કુરકુરે આપવાની લાલચ આપી 4 વર્ષની માસૂમ પર હેવાનિયત, 59 વર્ષીય CRPF જવાન જેલહવાલે
છેલ્લું અપડેટ : 17 Aug 2026
મધ્ય પ્રદેશના સીધી જિલ્લામાંથી માનવતાને કલંકિત કરતી અત્યંત આઘાતજનક ઘટના સામે આવી છે. સીધી જિલ્લાના મઝૌલી પોલીસ સ્ટેશન વિસ્તારમાં રહેતા CRPFના 59 વર્ષીય જવાને પડોશમાં જ રહેતી માત્ર 4 વર્ષની માસૂમ બાળકી સાથે દુષ્કર્મ આચર્યું છે. આ હૃદયદ્રાવક ઘટનાની માહિતી બહાર આવતાં જ સમગ્ર વિસ્તારમાં ભારે ચકચાર મચી ગઈ છે અને સ્થાનિક લોકોમાં ભારે રોષ જોવા મળી રહ્યો છે. પોલીસે ફરિયાદના આધારે આરોપી વિરુદ્ધ POCSO એક્ટ સહિતની ગંભીર કલમો હેઠળ ગુનો નોંધી તેની ધરપકડ કરી લીધી છે.
કુરકુરે આપવાના બહાને બોલાવી આચરી હેવાનિયત
પોલીસ તપાસમાં સામે આવેલી વિગતો અનુસાર, આ શરમજનક ઘટના 14 August 2026ની રાત્રે બની હતી. 4 વર્ષની માસૂમ બાળકી રાત્રિના સમયે પોતાના ઘરની બહાર ગઈ હતી, પરંતુ લાંબા સમય સુધી તે પરત ફરી નહોતી. બાળકી ઘરમાં ન દેખાતાં પરિવારજનોએ તાત્કાલિક તેની શોધખોળ શરૂ કરી હતી. થોડા સમય બાદ બાળકી રડતી-રડતી ઘરે પહોંચી હતી. પરિવારજનોએ રડવાનું કારણ પૂછતાં માસૂમે પોતાની માતા સમક્ષ સમગ્ર આપવીતી વર્ણવી હતી.
બાળકીએ જણાવ્યું હતું કે, પડોશમાં જ રહેતા આરોપીએ તેને કુરકુરે ખાવા આપવાના બહાને બોલાવી હતી અને ત્યારબાદ તેની સાથે શારીરિક દુષ્કર્મ આચર્યું હતું.
માતાએ નોંધાવી ફરિયાદ, આરોપી જેલહવાલે
ઘટનાની ગંભીરતાને ધ્યાને રાખી બાળકીના પરિવારજનો તાત્કાલિક પોલીસ સ્ટેશન પહોંચ્યા હતા. પીડિત બાળકીની માતાએ 15 Augustના રોજ મઝૌલી પોલીસ સ્ટેશનમાં લેખિત ફરિયાદ નોંધાવી હતી. પોલીસે તાત્કાલિક ગુનો દાખલ કરી તપાસના આધારે ઉપલબ્ધ પુરાવાઓને આધારે આરોપીની ધરપકડ કરી લીધી હતી. રવિવારે આરોપીને સ્થાનિક કોર્ટમાં રજૂ કરવામાં આવ્યો હતો, જ્યાં કોર્ટના આદેશ બાદ તેને સીધી જિલ્લા જેલ હવાલે કરવામાં આવ્યો છે.
20 દિવસની રજા પર આવ્યો હતો, આવતા વર્ષે થવાનો હતો નિવૃત્ત
પોલીસના જણાવ્યા અનુસાર, આરોપીની ઉંમર 59 વર્ષ છે અને તે સેન્ટ્રલ રિઝર્વ પોલીસ ફોર્સ (CRPF)માં ફરજ બજાવે છે. હાલમાં તેનું પોસ્ટિંગ જમ્મુ-કાશ્મીરમાં હતું અને તે 20 દિવસની રજા લઈને પોતાના વતન ઘરે આવ્યો હતો. આ રજાઓ દરમિયાન જ તેણે આ નરાધમ કૃત્ય આચર્યું હતું. વધુમાં મળતી માહિતી મુજબ, આરોપી આવતા વર્ષે પોતાની સર્વિસ પૂર્ણ કરીને નિવૃત્ત થવાનો હતો. રક્ષકની ભૂમિકામાં રહેલા જવાનના આવા વિકૃત કૃત્યથી સમગ્ર વિસ્તારમાં લોકો ફિટકાર વરસાવી રહ્યા છે અને આરોપીને કડકમાં કડક સજા થાય તેવી માગ કરી રહ્યા છે.
