Ahmedabad/ TRP ગેમ ઝોનના આરોપી મનસુખ સાગઠિયાની મુશ્કેલી વધી, EDએ પત્ની-પુત્ર સામે નોંધ્યો ગુનો
છેલ્લું અપડેટ : 28 Nov 2025
રાજકોટના TRP ગેમ ઝોન અગ્નિકાંડના આરોપી અને ભૂતપૂર્વ સરકારી અધિકારી મનસુખ સાગઠિયાની મુશ્કેલીઓમાં વધુ વધારો થયો છે. એન્ફોર્સમેન્ટ ડિરેક્ટોરેટ (ED) એ મનસુખ સાગઠિયા, તેના પુત્ર અને પત્ની સામે મની લોન્ડરિંગ નિવારણ અધિનિયમ (PMLA) હેઠળ ગુનો નોંધીને અમદાવાદની વિશેષ PMLA કોર્ટમાં ફરિયાદ દાખલ કરી છે.
પુત્ર-પત્નીના નામે બેનામી ટ્રાન્ઝેક્શન
ED દ્વારા કરવામાં આવેલી તપાસમાં ચોંકાવનારી વિગતો સામે આવી છે. મનસુખ સાગઠિયાએ રાજકોટ હેડ પોસ્ટ ઓફિસમાં પોતાના પુત્ર અને પત્નીના નામે બેંક એકાઉન્ટ ખોલાવ્યા હતા અને તેમાં મોટા પાયે ટ્રાન્ઝેક્શન કર્યા હતા. EDની તપાસમાં ખૂલ્યું છે કે 27 ફેબ્રુઆરી 2014 થી 27 જૂન 2025 સુધીના સમયગાળામાં આ ખાતાઓમાં અનેક વખત રોકડ રકમ જમા કરવામાં આવી હતી, જે બેનામી સંપત્તિ હોવાનું માનવામાં આવે છે.
₹ 21.61 કરોડની સંપત્તિ જપ્ત, ₹ 28 કરોડની અપ્રમાણસર મિલકત!
રાજકોટ ACBની ફરિયાદના આધારે EDએ આ સમગ્ર કેસની તપાસ શરૂ કરી હતી. તપાસ દરમિયાન એવું બહાર આવ્યું હતું કે મનસુખ સાગઠિયાએ આ સમયગાળામાં રૂ. 28 કરોડ જેટલી અપ્રમાણસર મિલકત વસાવી હતી. EDએ PMLA કેસ હેઠળ સાગઠિયાની કુલ રૂ. 21.61 કરોડની સંપત્તિ જપ્ત કરી છે, જેમાં નીચેની વસ્તુઓનો સમાવેશ થાય છે:
- અચલ સંપત્તિ (સ્થાવર મિલકતો)
- રોકડ રકમ
- ગોલ્ડ, ડાયમંડ, સિલ્વર
- અલગ અલગ દેશની ચલણી નોટો
- લક્ઝુરિયસ ઘડિયાળો સહિતની કિંમતી વસ્તુઓ
TRP ગેમ ઝોન અગ્નિકાંડ બાદ સાગઠિયા સામે ભ્રષ્ટાચાર અને અપ્રમાણસર મિલકતના આક્ષેપો હેઠળ ચાલી રહેલી કાર્યવાહીમાં હવે EDની સક્રિયતાથી તેના પર કાયદાકીય ગાળિયો વધુ કસાયો છે.
