સાઉથના આ સુપરસ્ટારને મળી લીગલ નોટિસ, પ્રોડક્શન હાઉસે માંગ્યું 20 કરોડનું વળતર
છેલ્લું અપડેટ : 14 Feb 2026
સુપરસ્ટાર ધનુષને એક પ્રોડક્શન કંપનીએ લીગલ નોટિસ મોકલીને 20 કરોડ રૂપિયાના વળતરની માંગ કરી છે. આરોપ છે કે 2016માં સાઈન કરવામાં આવેલી ફિલ્મ 'નાન રુદ્રન' (Naan Rudran) નું શૂટિંગ બાકી છે અને વિલંબને કારણે નિર્માતાઓને ભારે નુકસાન થયું છે. અભિનેતાએ હજુ સુધી આ બાબતે કોઈ પ્રતિક્રિયા આપી નથી.
'તેરે ઈશ્ક મેં...' થી ઘર-ઘરમાં જાણીતા બનેલા 'શંકર' એટલે કે પેન ઈન્ડિયા સુપરસ્ટાર ધનુષ કાયદાકીય મુશ્કેલીમાં ફસાયા છે. એક પ્રોડક્શન હાઉસ દ્વારા તેમને કાયદાકીય નોટિસ મોકલીને 20 કરોડ રૂપિયાના વળતરની માંગ કરવામાં આવી છે. આ વિવાદ વર્ષોથી અટકેલા એક ફિલ્મ પ્રોજેક્ટ સાથે જોડાયેલો છે. આરોપ છે કે 2016માં સાઈન થયેલી ફિલ્મ લાંબા સમયથી અધ્ધરતાલ છે અને શૂટિંગ શરૂ ન થવાને કારણે નિર્માતાઓને મોટું આર્થિક નુકસાન વેઠવું પડ્યું છે.
પ્રોડક્શન હાઉસ થેનાન્ડલ ફિલ્મ્સ (Thenandal Films) દ્વારા આ નોટિસ મોકલવામાં આવી છે. કંપનીનો આરોપ છે કે ધનુષે વર્ષ 2016માં તેમની સાથે 'નાન રુદ્રન' નામની ફિલ્મ સાઈન કરી હતી, પરંતુ આ ફિલ્મનું શૂટિંગ ક્યારેય શરૂ થયું નથી. પ્રોડક્શન હાઉસના વકીલ એ. ચિદમ્બરમ દ્વારા મોકલવામાં આવેલી નોટિસમાં જણાવાયું છે કે ધનુષે શરૂઆતમાં ફિલ્મ ડાયરેક્ટ કરવાનું વચન આપ્યું હતું, પરંતુ બાદમાં પ્લાન બદલવામાં આવ્યો હતો.
પ્રોડક્શન હાઉસ દ્વારા કેમ 20 કરોડની માંગ કરવામાં આવી?
નોટિસમાં જણાવાયું છે કે પ્રોડક્શન હાઉસે ફેરફારોને મંજૂરી આપી હતી, પરંતુ ધનુષે સંપૂર્ણ સ્ક્રિનપ્લે આપ્યો ન હતો, જેના કારણે પ્રોજેક્ટ અધવચ્ચે અટકી ગયો હતો. નોટિસમાં આગળ દાવો કરવામાં આવ્યો છે કે ધનુષે આ પ્રોજેક્ટ પૂરો કર્યા વિના અન્ય ફિલ્મો માટે કોલ શીટ્સ (તારીખો) આપી દીધી હતી, જેનાથી પ્રોડક્શન હાઉસને ભારે આર્થિક નુકસાન થયું હતું.
શરૂઆતના પ્રોડક્શન ખર્ચને વસૂલવા માટે 20 કરોડ રૂપિયાની માંગ કરવામાં આવી છે. નોટિસમાં સ્પષ્ટ ચેતવણી આપવામાં આવી છે કે જો નિર્ધારિત સમયમાં માંગ પૂરી કરવામાં નહીં આવે તો આગળની કાયદાકીય કાર્યવાહી કરવામાં આવશે.
આ દરમિયાન, ધનુષે તેની આગામી ફિલ્મની જાહેરાત કરી છે, જેને કામચલાઉ ધોરણે 'D55' નામ આપવામાં આવ્યું છે. આ ફિલ્મનું નિર્દેશન 'અમરન' ફેમ ડાયરેક્ટર રાજકુમાર પેરિયાસામી કરશે. પ્રોડક્શન હાઉસ 'વન્ડરબાર ફિલ્મ્સ' (Wunderbar Films) એ સોશિયલ મીડિયા પર આની જાહેરાત કરી હતી અને ધનુષ સાથેની ટીમની તસવીરો શેર કરી હતી.
