VIDEO: આમોદ તાલુકા વિકાસ અધિકારીની ફરિયાદ બાદ કોંગ્રેસ પ્રમુખ સહિત બે સામે BNS હેઠળ ગુનો નોંધાતા રાજકારણ ગરમાયું
છેલ્લું અપડેટ : 06 Aug 2026
ભરૂચ જિલ્લાના આમોદ તાલુકામાં TDOની સત્તાવાર ફરિયાદના આધારે કોંગ્રેસના આમોદ તાલુકા પ્રમુખ નરેન્દ્રકુમાર ઉર્ફે કાજી રાજેન્દ્રભાઈ પટેલ અને ચિંતન રાજેન્દ્રભાઈ પટેલ વિરુદ્ધ આમોદ પોલીસ મથકે ગુનો નોંધાયો છે. ગત 4 ઓગસ્ટ, 2026ના રોજ TDO પોતાની ચેમ્બરમાં સરકારી ફરજ બજાવી રહ્યા હતા ત્યારે આ બંને શખ્સોએ કચેરીમાં પહોંચીને ઉગ્ર બોલાચાલી કરી, ગેરવર્તન કર્યું, ધમકી આપી અને સરકારી કામગીરીમાં ગંભીર અવરોધ ઊભો કર્યો હોવાનો આક્ષેપ કરાયો છે. આ ઘટનાને પગલે પોલીસે BNSની કલમ 221, 224, 352, 351(3) અને 3(5) મુજબ કાયદેસરની કાર્યવાહી હાથ ધરી છે. બીજી બાજુ, કોંગ્રેસ પ્રમુખ નરેન્દ્ર પટેલે આ તમામ આરોપોને સદંતર ફગાવી દીધા છે અને આ ફરિયાદને માત્ર રાજકીય કિન્નાખોરી તથા બદલાની ભાવનાથી પ્રેરિત ગણાવી છે. તેમણે દાવો કર્યો છે કે તેમની પાસે આ ઘટનાના મજબૂત પુરાવા છે, જે યોગ્ય સમયે કોર્ટમાં રજૂ કરવામાં આવશે. આ હાઈ-પ્રોફાઈલ મામલાને લઈને આમોદ પંથકના રાજકીય વર્તુળોમાં ભારે ચર્ચા જાગી છે અને પોલીસે આ બાબતે વધુ તપાસ શરૂ કરી છે.
