Video/ રાજીવ ગાંધીના મૃત્યુ બાદ બોલિવૂડના આ સુપરસ્ટારે ઉપાડ્યું હતું રાહુલ ગાંધીનું બેગ, વીડિયો થઈ રહ્યો છે વાયરલ
રાજીવ ગાંધીના મૃત્યુ સમયે રાહુલ ગાંધી ભારતમાં નહોતા. તેમની ભારત પરત
રાજીવ ગાંધીના મૃત્યુ સમયે રાહુલ ગાંધી ભારતમાં નહોતા. તેમની ભારત પરત ફરવાની ઘડીએ એક બોલિવૂડ સુપરસ્ટાર તેમની સાથે ઊભો રહ્યો. રાહુલ સાથેનો તેમનો એક જૂનો વીડિયો ચર્ચામાં છે. આખરે આ વ્યક્તિ કોણ હતો, જાણો.
પ્રિયંકા ગાંધી, રાહુલ ગાંધી અને અમિતાભ બચ્ચન
રાજીવ ગાંધીનું મૃત્યુ માત્ર ગાંધી પરિવાર માટે જ નહીં, પરંતુ આખા દેશ માટે મોટો આઘાત હતો. સોનિયા ગાંધી, રાહુલ અને પ્રિયંકા માટે આ અત્યંત મુશ્કેલ સમય હતો. જ્યારે આ ઘટના બની ત્યારે પ્રિયંકા ગાંધી માત્ર 17 વર્ષની હતી અને રાહુલ અમેરિકામાં તેમનું શિક્ષણ પૂર્ણ કરી રહ્યા હતા. જ્યારે મૃત્યુના સમાચાર રાહુલ સુધી પહોંચ્યા, ત્યારે તેઓ તાત્કાલિક ભારત પરત ફર્યા. આ દરમિયાન તેમનો સાથ આપવા માટે એક સુપરસ્ટાર ઊભો હતો, જે રાજીવ ગાંધીનો ગાઢ મિત્ર પણ હતો. મુશ્કેલ સમયમાં આ સુપરસ્ટારે ન માત્ર હિંમત આપી, પરંતુ આ દુઃખની ઘડીમાં સાથે ઊભો રહ્યો અને પરિવારના સભ્યની જેમ જવાબદારીઓ સંભાળતો જોવા મળ્યો. આ વ્યક્તિ બીજું કોઈ નહીં, પરંતુ અમિતાભ બચ્ચન હતા.
વીડિયોમાં જોવા મળ્યા અમિતાભ
આ વીડિયો રાજીવ ગાંધીના મૃત્યુ બાદનો છે, જ્યારે રાહુલ ગાંધી વિદેશથી પરત ફર્યા હતા અને પ્રિયંકા તેમને લેવા આવી હતી. આ વીડિયોમાં તમે જોઈ શકો છો કે રાહુલ ગાંધીની પાછળ કાળા કપડાંમાં અમિતાભ બચ્ચન ચાલતા આવે છે. તેમની પાસે રાહુલનું બેગ છે. જેવો રાહુલ ઊભો રહે છે, તે પણ ત્યાં જ ઊભા રહે છે અને બેગ જમીન પર મૂકે છે. આ દરમિયાન પ્રિયંકા ગાંધી તેમના ભાઈ રાહુલને ગળે લગાડે છે. અમિતાભ બચ્ચન ધીરજથી ઊભા રહે છે અને રાહુલ ગાંધીના આગળ વધવાની રાહ જુએ છે. હવે આ વીડિયો ઝડપથી વાયરલ થઈ રહ્યો છે અને લોકો તેના પર ધ્યાન આપી રહ્યા છે.
ગાંધી અને બચ્ચન વચ્ચે હતો ગાઢ સંબંધ
જણાવી દઈએ કે, એક સમય હતો જ્યારે બચ્ચન અને ગાંધી પરિવાર વચ્ચે ખૂબ જ ગાઢ સંબંધો હતા. રાજીવ અને અમિતાભની ગહેરી મિત્રતા કોઈથી છુપી નહોતી. રાજીવના લગ્નમાં પણ અમિતાભ બચ્ચનના પરિવારની મહત્વની ભૂમિકા હતી. એવું કહેવાય છે કે બચ્ચન અને ગાંધી પરિવારની મિત્રતા સરોજિની નાયડુના માધ્યમથી થઈ હતી. તેમણે જ તેજી બચ્ચન અને ઇન્દિરા ગાંધીની મુલાકાત કરાવી હતી. આગળ જતાં અમિતાભ અને અજિતાભની મિત્રતા રાજીવ ગાંધી અને સંજય સાથે થઈ, જે વર્ષો સુધી ચાલી.
અમિતાભ અને રાજીવની મિત્રતા
એવું જણાવવામાં આવે છે કે સોનિયા ગાંધી લગ્ન પહેલાં ભારતીય રીત-રિવાજોને સમજવા અને શીખવા માટે થોડો સમય બચ્ચન પરિવાર સાથે રહ્યાં હતાં. ઇન્દિરા ગાંધીના મૃત્યુ બાદ રાજીવ ગાંધીની વિનંતી પર જ અમિતાભ બચ્ચને રાજનીતિમાં પ્રવેશ કર્યો હતો. ઇન્દિરા ગાંધીના મૃત્યુ બાદ પણ અમિતાભ બચ્ચન રાજીવની સાથે મજબૂતીથી ઊભા રહ્યા હતા. થોડા સમય માટે બંને પરિવારો વચ્ચે કડવાશની ચર્ચાઓ પણ હતી, પરંતુ જયા બચ્ચન અને સોનિયાના તાજેતરના વીડિયોઝ જોઈને સ્પષ્ટ થાય છે કે બંને પરિવારો વચ્ચેના સંબંધો સુધરી ગયા છે.
