'INDIA' ગઠબંધન સાથે AAP એ તોડ્યો નાતો, સંસદમાં વિપક્ષનો અવાજ નબળો પડશે?
છેલ્લું અપડેટ : 18 Jul 2025
લોકસભા ચૂંટણી 2024 માં ભાજપને બહુમતીથી દૂર રાખનાર વિપક્ષના ગઠબંધન 'INDIA'માં તિરાડ પડતી જોવા મળી રહી છે. આમ આદમી પાર્ટી (AAP) 2024 ની લોકસભા ચૂંટણી પછી આ ગઠબંધનથી પહેલેથી દૂર હતી. હવે હવે સંસદના ચોમાસુ સત્ર પહેલા આ ગઠબંધન સાથેના તેના બધા સંબંધો સંપૂર્ણપણે તોડી નાખ્યા છે. આમ આદમી પાર્ટીના આ રાજકીય પગલાથી સંસદમાં વિપક્ષનો સંયુક્ત અવાજ નબળો પડવાની ધારણા છે.
ચોમાસુ સત્ર અને વિપક્ષની રણનીતિ
સંસદનું ચોમાસુ સત્ર 21 જુલાઈ 2025 થી શરૂ થશે અને 21 ઓગસ્ટ સુધી ચાલશે. ગૃહમાં મોદી સરકારને ઘેરવાની રણનીતિ તૈયાર કરવા માટે ઈન્ડિયા ગઠબંધન દ્વારા શુક્રવારે સાંજે ઓનલાઈન બેઠક બોલાવી હતી. શનિવારે દિલ્હીમાં કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને ગઠબંધનની બેઠક બોલાવવામાં આવી છે, જેમાં AAP ભાગ લેશે નહીં. આ રીતે AAP એ ઇન્ડિયા એલાયન્સ સાથેના સંબંધો સંપૂર્ણપણે તોડી નાખ્યા છે.
ઇન્ડિયા એલાયન્સથી AAP અલગ થયું
AAP સાંસદ સંજય સિંહે સ્પષ્ટ કર્યું કે, તેમનો પક્ષ ઇન્ડિયા એલાયન્સની બેઠકોમાં ભાગ લેશે નહીં. અમારી પાર્ટી અને અરવિંદ કેજરીવાલ પહેલાથી જ સ્પષ્ટ કરી ચૂક્યા છે કે અમે ઇન્ડિયા એલાયન્સથી બહાર છીએ. સંજય સિંહે એમ પણ કહ્યું કે AAP સંસદીય મુદ્દાઓ પર TMC અને DMK જેવા વિપક્ષી પક્ષો સાથે સંકલન જાળવી રાખી તેમને સમર્થન આપશે, કારણ કે આ પક્ષો AAP ને સમર્થન આપે છે.
સંજયસિંહે કર્યું કે, ઈન્ડિયા ગઠબંધન માત્ર લોકસભા ચૂંટણી માટે હતું. આ પછી આમ આદમી પાર્ટીએ હરિયાણા અને દિલ્હી વિધાનસભા ચૂંટણી સાથે પંજાબ અને ગુજરાત પેટાચૂંટણીમાં એકલા ઝંપલાવ્યું હતું. આમ આદમી પાર્ટીએ પહેલેથી જ ઈન્ડિયા ગઠબંધનથી છેડો ફાડી નાંખ્યો છે. હવે સંસદમાં વિપક્ષી એકતાથી પણ અલગ થઈ ગઈ છે.
AAPનું ઈન્ડિયા ગઠબંધનમાં હકિકતે કોંગ્રેસ સાથે મતભેદ છે. દિલ્હી સહિતના રાજ્યોમાં ચૂંટણીમાં કોંગ્રેસ સાથે હરિફાઈ રહી. જોકે આપને સપા, ટીએમસી અને ડીએમકે જેવા સાથી દળો સાથે સારો તાલમેલ છે. પરંતુ કોંગ્રેસ સાથેના સંબંધો સતત બગડતા રહ્યા છે. જણાવી દઈએ કે આપ પાસે 8 રાજ્યસભા સાંસદ અને 3 લોકસભા સાંસદ છે. જે સંસદમાં તેમનું મહત્ત્વ દર્શાવે છે. આપ અલગ થતાં વિપક્ષી એકતાને ઝટકો લાગી શકે છે.
શું વિપક્ષનો અવાજ નબળો પડશે?
૨૦૨૪ની લોકસભા ચૂંટણી પછી AAP એ ભારત ગઠબંધનથી અંતર બનાવી રાખ્યું હતું પરંતુ સંસદથી લઈને રસ્તાઓ પર વિપક્ષ સાથે મળીને મોદી સરકારની નીતિઓનો વિરોધ કરી રહી છે. AAPના રાજ્યસભા સાંસદ સંજય સિંહ સંસદમાં સરકારની નીતિઓ વિરુદ્ધ મુદ્દાઓ રાખતા હતા. તેઓ વિપક્ષના એક શક્તિશાળી અવાજ છે પરંતુ ચોમાસુ સત્રમાં AAP ના ગઠબંધનથી અલગ થતાં વિપક્ષની સંયુક્ત રણનીતિમાં તિરાડ પડવાની શક્યતા છે.
INDIA ગઠબંધનની બધી પાર્ટીઓ પહેલેથી પોતાના રસ્તે ચાલી રહી છે. મહારાષ્ટ્ર વિધાનસભા ચૂંટણી પછી શિવસેના (ઉદ્ધવ ઠાકરે) અને કોંગ્રેસ વચ્ચે પણ ખેંચતાણ જોવા મળી છે. ઉદ્ધવ ઠાકરેની દિલ્હી મુલાકાતની ચર્ચા છે, પરંતુ તે સ્પષ્ટ નથી કે તેઓ ગઠબંધનની બેઠકમાં હાજરી આપશે કે નહીં. હવે વિપક્ષી એકતા તૂટી રહી હોય તેવું લાગે છે.
