VIDEO: પાડોશી દેશ નેપાળમાં કુદરતનો પ્રકોપ ચિતવન અને મ્યાગદીમાં પૂર-ભૂસ્ખલનથી ભારે જાનહાનિ!
છેલ્લું અપડેટ : 27 Sept 2026
પાડોશી દેશ નેપાળમાં કુદરતનો પ્રકોપ
ચિતવન અને મ્યાગદીમાં પૂર-ભૂસ્ખલનથી ભારે જાનહાનિ!
નેપાળમાં ૭૨ કલાકમાં આકાશી આફતનો કાળમુખો પ્રહાર
અતિવૃષ્ટિના કારણે પાડોશી દેશ નેપાળના ચિતવન અને મ્યાગદી જિલ્લામાં કુદરતે ભયાનક કોપ વર્તાવ્યો છે. છેલ્લા ૭૨ કલાકમાં વરસેલા મુસળધાર વરસાદથી સર્જાયેલા પૂર અને ભૂસ્ખલનની હોનારતમાં અનેક લોકોના કરૂણ મોત નીપજ્યા છે, જ્યારે કેટલાક નાગરિકો ગુમ હોવાના અહેવાલ છે. અવિરત વરસી રહેલા આફતના વરસાદે નેપાળના પહાડી તેમજ નીચાણવાળા પ્રદેશોમાં ભારે બરબાદી સર્જીને જનજીવન સંપૂર્ણપણે અસ્તવ્યસ્ત કરી દીધું છે. પૂરના ધસમસતા પ્રવાહના કારણે ચિતવન અને મ્યાગદી જિલ્લાના અનેક ગામડાઓ જળમગ્ન બની ગયા છે. ગંડકી અને તેની સહાયક નદીઓ બે કાંઠે ઉભરાતાં રહેણાંક વિસ્તારો, ખેતરો અને સ્થાનિક બજારોમાં કાદવ મિશ્રિત પાણી ઘૂસી ગયા છે. પાણીની તીવ્રતા એટલી ભયાનક હતી કે અનેક કાચા-પાકા મકાનો જમીનદોસ્ત થઈ ગયા છે અને માર્ગો ધોવાઈ જતાં અનેક વિસ્તારોનો સંપર્ક દેશના અન્ય ભાગોથી સંપૂર્ણપણે કપાઈ ગયો છે.
અનેક લોકોના મોત, પૂરના પાણીમાં તણાયા અનેક મકાનો!
માર્ગો અને પુલો ધોવાતાં અનેક વિસ્તારો બન્યા સંપર્કવિહોણા!
પૂર પીડિતો માટે રાહત અને બચાવ કામગીરી તેજ!
ભયાનક સ્થિતિને પહોંચી વળવા માટે નેપાળ આર્મી, સશસ્ત્ર પોલીસ બળ અને સ્થાનિક રાહત ટુકડીઓ દ્વારા ગ્રાઉન્ડ શૂન્ય પર યુદ્ધના ધોરણે રેસ્ક્યૂ ઓપરેશન ચલાવવામાં આવી રહ્યું છે. પૂરના પાણીમાં ફસાયેલા લોકોને હેલિકોપ્ટર અને બચાવ બોટની મદદથી સુરક્ષિત સ્થળે ખસેડવામાં આવી રહ્યા છે. આપદા પ્રબંધન વિભાગ દ્વારા અસરગ્રસ્તો માટે તાત્કાલિક ધોરણે આશ્રય સ્થાનો, ભોજન અને તબીબી સહાય પહોંચાડવાની કવાયત તેજ કરવામાં આવી છે.નેપાળના ચિતવન અને મ્યાગદીથી સામે આવેલા ગ્રાઉન્ડ રિપોર્ટના દ્રશ્યોમાં જળમગ્ન બનેલા ગામો, તૂટેલા પુલ, ભૂસ્ખલનથી બંધ થયેલા માર્ગો અને જાનના જોખમે બચાવ કામગીરી કરતી સેનાની ટુકડીઓ સ્પષ્ટ જોઈ શકાય છે. હવામાન વિભાગ દ્વારા હજુ પણ ભારે વરસાદની ચેતવણી આપવામાં આવી હોવાથી વહીવટી તંત્ર દ્વારા હાઈ એલર્ટ જારી કરીને નાગરિકોને અત્યંત સાવચેત રહેવા અપીલ કરવામાં આવી છે.
બ્યૂરો રિપોર્ટ જીએસટીવી
