VIDEO: Accident: ૧૦૦ની સ્પીડે જતી સ્કોર્પિયો ઊભેલા ટ્રકમાં ઘૂસી, ૨ માસૂમ બાળકો સહિત ૩ના મોત, ૯ ગંભીર
છેલ્લું અપડેટ : 13 Jul 2026
કાનપુર: ઉત્તર પ્રદેશના કાનપુરમાં સોમવારે વહેલી સવારે એક કાળજું કંપાવી દેનારો માર્ગ અકસ્માત (Road Accident) સર્જાયો છે. હરિયાણાથી બિહાર જઈ રહેલા એક જ પરિવારની ખુશીઓ પળવારમાં માતમમાં ફેરવાઈ ગઈ હતી. કાનપુર-પ્રયાગરાજ નેશનલ હાઈવે પર (National Highway) પુરપાટ ઝડપે જતી એક સ્કોર્પિયો (Scorpio) કાર રોડ કિનારે ઉભેલી ટ્રક પાછળ ધડાકાભેર ઘૂસી ગઈ હતી. અકસ્માત એટલો ભયાનક હતો કે કારનો આગળનો ભાગ સંપૂર્ણપણે કચડાઈ ગયો હતો અને તેની છત ઉખડી ગઈ હતી. આ દુર્ઘટનામાં બે માસૂમ બાળકો સહિત ત્રણ લોકોના ઘટનાસ્થળે જ કમકમાટીભર્યા મોત નીપજ્યા છે, જ્યારે નવ લોકો ગંભીર રીતે ઘાયલ (Injured) થયા છે.
૧૦૦ કિમીથી વધુની સ્પીડ અને ગેસ કટરથી રેસ્ક્યુ
પોલીસના જણાવ્યા અનુસાર, અકસ્માત સમયે સ્કોર્પિયોની સ્પીડ (Speed) આશરે ૧૦૦ કિલોમીટર પ્રતિ કલાક કે તેથી વધુ હોવાનો અંદાજ છે. અકસ્માતનો અવાજ એટલો તીવ્ર હતો કે આસપાસના લોકો દોડી આવ્યા હતા. કારમાં ફસાયેલા લોકોને બહાર કાઢવા માટે પોલીસ અને સ્થાનિકોએ ગેસ કટરની (Gas Cutter) મદદ લેવી પડી હતી. લાંબા રેસ્ક્યુ ઓપરેશન (Rescue Operation) બાદ તમામ ઘાયલોને બહાર કાઢીને તાત્કાલિક હોસ્પિટલમાં દાખલ કરવામાં આવ્યા છે.
હરિયાણાથી બિહાર જઈ રહ્યો હતો પરિવાર
સ્કોર્પિયો કારમાં કુલ ૧૨ લોકો સવાર હતા, જેઓ હરિયાણાના સિરસાથી બિહારના ગયા તરફ જઈ રહ્યા હતા. પ્રાથમિક તપાસમાં (Preliminary Investigation) સામે આવ્યું છે કે ડ્રાઈવરે સ્ટેયરીંગ પરથી કાબૂ ગુમાવતા કાર સર્વિસ લેનમાં (Service Lane) ઉભેલી ટ્રક સાથે અથડાઈ હતી. અકસ્માત બાદ ટ્રક ચાલક વાહન લઈને ભાગી છૂટ્યો હતો, પરંતુ પોલીસે ૧૩ કિલોમીટર સુધી પીછો કરીને તેને ઝડપી પાડ્યો હતો.
વહીવટી તંત્ર એલર્ટ, કલેક્ટરે લીધી મુલાકાત
આ ભીષણ અકસ્માતની જાણ થતાં જ કાનપુરના જિલ્લા મેજિસ્ટ્રેટ (District Magistrate - DM) જીતેન્દ્ર પ્રતાપ સિંહ તાત્કાલિક હોસ્પિટલ પહોંચ્યા હતા. તેમણે તમામ ઘાયલોની મુલાકાત લઈ તેમના ખબર-અંતર પૂછ્યા હતા અને તબીબોને શ્રેષ્ઠ અને યોગ્ય સારવાર (Medical Treatment) સુનિશ્ચિત કરવાના કડક નિર્દેશ આપ્યા છે. પોલીસે હાલમાં અકસ્માતનો ગુનો નોંધીને વધુ તપાસ (Investigation) હાથ ધરી છે.
