VIDEO: Ahmedabad / ડિજિટલ એરેસ્ટના નામે 71 વર્ષીય વૃદ્ધ સાથે 1.43 કરોડની ઠગાઈ
છેલ્લું અપડેટ : 12 Apr 2026
અમદાવાદ શહેરમાં સાયબર ગુનેગારોનો આતંક સતત વધી રહ્યો છે. હવે ઠગબાજોએ પોલીસના નામે ડરાવીને લોકોને ડિજિટલ બંધક બનાવવાની નવી પદ્ધતિ અપનાવી છે. અમદાવાદના એક 71 વર્ષીય નિવૃત્ત વૃદ્ધને સાયબર ક્રાઇમ ઓફિસરની ઓળખ આપી, એક અઠવાડિયા સુધી 'ડિજિટલ એરેસ્ટ' રાખીને રૂ. 1.43 કરોડ પડાવી લેવામાં આવ્યા હોવાની ચોંકાવનારી ફરિયાદ નોંધાઈ છે.
ભોગ બનનાર વૃદ્ધને એક અજાણ્યા નંબર પરથી ફોન આવ્યો હતો, જેમાં સામેવાળી વ્યક્તિએ પોતાની ઓળખ 'સાયબર ક્રાઇમ ઇન્વેસ્ટિગેશન ઓફિસર' તરીકે આપી હતી. ઠગબાજોએ વૃદ્ધને ધમકી આપતા જણાવ્યું હતું કે, તેમના મોબાઈલ નંબર પરથી અજાણી મહિલાઓને અશ્લીલ વીડિયો મોકલવામાં આવ્યા છે. આ ગંભીર ગુનામાં તેમની ધરપકડ કરવાની ધમકી આપીને તેમને માનસિક રીતે ડરાવી દેવામાં આવ્યા હતા. તપાસના નામે અને કેસમાંથી મુક્તિ અપાવવાના બહાને ઠગબાજોએ વૃદ્ધ પાસેથી અલગ-અલગ ટ્રાન્ઝેક્શન દ્વારા કુલ રૂ. 1 કરોડ 43 લાખ જેટલી માતબર રકમ પડાવી લીધી હતી. સાયબર ક્રાઇમ પોલીસે આ મામલે ફરીયાદ નોંધી તપાસ શરૂ કરી છે.
