VIDEO: સુરત / કામરેજના હલધરુ ગામે ઝાડા-ઉલ્ટીના કારણે 13 વર્ષના કિશોરનું મોત નિપજ્યું
છેલ્લું અપડેટ : 07 May 2026
સુરત શહેરમાં રોગચાળાના કહેર બાદ હવે સુરત ગ્રામ્ય વિસ્તારમાં પણ તેની એન્ટ્રી થતા તંત્રની ચિંતામાં વધારો થયો છે, જેમાં કામરેજના હલધરુ ગામે ઝાડા-ઉલ્ટીના કારણે એક વિદ્યાર્થીનું કરુણ મોત નિપજ્યું છે. હલધરુ ગામે રહેતા એક પરપ્રાંતિય પરિવારના 13 વર્ષીય પુત્ર હર્ષ આશિષ મિશ્રાને છેલ્લા બે-ત્રણ દિવસથી તાવ આવી રહ્યો હતો, જે દરમિયાન અચાનક ઝાડા-ઉલ્ટી શરૂ થઈ જતા તેને તાત્કાલિક સારવાર અર્થે હોસ્પિટલ ખસેડવામાં આવ્યો હતો. કમનસીબે, હોસ્પિટલમાં ટૂંકી સારવાર દરમિયાન આ કિશોરે દમ તોડી દીધો હતો, જેના કારણે પરિવારમાં શોકનું મોજું ફરી વળ્યું છે. આ સમગ્ર ઘટનાની જાણ કામરેજ પોલીસને કરવામાં આવી છે અને પોલીસે જરૂરી કાર્યવાહી હાથ ધરી છે. બીજી તરફ, ગ્રામ્ય વિસ્તારોમાં ઝાડા-ઉલ્ટી અને તાવના કેસોમાં થઈ રહેલા વધારાને પગલે આરોગ્ય તંત્ર એલર્ટ મોડ પર આવી ગયું છે અને રોગચાળાને નિયંત્રિત કરવા માટે દોડતું થયું છે. ગંદકી અને દૂષિત પાણીના કારણે આ રોગચાળો ફેલાયો હોવાની આશંકા વચ્ચે સ્થાનિકોમાં પણ ભારે ફફડાટ જોવા મળી રહ્યો છે.
