ડિપોર્ટ કરાયેલા ભારતીયોમાં સૌથી વધુ ઉ.ગુજરાતના, મહેસાણા જિલ્લાનો ડોલરિયો વિસ્તાર ચર્ચાની એરણે

અમેરિકાથી પરત મોકલવામાં આવેલા લોકોના નામની યાદી જાહેર

અમેરિકામાં ધુસણખોરી કરતા પકડાયેલા ઉત્તર ગુજરાતના લોકોમાં મહેસાણા જિલ્લાના 9, ગાંધીનગર  જિલ્લાના 14, પાટણ  જિલ્લાના 4, બનાસકાંઠાના 1વ્યકિતને અમેરિકાથી પરત મોકલવામાં આવ્યા હોવાની યાદી જાહેર કરવામાં આવી છે.

મહેસાણા જિલ્લાનો ડોલરિયો વિસ્તાર ચર્ચાની એરણે

મહેસાણા જિલ્લામાં ખેરવા, જોરણંગ, મેઉ આસપાસના ગામડાઓને ડોલરિયો વિસ્તાર તરીકે ઓળખવામાં આવે છે. આ પંથકમાંથી અનેક લોકો વર્ષોથી અમેરિકા સહિત વિદેશોમાં વસવાટ કરી રહ્યો હોવાનું જાણવા મળે છે. દરમિયાન, અમેરિકા સરકારે કરેલી કાર્યવાહી બાદ ગેરકાયદેસર ધુસણખોરી કરતા પકડાયેલા ભારતીયોને ડિપોર્ટ કરવામાં આવતાં મહેસાણાનો ડોલરિયો વિસ્તાર ચર્ચાના એરણે આવ્યો છે.

મેઉની મહિલા અને ખેરવાની યુવતિને ડિપોર્ટ કરાઈ

મહેસાણા તાલુકાના મેઉ ગામના પરામાં રહેતા 60 જેટલા લોકો હાલમાં અમેરિકા સહિત અન્યા દેશોમાં વર્ષોથી વસવાટ કરી રહ્યા હોવાનુ માનવામાં આવે છે. ત્યારે અમેરિકન સરકારે ડિપોર્ટ કરેલ ભારતિયોમાં મેઉ ગામની એક મહિલા તેમજ 7 માસ અગાઉ અમેરિકાની વાટ પકડનાર ખેરવા ગામની યુવતીનો સમાવેશ થાય છે. બંને ગામોમાં લોકો સાથે આ અંગે વાતચીત કરવાનો પ્રયત્ન કરતાં પરિવાર કે ગ્રામજનો કંઈ પણ કહેવા તૈયાર થયા ન હતા.

નડિયાદના મંજીપુરાનો યુવક અને પેટલાદની યુવતી ડિપોર્ટ

ગેરકાયદે અમેરિકામાં રહેતા મૂળ ગાંધીનગરના માણસા અને હાલ નડિયાદના મંજીપુરા નજીક રહેતા પરિવારના યુવક સ્મિત પટેલને ડિપોર્ટ કરાયો હતો. જો કે, આ અંગે યુવકના પરિવારે મૌન સેવ્યું હતું. જ્યારે આણંદ જિલ્લાના પેટલાદની શિવાની પ્રકાશગીરી ગૌસ્વામી (ઉં.વ.27) પરિવાર પેટલાદમાં હાલ નહીં હોવાનું જાણવા મળ્યું છે.