VIDEO: પ્રયાગરાજમાં ગંગા-યમુનાએ ધારણ કર્યું રૌદ્ર સ્વરૂપ
છેલ્લું અપડેટ : 02 Oct 2026
પ્રયાગરાજમાં ગંગા-યમુનાએ ધારણ કર્યું રૌદ્ર સ્વરૂપ
લેટે હનુમાનજી મંદિર સુધી પહોંચ્યા પૂરના પાણી!
તીર્થનગરી પ્રયાગરાજમાં આકાશી આફત
ઉત્તર પ્રદેશની પવિત્ર ધાર્મિક નગરી પ્રયાગરાજમાં પાડોશી રાજ્યોમાંથી થઈ રહેલી પાણીની ભારે આવક અને અવિરત વરસાદના કારણે ગંગા અને યમુના નદીના જળસ્તરમાં ભયજનક વધારો થયો છે. બંને પવિત્ર નદીઓ બે કાંઠે ઉભરાતાં સંગમ ક્ષેત્ર પૂરના પાણીમાં ગરકાવ થઈ ગયું છે. દશાશ્વમેધ ઘાટ સહિતના તમામ મુખ્ય ઘાટો જળમગ્ન બની જતાં સ્થાનિક રહીશો, વેપારીઓ અને દેશભરમાંથી આવતા આસ્થાવાન શ્રદ્ધાળુઓ ભારે મુશ્કેલીમાં મુકાયા છે.સ્થાનિક નાવિકોના જણાવ્યા મુજબ, છેલ્લા બે-ત્રણ દિવસથી નદીઓમાં પૂરના પાણી સતત વધી રહ્યા છે. સંગમ તટ પર સ્થિત પ્રસિદ્ધ લેટે હનુમાનજી મંદિરની નજીક પૂરના પાણી પહોંચી ગયા છે, જેના લીધે હનુમાનજી મૂર્તિ સ્નાન કરે તેવી સ્થિતિ નિર્માણ પામી છે. ઘાટો પર બેસતા પંડાઓની ચોકીઓ, છાપરાં અને સ્થાનિક દુકાનદારોના ઝૂંપડાં ડૂબી જતાં તેઓને પોતાના સ્થાનો પાછળ ખસેડવાની નોબત આવી છે.
દશાશ્વમેધ ઘાટ સહિતના તમામ સંગમ તટ પૂરના પાણીમાં ગરકાવ!
પૂરના ભયજનક પ્રવાહ વચ્ચે તંત્ર દ્વારા ઘાટો પર હાઈ એલર્ટ જારી!
તર્પણ અને પવિત્ર સ્નાન માટે પ્રયાગરાજ પહોંચતા શ્રદ્ધાળુઓએ જણાવ્યું હતું કે, ઘાટ જળમગ્ન બનતાં પૂજા-અર્ચના અને સ્નાનમાં મોટી અડચણો આવી રહી છે. જોકે, ગંગા નદીના જળસ્તરમાં થતી વૃદ્ધિમાં આંશિક વિરામ આવતાં લોકોને થોડી રાહત મળી છે, પરંતુ યમુનાના વધતા પાણીના લીધે નીચાણવાળા વિસ્તારો પર હજુ પણ પૂરનું સંકટ ઘેરાયેલું છે. નાવિકો પોતાના પરિવાર અને હોડીઓ સાથે સુરક્ષિત સ્થળે આશરો લેવા મજબૂર બન્યા છે.પ્રયાગરાજથી સામે આવેલા તાજેતરના ગ્રાઉન્ડ રિપોર્ટના દ્રશ્યોમાં ગંગા-યમુનાનું રૌદ્ર સ્વરૂપ, સંગમ તટ પર જળબંબાકારની સ્થિતિ અને લેટે હનુમાનજી મંદિર સુધી પહોંચેલા પૂરના પાણી સ્પષ્ટ જોઈ શકાય છે. જિલ્લા પ્રશાસન અને આપદા પ્રબંધન ટુકડીઓ દ્વારા ઘાટ કિનારે ચુસ્ત બંદોબસ્ત ગોઠવવામાં આવ્યો છે અને શ્રદ્ધાળુઓને ઊંડા પાણીમાં ન જવાની તથા સાવચેતી રાખવાની ખાસ અપીલ કરવામાં આવી છે.
બ્યૂરો રિપોર્ટ જીએસટીવી
