Rajkot/ કડકડતી ઠંડીમાં, બાવળની ઝાડીઓમાંથી મળી આવી તરછોડાયેલી નવજાત બાળકી
છેલ્લું અપડેટ : 25 Jan 2026
સૌરાષ્ટ્રમાં અત્યારે હાડ થીજવતી ઠંડી પડી રહી છે, ત્યારે રાજકોટ જિલ્લાના સાણથલી ગામેથી એક કમકમાટીભરી ઘટના પ્રકાશમાં આવી છે. કોઈ પાષાણ હૃદયના માતા-પિતાએ પોતાની નવજાત બાળકીને મધરાતે રસ્તાની બાજુમાં આવેલી બાવળની ઝાડીઓમાં ફેંકી દીધી હતી. કુદરતની કરામત જુઓ કે આટલી ઠંડી અને ઝેરી જીવજંતુઓ વચ્ચે પણ બાળકીનો જીવ બચી ગયો છે.
શું છે સમગ્ર ઘટના?
રાજકોટના સાણથલી ગામના વાસાવડ રોડ નજીકથી આ નવજાત બાળકી મળી આવી હતી. મળતી માહિતી મુજબ, વહેલી સવારે જ્યારે વાતાવરણમાં ભારે ઠંડી હતી, ત્યારે આ વિસ્તારમાંથી પસાર થતા સ્થાનિક લોકોને બાળકીના રડવાનો અવાજ સંભળાયો હતો. અવાજની દિશામાં જઈને જોતા લોકોની આંખો ભીની થઈ ગઈ હતી. એક ફૂલ જેવી માસૂમ બાળકી કાંટાળા બાવળની જાળીઓ વચ્ચે પડી રહી હતી.
જીવજંતુ કરડ્યા, છતાં માસૂમનો જંગ ચાલુ
બાળકી જ્યારે મળી આવી ત્યારે તેની હાલત અત્યંત ગંભીર હતી. ખુલ્લામાં અને ઝાડીઓમાં હોવાને કારણે માસૂમ બાળકીને પગના ભાગે કોઈ ઝેરી જીવજંતુ પણ કરડ્યું હોવાનું જણાયું હતું. ઠંડીને કારણે બાળકીનું શરીર ભૂરૂં પડી ગયું હતું, પરંતુ તેના રડવાના અવાજે લોકોનું ધ્યાન ખેંચ્યું અને સમયસર તેની મદદ થઈ શકી.
તાત્કાલિક સારવાર અને હોસ્પિટલ ખસેડાઈ
સ્થાનિક લોકોએ માનવતા દાખવી તુરંત જ પોલીસ અને 108 એમ્બ્યુલન્સને જાણ કરી હતી. એમ્બ્યુલન્સની ટીમે ઘટનાસ્થળે પહોંચી બાળકીને પ્રાથમિક સારવાર આપી હતી. બાળકીની નાજુક હાલતને જોતા તેને વધુ સારવાર માટે તાત્કાલિક રાજકોટની જનાના હોસ્પિટલ ખાતે ખસેડવામાં આવી છે. હાલમાં તબીબોની ટીમ બાળકીના સ્વાસ્થ્ય પર દેખરેખ રાખી રહી છે.
પોલીસ તપાસ તેજ: કોણ છે આ કળિયુગી માતા-પિતા?
આ ઘટના બાદ સ્થાનિક પોલીસ પણ એક્શનમાં આવી છે. નવજાત બાળકીને આ રીતે બાવળની ઝાડીઓમાં તરછોડી જનાર શખ્સો કોણ હતા તેની તપાસ શરૂ કરવામાં આવી છે. વાસાવડ રોડ પર લાગેલા CCTV કેમેરાની તપાસ કરવામાં આવી રહી છે. આસપાસના ગામોના આરોગ્ય કેન્દ્રો અને હોસ્પિટલોમાં તાજેતરમાં થયેલી પ્રસૂતિઓની વિગતો મેળવવામાં આવી રહી છે.
માનવતા સામે સવાલ
જ્યાં એક તરફ લોકો સંતાન સુખ માટે વલખાં મારતા હોય છે, ત્યાં બીજી તરફ દીકરી હોવાને કારણે કે પછી સામાજિક બદનામીના ડરથી કોઈ માસૂમને આ રીતે મરવા માટે છોડી દેવું એ સમાજ માટે લાલબત્તી સમાન કિસ્સો છે. સદનસીબે, સમયસર લોકોની નજર પડતા આ 'લકી' બાળકીનો જીવ બચી ગયો છે.
