VIDEO: VIDEO: ANDARNI VAAT / ભોપાલમાં મેઘરાજાનું તાંડવ: જૂના ભોપાલમાં ચારેકોર જળબંબાકાર, રસ્તાઓ બન્યા નદી!
છેલ્લું અપડેટ : 10 Aug 2026
મધ્ય પ્રદેશની રાજધાની ભોપાલમાં હવામાન વિભાગની આગાહી વચ્ચે મેઘરાજાએ ધુઆંધાર બેટિંગ શરૂ કરી છે. છેલ્લા કેટલાક કલાકોથી સતત પડી રહેલા ધોધમાર વરસાદને કારણે ખાસ કરીને જૂના ભોપાલના નીચાણવાળા અને ગીચ વસ્તી ધરાવતા વિસ્તારોમાં ભારે જળબંબાકારની સ્થિતિ સર્જાઈ છે. રસ્તાઓ પર ઘૂંટણસમા પાણી ભરાઈ જતાં સમગ્ર વાહનવ્યવહાર ઠપ્પ થઈ ગયો છે અને વિઝિબિલિટી ઓછી થતાં વાહનચાલકોને ભારે હાલાકીનો સામનો કરવો પડી રહ્યો છે. જૂના ભોપાલના પ્રમુખ માર્ગો અને રહેણાંક વિસ્તારો નદીમાં ફેરવાઈ ગયા હોય તેવા દ્રશ્યો સામે આવ્યા છે. રસ્તાઓ પર પાણી ફરી વળતાં અનેક દ્વિચક્રી અને ચાર-ચક્રી વાહનો બંધ પડી ગયા હતા, જેને ધક્કા મારીને ખસેડવાની ફરજ પડી હતી. વરસાદી પાણી ઘરો અને દુકાનોમાં ઘૂસી જતાં સ્થાનિક વેપારીઓ અને રહીશોને મોટી આર્થિક નુકસાની વેઠવાનો વારો આવ્યો છે. ડ્રેનેજ સિસ્ટમની યોગ્ય સફાઈ ન થવાને કારણે વરસાદી પાણીનો નિકાલ રુંધાતા પાલિકાની પ્રી-મોન્સૂન કામગીરીની પોલ ખુલ્લી પડી ગઈ છે.
સ્થાનિક રહીશોના જણાવ્યા અનુસાર, દર વર્ષે ચોમાસામાં જૂના ભોપાલના વિસ્તારોમાં આવી જ ભયાનક સ્થિતિ સર્જાય છે, પરંતુ સ્થાનિક પ્રશાસન દ્વારા કોઈ કાયમી ઉકેલ લાવવામાં આવતો નથી. પાણીના ભરાવાને કારણે દૈનિક જરૂરિયાતની વસ્તુઓ લાવવામાં પણ લોકોને ભારે મુશ્કેલી પડી રહી છે. હાલમાં ઘટનાસ્થળેથી સામે આવેલા દ્રશ્યોમાં લોકો પાણીમાંથી પસાર થવા મજબૂર બન્યા હોય તેવું સ્પષ્ટ દેખાઈ રહ્યું છે. હવામાન વિભાગે હજુ પણ આગામી સમયમાં મુસળધાર વરસાદની આગાહી વ્યક્ત કરી છે, જેને પગલે પ્રશાસન દ્વારા ઈમરજન્સી ટીમ અને મનપાના કર્મચારીઓને એલર્ટ મોડ પર રાખવામાં આવ્યા છે અને લોકોને જરૂર વિના ઘરની બહાર ન નીકળવા અપીલ કરવામાં આવી છે.
બ્યૂરો રિપોર્ટ જીએસટીવી
