાં હળવાથી મધ્યમ વરસાદ સાથે કેટલાક વિસ્તારોમાં વાવાઝોડાની સ્થિતિ સર્જાવાની શક્યતા છે. હવામાન વિભાગે લોકોને સ્થાનિક વહીવટીતંત્રની સૂચનાઓનું પાલન કરવાની સલાહ આપી છે.
ઓડિશાના 10 જિલ્લામાં શાળાઓ બંધ
ચક્રવાત ‘અર્નબ’ના લેન્ડફોલ બાદ દક્ષિણ ઓડિશાના 10 જિલ્લાઓમાં સાવચેતીના પગલાં તરીકે તમામ શાળાઓ બંધ રાખવાનો નિર્ણય લેવામાં આવ્યો છે. ભારે વરસાદ અને પવનની સ્થિતિને ધ્યાનમાં રાખીને આશરે 5,000 લોકોને સુરક્ષિત સ્થળોએ ખસેડવામાં આવ્યા છે. વહીવટીતંત્ર દ્વારા અસરગ્રસ્ત વિસ્તારોમાં રાહત અને બચાવ કામગીરી (Rescue Operation) માટે જરૂરી વ્યવસ્થા કરવામાં આવી રહી છે.
મલકાનગિરી જિલ્લામાં ભારે વરસાદના કારણે ચાર મહત્વપૂર્ણ પુલ પાણીમાં ગરકાવ થઈ ગયા છે. તેના કારણે અનેક માર્ગો પર વાહનવ્યવહાર ઠપ થઈ ગયો છે. સ્થિતિને ધ્યાનમાં રાખીને રાષ્ટ્રીય ધોરીમાર્ગ (National Highway) પર પણ વાહનવ્યવહાર બંધ કરવાની ફરજ પડી છે.
માછીમારોની બોટને ભારે નુકસાન
ચક્રવાતના કારણે ઓડિશાના ભદ્રક અને ચિલિકા સરોવર આસપાસના વિસ્તારોમાં પણ ભારે અસર જોવા મળી છે. તીવ્ર પવનને કારણે માછીમારોની 10થી વધુ બોટ ડૂબી ગઈ હોવાનું સામે આવ્યું છે. અનેક નાવોને પણ નુકસાન થયું છે. દરિયાકાંઠાના વિસ્તારોમાં રહેતા લોકોને સાવચેતી રાખવા અને જોખમી વિસ્તારોમાં ન જવા માટે સૂચના આપવામાં આવી છે.
નબરંગપુરમાં રેડ એલર્ટ, અનેક જિલ્લામાં ઓરેન્જ એલર્ટ
હવામાન વિભાગે ઓડિશાના નબરંગપુર જિલ્લામાં રેડ એલર્ટ (Red Alert) જાહેર કર્યું છે. અહીં 20 સેન્ટીમીટરથી વધુ અતિ ભારે વરસાદ પડવાની શક્યતા વ્યક્ત કરવામાં આવી છે. ભારે વરસાદના કારણે નીચાણવાળા વિસ્તારોમાં પાણી ભરાવાની તેમજ નદીઓ અને નાળાઓમાં પાણીનું સ્તર વધવાની સંભાવના છે.
આ ઉપરાંત બરગઢ, નુઆપાડા, બલાંગીર, કાલાહાંડી, કોરાપુટ અને મલકાનગિરી જિલ્લામાં ઓરેન્જ એલર્ટ (Orange Alert) જાહેર કરવામાં આવ્યું છે. આ વિસ્તારોમાં ભારે વરસાદ સાથે પવનની ઝડપ વધવાની પણ શક્યતા છે.
આંધ્રપ્રદેશમાં પણ ભારે પવન અને વરસાદ
ચક્રવાતની અસરથી આંધ્રપ્રદેશના શ્રીકાકુલમ જિલ્લામાં 75 કિલોમીટર પ્રતિ કલાકની ઝડપે પવન ફૂંકાયો હતો. ભારે પવનને કારણે અનેક વિસ્તારોમાં નુકસાનની સ્થિતિ સર્જાઈ છે. વિજયવાડાના નીચાણવાળા વિસ્તારોમાં પાણી ભરાઈ જતાં શાળાઓમાં રજા જાહેર કરવામાં આવી છે.
દરિયાકાંઠે સ્થિતિને ધ્યાનમાં રાખીને માછીમારોને સમુદ્રમાં ન જવાની કડક સૂચના આપવામાં આવી છે. વહીવટીતંત્ર દ્વારા દરિયાકાંઠાના વિસ્તારો પર નજર રાખવામાં આવી રહી છે.
પશ્ચિમ બંગાળમાં પણ વરસાદની ચેતવણી
‘અર્નબ’ વાવાઝોડાની અસર માત્ર ઓડિશા અને આંધ્રપ્રદેશ સુધી મર્યાદિત રહેવાની નથી. પશ્ચિમ બંગાળના કેટલાક વિસ્તારો ઉપરાંત દાર્જિલિંગ અને કાલિમ્પોંગમાં પણ ભારે વરસાદ અને વાવાઝોડાની ચેતવણી આપવામાં આવી છે. આગામી કલાકો દરમિયાન હવામાનની સ્થિતિને ધ્યાનમાં રાખીને સ્થાનિક તંત્ર દ્વારા જરૂરી પગલાં લેવામાં આવી રહ્યા છે.
હવામાન વિભાગની આગાહી મુજબ ચક્રવાતની અસરને કારણે અનેક રાજ્યોમાં વરસાદી પ્રવૃત્તિ વધવાની શક્યતા છે. ખાસ કરીને દરિયાકાંઠા અને નીચાણવાળા વિસ્તારોમાં લોકોને સાવચેતી રાખવા તથા વહીવટીતંત્રની સૂચનાઓનું પાલન કરવા જણાવાયું છે.
