Video/ વેરાવળ નજીક અરબી સમુદ્રમાં ફિશિંગ બોટની જળસમાધિ, એક માછીમારનું ડૂબી જવાથી કરુણ મોત
છેલ્લું અપડેટ : 05 Dec 2025
ગીર સોમનાથ જિલ્લાના વેરાવળ નજીક અરબી સમુદ્રમાં એક ફિશિંગ બોટ દુર્ઘટનાગ્રસ્ત થતાં તેણે જળસમાધિ લીધી હતી. આ બનાવમાં બોટમાં સવાર પાંચ ખલાસીઓ પૈકી એક માછીમારનું ડૂબી જવાથી કરુણ મૃત્યુ થયું છે, જ્યારે અન્ય ચાર ખલાસીઓનો આબાદ બચાવ થયો છે.
ફિશિંગ જાળ પરત લેતી વખતે બની દુર્ઘટના
આ ઘટના ગઈકાલે ગુરુવારે સાંજે લગભગ 7.30 વાગ્યાના સુમારે વેરાવળથી માત્ર 2 નોટિકલ માઈલ દૂર દરિયામાં બની હતી. પ્રાથમિક માહિતી મુજબ, બોટમાં સવાર ખલાસીઓ માછીમારી માટે નાખેલી ફિશિંગ જાળ પરત લઈ રહ્યા હતા, તે સમયે કોઈ કારણોસર બોટ અચાનક પલટી મારી ગઈ અથવા પાણીમાં ડૂબવા લાગી હતી.
આ દુર્ઘટનામાં અરવિંદ ભારાવાલા નામના માછીમારનું ડૂબી જવાથી મૃત્યુ થયું હતું. જોકે, બોટમાં સવાર અન્ય ચાર ખલાસીઓને ત્યાં હાજર અન્ય માછીમારોની મદદથી કે કોસ્ટ ગાર્ડની મદદથી બચાવી લેવામાં આવ્યા હતા. દરિયામાં બનેલી આ ઘટનાને પગલે સમગ્ર માછીમાર સમાજમાં શોકનું મોજું ફરી વળ્યું છે.