Surat news: કચરા કૌભાંડ વચ્ચે SMCના ડે.કમિશનરનું રાજીનામું, શું છે સમગ્ર મામલો?
છેલ્લું અપડેટ : 13 Feb 2026
સુરત મહાનગરપાલિકાના કચરાનો બારોબાર નિકાલ કરી પાલિકામાં મસ મોટું કચરા કૌભાંડ બહાર આવ્યું છે. જેમાં એકાઉન્ટ-ઓડિટ વિભાગની પણ જવાબદારી હોવાનો વિપક્ષે આક્ષેપ કર્યો છે. તેવામાં મ.ન.પા.ના ડેપ્યુટી કમિશનર સ્વાતિ દેસાઈએ રાજીનામું આપ્યું હોવાની વાત સામે આવી છે. સ્વાતિ દેસાઈ એકાઉન્ટ વિભાગના વડા હોવાથી તેમની સામે વિપક્ષે કચરા કૌભાંડની જવાબદારીનો આક્ષેપ કરતો પત્ર કમિશનરને લખ્યો છે. જેમાં વિપક્ષે સોલિડ વેસ્ટ મેનેજમેન્ટ વિભાગ, એન્વાયરમેન્ટ વિભાગ અને એકાઉન્ટ વિભાગના ઉચ્ચ અધિકારીઓ વિરુદ્ધ તપાસ બેસાડીને સમિતિમાંથી દૂર કરવાની માંગણી કરી છે.
સુરત પાલિકામાં ચેપ્ટર પ્રોવાઈઝોથી ડેપ્યુટી કમિશનર બનેલા સ્વાતિ દેસાઈએ રાજીનામું મુક્યું છે, ત્યારે પાલિકાના વિપક્ષી નેતા પાયલ સાકરીયાએ ગંભીર આક્ષેપ કર્યા છે. પાયલ સાકરીયાએ આક્ષેપ કર્યા છે કે, ઇજારદાર સી.ડી. ટ્રાન્સપોર્ટ દ્વારા કચરાનો યોગ્ય નિકાલ કરવાને બદલે ગેરકાયદે રીતે અંતરિયાળ ગામોમાં તેનું વેચાણ કરીને કરોડોની આવક મેળવવામાં આવી રહી છે. તેમજ કચરાના નિકાલ વગર જ એજન્સી દ્વારા ખોટા બિલ રજૂ કરીને પાલિકાની તિજોરી પર કરોડો રૂપિયાનો બોજો નાખવામાં આવી રહ્યો છે, જેમાં એકાઉન્ટ અને ઓડિટ વિભાગની પણ જવાબદારી છે.
વધુમાં તેમણે જણાવ્યું કે, ખજોદ ડિસ્પોઝલ સાઈટ ખાતેના કચરાના નિકાલ વગર રજૂ થયેલા બીલો તેમજ તેના ઓડિટ તથા સ્થળ પર કાર્યવાહી વગર થયેલી ચૂકવણી બદલ જવાબદારી નક્કી કરવા માંગણી કરી છે. સોલિડ વેસ્ટ મેનેજમેન્ટ વિભાગ, એન્વાયરમેન્ટ વિભાગ અને એકાઉન્ટ વિભાગના ઉચ્ચ અધિકારીઓ સામે તપાસ બેસાડવાની પણ માંગણી કરી છે. પાલિકાના વિપક્ષી નેતા કહ્યું કે, આ તમામ અધિકારીઓને તાત્કાલિક ફરજ મોકૂફ કરીને તેમની સંપત્તિની તપાસ કરવામાં આવે. સાથે જ ઇજારદાર સી.ડી. ટ્રાન્સપોર્ટને બ્લેકલિસ્ટ કરી તેની ડિપોઝિટ જપ્ત કરવા અને બાકી નીકળતી રકમ અટકાવવાની પ્રક્રિયા સાત દિવસમાં પૂર્ણ કરવા કમિશનરને માંગણી કરી છે.
કચરા કૌભાંડ મામલે એજન્સીને બ્લેક લિસ્ટ કરવાની વિપક્ષની માંગણી
સુરત પાલિકાનો કચરાનો બારોબાર નિકાલ કરી પાલિકામાં મસ મોટુ કચરા કૌભાંડ બહાર આવ્યા બાદ વિપક્ષે એજન્સીને બ્લેક લિસ્ટ કરવા સાથે બિલ અટકાવવા માટે માંગણી કરી છે તો બીજી તરફ કેટલાક એજન્ટો રાજકીય વગનો ઉપયોગ કરીને બિલ મંજુર કરાવવા માટે ફરતા થઈ ગયાં છે.
શું છે સમગ્ર મામલો?
સુરત પાલિકામાં 213 કરોડના કોન્ટ્રાક્ટમાં પાલિકાની સાઈટના બદલે જિલ્લાના ગામડામાં કચરો ઠાલવવામાં આવતા હોવાનું મસમોટું કૌભાંડ બહાર આવ્યું હતું. ખજોદ વેસ્ટ ડિસ્પોઝલ સાઇટ પર કચરાના યોગ્ય નિકાલ માટેના 213 કરોડના પ્રોજેક્ટમાં સી.ડી.ટ્રાન્સપોર્ટેશન એજન્સીની મસમોટી ગડબડી છતાં 107 કરોડની ચૂકવણી કરાઈ હોવાનું બહાર આવ્યું છે. આ કૌભાંડ બાદ પાલિકાને વિપક્ષે એજન્સીને બ્લેક લિસ્ટ કરવા માટે મ્યુનિ. કમિશનરને નોંધ મુકી છે અને બાકી પૈસા અટકાવવા માટેની માંગણી કરી છે.
તો બીજી તરફ કચરા કૌભાંડ કરનારાઓના એજન્ટ જેઓ રાજકીય વગ વાપરીને પાલિકા પર કૌભાંડ઼ી એજન્સીના બાકી બિલ કઢાવવા માટે પ્રયાસ કરી રહ્યાં છે. આવા તકસાધુ પાલિકાનો કચરો કોણ ઊંચકશે તેવી વાત કરીને અધિકારીઓને દબાણ કરતા હોવાની વાત પણ બહાર આવી છે. ત્યારે પાલિકા આવા એજન્ટો થકી બિલ મંજૂર કરાવશે કે કૌભાંડી કોન્ટ્રાક્ટર અને અધિકારીઓ સામે પગલાં ભરશે તે તો આવનારો સમય જ બતાવશે.
