VIDEO: સતનામાં મંદાકિની નદીનું રોદ્ર સ્વરૂપ: ભયજનક સપાટી વટાવતાં ચોતરફ પ્રલયકારી પૂર!
છેલ્લું અપડેટ : 04 Sept 2026
મધ્ય પ્રદેશના સતના જિલ્લામાં પવિત્ર મંદાકિની નદીમાં આવેલ ભયાનક પૂરે ભારે તારાજી સર્જી છે. સતત પડી રહેલા મુસળધાર વરસાદને કારણે મંદાકિની નદી ભયજનક સપાટી વટાવીને પ્રચંડ પ્રવાહ સાથે વહી રહી છે. નદીના આ રોદ્ર સ્વરૂપને લીધે ચિત્રકૂટ અને સતનાના આસપાસના વિસ્તારોમાં પૂરના પાણી ઝડપથી ઘૂસી જતાં ચારેય તરફ જળબંબાકાર અને ભયનો માહોલ સર્જાયો છે. પૂરના પ્રચંડ પ્રહારને કારણે નદી કિનારે આવેલા સુપ્રસિદ્ધ મંદિરો, આશ્રમો, દુકાનો અને ઘરો સંપૂર્ણપણે પાણીમાં ગરકાવ થઈ ગયા છે. ઘરો અને આશ્રમોમાં કમર સુધી પાણી ભરાઈ જવાના કારણે સાધુ-સંતો, શ્રદ્ધાળુઓ અને સ્થાનિક રહીશોનું જનજીવન સંપૂર્ણ અસ્તવ્યસ્ત થઈ ગયું છે. વેપારીઓની દુકાનોમાં પાણી ઘૂસતાં કિંમતી સામાન પલળી જવાથી ભારે આર્થિક નુકસાન વેઠવાનો વારો આવ્યો છે.
આ ઉપરાંત, ભારે વરસાદ અને પૂરના કારણે અનેક વિસ્તારોમાં ભૂસ્ખલનની ઘટનાઓ પણ સામે આવી છે. મુખ્ય માર્ગો પર વીજળીના હાઈ-ટેન્શન પોલ અને વૃક્ષો ધરાશાયી થઈ જતાં વાહનવ્યવહાર સંપૂર્ણપણે ઠપ્પ થઈ ગયો છે અને વીજ પુરવઠો ખોરવાઈ ગયો છે. માર્ગો બંધ થવાના કારણે અનેક વિસ્તારોનો સંપર્ક તૂટી ગયો છે, જેનાથી સ્થાનિકો ફસાયેલા રહેવા મજબૂર બન્યા છે. પરિસ્થિતિની ગંભીરતાને ધ્યાને રાખીને સ્થાનિક વહીવટીતંત્ર, પોલીસ અને બચાવ ટુકડીઓ યુદ્ધના ધોરણે સક્રિય થઈ ગઈ છે. પૂર પ્રભાવિત અને જોખમી વિસ્તારોમાંથી લોકોને સલામત સ્થળે ખસેડવાની કામગીરી ચાલુ કરી દેવામાં આવી છે. તંત્ર દ્વારા વીજપોલ અને કાટમાળ હટાવીને રસ્તાઓ ખુલ્લા કરવાના પ્રયાસો હાથ ધરાયા છે, સાથે જ નાગરિકોને નદી કિનારે ન જવા અને સાવચેત રહેવા કડક એડવાઈઝરી જારી કરવામાં આવી છે.
બ્યૂરો રિપોર્ટ જીએસટીવી
