VIDEO: મેરઠના આકાશમાં સૂર્યકિરણનો રોમાંચ ભારતીય વાયુસેનાના પાઇલટ્સે બતાવ્યા દિલધડક કરતબ!
છેલ્લું અપડેટ : 20 Sept 2026
મેરઠના આકાશમાં સૂર્યકિરણનો રોમાંચ
ભારતીય વાયુસેનાના પાઇલટ્સે બતાવ્યા દિલધડક કરતબ!
આકાશમાં છવાયો ત્રિરંગો
ઉત્તર પ્રદેશના મેરઠ શહેરમાં ભારતીય વાયુસેના દ્વારા સૂર્યકિરણ એરોબેટિક ડિસ્પ્લે ટીમનું અત્યંત આકર્ષક અને રોમાંચક એર શો યોજવામાં આવ્યો હતો. આકાશમાં ભારતીય વાયુસેનાના સૂર્યકિરણ વિમાનોએ એકથી એક ચડિયાતા સાહસિક કરતબો બતાવીને સમગ્ર શહેરના લોકોને મંત્રમુગ્ધ કરી દીધા હતા. વાયુસેનાના પાઇલટ્સની અદ્ભુત ક્ષમતા, ચોકસાઈ અને શૌર્યને જોવા માટે હજારોની સંખ્યામાં નાગરિકો ઉમટી પડ્યા હતા. એર શો દરમિયાન એરક્રાફ્ટ્સ દ્વારા આકાશમાં બનાવવામાં આવેલી વિવિધ ફોર્મેશન્સ અને હવામાં દિલધડક રોમાંચક કરતબો આકર્ષણનું કેન્દ્ર બન્યા હતા. વિમાનોમાંથી નીકળતા ત્રિરંગાના રંગોના ધુમાડાથી આખું આકાશ દેશભક્તિના રંગે રંગાઈ ગયું હતું. ભારતીય વાયુસેનાની તાકાત અને શિસ્તનું પ્રદર્શન જોઈને ઉપસ્થિત જનમેદનીમાં ભારે ઉત્સાહ જોવા મળ્યો હતો અને આખું મેદાન ભારત માતા કી જયના નારાઓથી ગુંજી ઉઠ્યું હતું.
વાયુસેનાના સાહસિક એર શોથી મંત્રમુગ્ધ થયા મેરઠવાસીઓ!
ભારતીય વાયુસેનાનું શક્તિ પ્રદર્શન!
મેરઠથી સામે આવેલા દ્રશ્યોમાં અને સ્થાનિક લોકોના પ્રતિભાવોમાં એર શોને લઈને ભારે આશ્ચર્ય અને ગૌરવની લાગણી સ્પષ્ટપણે જોઈ શકાતી હતી. ખાસ કરીને બાળકો અને યુવાનોમાં આ એર શોને લઈને ભારે ક્રેઝ જોવા મળ્યો હતો. સ્થાનિક રહીશોએ જણાવ્યું કે વાયુસેનાના જાંબાઝ પાઇલટ્સને આટલા નજીકથી કરતબ કરતા જોવા એ જીવનભર યાદ રહી જાય તેવો અદ્ભુત અનુભવ છે. આ સફળ આયોજન પાછળ ભારતીય વાયુસેનાનો મુખ્ય ઉદ્દેશ્ય દેશના યુવા વર્ગને ભારતીય સશસ્ત્ર દળોમાં જોડાવા અને દેશસેવા કરવા માટે પ્રેરીત કરવાનો હતો. સૂર્યકિરણ એરોબેટિક ટીમના આ અદ્ભુત શૌર્ય પ્રદર્શને મેરઠના નાગરિકોમાં દેશભક્તિનો નવો સંચાર કર્યો છે અને ભારતીય વાયુસેનાની ગૌરવશાળી પરંપરાને વધુ એક વાર ઉજાગર કરી છે.
બ્યૂરો રિપોર્ટ જીએસટીવી
