Ahmedabad: નેપાળી મૂળના 2 ઘરઘાટીઓએ 10 લાખની ચોરી કરી, SUV લઈને થયા ફરાર

અમદાવાદ નજીક સાણંદના કલ્હાર ક્લબમાં મુંબઈના એક દંપતીના વિશ્વાસઘાતનો મામલો સામે આવ્યો છે, જ્યાં આઠ દિવસ પહેલા જ રાખેલા નેપાળી મૂળના બે ઘરઘાટીઓ રૂ. 10 લાખથી વધુની કિંમતની SUV, લક્ઝરી ઘડિયાળ અને સોનાના દાગીના લઈને ફરાર થઈ ગયા છે. દંપતીએ ઓનલાઈન એજન્સી દ્વારા નોકરોને રાખ્યા હતા. પોલીસે હાલ આ મામલે ગુનાઈત વિશ્વાસઘાત અને ચોરીનો ગુનો દાખલ કરીને આરોપીઓને પકડવા માટે તપાસ તેજ કરી છે. 

આ પણ વાંચો :

Ahmedabad: પીએમ મોદીના દીર્ઘાયુષ્ય અને કલ્યાણ માટે યોજાશે રાજસુય મહાયજ્ઞ

Ahmedabad news: શહેરની 93 AMCની સ્કૂલોની ઈમારત બંધ હાલતમાં, હવે ચાલશે આંગણવાડી

શું હતી ઘટના? 

સાણંદ પોલીસ સ્ટેશનમાં 38 વર્ષીય એસ્થર શર્મા દ્વારા દાખલ કરવામાં આવેલી ફરિયાદ મુજબ, આરોપીની ઓળખ નેપાળના રહેવાસી મીત બહાદુર દમાઈ અને દેવરાજ ભુદરાઈ ભગીરથ ભદ્રરાઈ તરીકે થઈ છે. દંપતીએ માત્ર આઠ દિવસ પહેલાં જ બંનેને કામ માટે રાખ્યા હતા. એસ્થર અને તેનો પતિ કમલ શર્મા (જે ઇયાવ ગામ પાસે એક પેપર કંપનીમાં મેનેજર તરીકે કામ કરે છે) છેલ્લા ત્રણ-ચાર મહિનાથી કલ્હાર ક્લબના બંગલો નંબર 225માં રહે છે. તેમણે લગભગ પખવાડિયા પહેલા ઓનલાઈન સર્ચ દ્વારા એસ. કે. મેનપાવર સર્વિસ નામની એજન્સીનો સંપર્ક કર્યો હતો. ફોટા અને આઈડી પ્રૂફ વોટ્સએપ પર મેળવ્યા બાદ બંને નોકરોને 15, 000 ના માસિક પગાર પર રાખવામાં આવ્યા હતા અને એજન્ટને ડિજિટલ ટ્રાન્ઝેક્શન દ્વારા રૂ. 13,000 કમિશન ચૂકવ્યું હતું.

SUV લઈને ફરાર

એસ્થરે પોતાની ફરિયાદમાં જણાવ્યું કે 4 નવેમ્બરે સવારે 8:30 વાગ્યાની આસપાસ તેણે જોયું કે, પાર્કિંગમાંથી તેની મહિન્દ્રા XUV500 (MH રજિસ્ટ્રેશન નંબર ધરાવતી) ગુમ હતી. જ્યારે તેણે નોકરોના રૂમની તપાસ કરી તો બંને નોકરો અને તેમનો સામાન પણ ગાયબ હતો. કલ્હાર ક્લબના મુખ્ય ગેટના સીસીટીવી ફૂટેજની ચકાસણી કરવામાં આવી ત્યારે જાણવા મળ્યું કે તે જ રાત્રે 2: 45 વાગ્યે બંને આરોપીઓ પરિવારની SUV લઈને બહાર જતા જોવા મળ્યા હતા.

ચોરી થયેલા મુદ્દામાલની વિગતો:

પોલીસના જણાવ્યા અનુસાર, ચોરી થયેલા સામાનમાં નીચેની કિંમતી વસ્તુઓનો સમાવેશ થાય છે, જેની કુલ કિંમત આશરે રૂ. 10 લાખ થાય છે:

લક્ઝરી ઘડિયાળો: રોલેક્સ, ઓમેગા અને કાર્ટિયર સહિત ત્રણ લક્ઝરી કાંડા ઘડિયાળો (અંદાજિત કિંમત રૂ. 3 લાખ).
સોનાના દાગીના: આશરે રૂ. 3 લાખની કિંમતના સોનાના દાગીના.
વાહન: મહિન્દ્રા XUV500 કાર (અંદાજિત કિંમત રૂ. 4 લાખ).

ફરિયાદના આધારે, સાણંદ પોલીસે ભારતીય ન્યાય સંહિતાની સંબંધિત કલમો હેઠળ ચોરી અને ગુનાઈત વિશ્વાસઘાતનો ગુનો નોંધીને તપાસ શરૂ કરી છે. અધિકારીઓએ જણાવ્યું કે, આરોપીઓ મુંબઈ અથવા ગુજરાત-મહારાષ્ટ્ર બોર્ડર તરફ ભાગ્યા હોવાની શંકા છે અને તેમને ટ્રેક કરવા માટે ટીમ બનાવવામાં આવી છે. પોલીસ મેનપાવર એજન્સીની પ્રમાણિકતાની પણ ચકાસણી કરી રહી છે.