VIDEO: Valsad / ધરમપુરના રાજપુરી જંગલ વિસ્તારમાં જીવના જોખમે સ્ટંટ કરતા યુવાનોનો વીડિયો વાયરલ
છેલ્લું અપડેટ : 30 Mar 2026
વલસાડ જિલ્લાના ધરમપુર તાલુકામાં આવેલા કુદરતી સૌંદર્યથી ભરપૂર રાજપુરી જંગલ વિસ્તારના જાહેર રસ્તાઓ અત્યારે જોખમી સ્ટંટબાજોનો અડ્ડો બની રહ્યા હોય તેમ લાગી રહ્યું છે. તાજેતરમાં આ વિસ્તારના મુખ્ય માર્ગ પર જીવના જોખમે બાઇક સ્ટંટ કરતા યુવાનોનો વીડિયો સોશિયલ મીડિયામાં વાયરલ થતા ચકચાર મચી ગઈ છે.
રાજપુરી જંગલ વિસ્તારનો આ રસ્તો વળાંકવાળો અને સાંકડો હોવા છતાં, આ યુવાનો અન્ય વાહનચાલકો કે પોતાના જીવની પરવા કર્યા વગર પૂરઝડપે સ્ટંટ કરી રહ્યા છે. સોશિયલ મીડિયામાં 'રીલ્સ' બનાવવાની ઘેલછામાં આ યુવાનો કાયદાના લીરેલીરા ઉડાડતા જોવા મળી રહ્યા છે. આ પ્રકારના જોખમી સ્ટંટ માત્ર સ્ટંટ કરનાર યુવાનો માટે જ નહીં, પરંતુ રસ્તા પરથી પસાર થતા અન્ય નિર્દોષ મુસાફરો માટે પણ જીવલેણ સાબિત થઈ શકે છે. પહાડી વિસ્તાર હોવાથી અહીં અવારનવાર નાના-મોટા અકસ્માતો થતા રહે છે, ત્યારે આ પ્રકારે જાહેર રસ્તા પર થતી જોખમી પ્રવૃત્તિઓ કોઈ મોટી હોનારતને આમંત્રણ આપી રહી છે. જો કે GSTV આ વાયરલ વીડિયોની પુષ્ટિ નથી કરતું.
