VIDEO: Jana Nayagan Review:પડદાના હીરોથી જનતાના 'CM'! છેલ્લી ફિલ્મમાં થલપતિ વિજયનો મજબૂત સ્વૅગ
છેલ્લું અપડેટ : 23 Jul 2026
તમિલ સિનેમાના સૌથી મોટા સુપરસ્ટાર થલપતિ વિજયના કરોડો ફેન્સ માટે ‘જન નાયકન’ માત્ર એક ફિલ્મ નથી, પરંતુ એક યુગનો અંત છે! પૂરા 30 વર્ષ સુધી પોતાની એક્ટિંગ, અદભુત ડાન્સ અને આગવા સ્વૅગથી થિયેટર્સમાં સીટીઓ વાગડનારા વિજય સિનેમા છોડીને હવે રાજકારણના મેદાનમાં ઊતરી ચૂક્યા છે. ડિરેક્ટર એચ. વિનોદની ફિલ્મ ‘જન નાયકન’ તેમની છેલ્લી ફિલ્મ છે, જે સીધી રીતે તેમના ફેન્સને આપેલી એક ઈમોશનલ અને ધમાકેદાર ‘ફેરવેલ ગિફ્ટ’ (વિદાય ભેટ) છે.
ફિલ્મનું નામ ‘જન નાયકન’ રાખવામાં આવ્યું છે, જે સીધો ઈશારો કરે છે કે થલપતિ હવે પડદાના હીરોમાંથી જનતાના અસલી નેતા બની ગયા છે. પરંતુ શું વિજયની આ છેલ્લી ફિલ્મ થિયેટર્સમાં તમારા પૈસા વસૂલ કરાવી શકશે? શું તેમાં માત્ર રાજકારણની જ વાતો ભરી છે કે પછી તાળી-સીટીવાળું અસલી એક્શન પણ છે? અહીં જાણો કેવી છે આ ફિલ્મ.
ફિલ્મની વાર્તા
ફિલ્મની શરૂઆત મદુરાઈની એક જેલથી થાય છે, જ્યાં આપણો હીરો વેત્રી (થલપતિ વિજય) સજા કાપી રહ્યો છે. મજાની વાત એ છે કે તેને જેલમાં કોઈ પોલીસ નહીં, પણ તેની સગી મા (રેવતી)એ મોકલ્યો છે. પરંતુ વેત્રી કોઈ સામાન્ય કેદી નથી.
વાર્તામાં ટ્વિસ્ટ ત્યારે આવે છે જ્યારે જેલનો વોર્ડન શ્રીકાંત (ગૌતમ વાસુદેવ મેનન) એક અકસ્માતમાં મૃત્યુ પહેલાં પોતાની દીકરી વિજીની જવાબદારી વેત્રીને સોંપે છે. વેત્રીનું સપનું વિજીને દેશની આર્મીમાં ઓફિસર બનાવવાનું છે. પરંતુ આ જ દરમિયાન એન્ટ્રી થાય છે ઈન્ટરનેશનલ ક્રિમિનલ જોન હિમલર (બોબી દેઓલ)ની. જોન એક એવો ખુંખાર ગુંડો છે જે સરકારોને પોતાની આંગળીઓ પર નચાવે છે અને ભારતમાં તબાહી મચાવવા માટે હથિયારોથી ભરેલું એક મોટું જહાજ હાઈજેક કરી લે છે.
હવે વેત્રી પોતાની આ મોંબોલી દીકરીને બચાવવા અને જોન હિમલરના એ કાળા સામ્રાજ્યને ખતમ કરવા માટે કેવી રીતે મેદાનમાં ઊતરે છે, તે જાણવા માટે તમારે થિયેટરમાં જઈને ‘જન નાયકન’ જોવી પડશે.
કેવી છે ફિલ્મ ‘જન નાયકન’?
જો તમે થલપતિ વિજયના પાક્કા ફેન છો, તો આ ફિલ્મ તમારા માટે કોઈ મોટા તહેવારથી કમ નથી. ફિલ્મના પહેલા ફ્રેમથી લઈને છેલ્લા સીન સુધી માત્ર અને માત્ર થલપતિ વિજયનું જ રાજ ચાલે છે. ફિલ્મમાં તેમના જૂના આઇકોનિક સીન્સ, ડાયલોગ્સ અને તેમના રિયલ લાઈફ ભાષણોના એવા-એવા રેફરન્સ (સંદર્ભ) મૂકવામાં આવ્યા છે, જે તેમના ફેન્સ માટે સરપ્રાઈઝ સમાન છે. ‘થલપતિ કચેરી’ ગીત પર વિજયનો ડાન્સ સિક્વન્સ જોઈને તો એવું જ લાગે છે કે બંદો ખરેખર ફેન્સ સાથે થિયેટરમાં પોતાની છેલ્લી ફિલ્મને સેલિબ્રેટ કરી રહ્યો છે.
સેકન્ડ હાફમાં ફિલ્મ વાર્તા કરતા વધારે વિજયના વિઝન પર શિફ્ટ થઈ જાય છે. ભલે આ ‘જન નાયકન’ તેલુગુ ફિલ્મ ‘ભગવંત કેસરી’ની રીમેક છે, પરંતુ તેમાં તામિલનાડુના લોકલ રાજકારણ અને MGRના એવા-એવા રેફરન્સ ઉમેરવામાં આવ્યા છે કે દિલ ખુશ થઈ જાય. હોઈ શકે કે હિન્દી કે અન્ય ઓડિયન્સને એકાદ રાજકીય વાતો થોડી નવી લાગે, પરંતુ જો તમે સાઉથ ફિલ્મોના ફેન છો, તો થલપતિ વિજયનો સ્વૅગ અને તેમનો જલવો તમને આખી ફિલ્મ દરમિયાન સ્ક્રીન સાથે જોડી રાખે છે.
