Chitralok / સોશિયલ સર્કલ
છેલ્લું અપડેટ : 02 May 2025
જેક્લીન ફર્નાન્ડિઝ: વટાણા વેરવા કે નહીં?
સુકેશ ચંદ્રશેખર નામના મહાઠગ સાથેનો સંગાથ શ્રીલંકન સુંદરી જેક્લીનને બહુ નડ્યો છે. લોટરી કૌભાંડ અને ગિફ્ટ કૌભાંડથી લઈને જાતજાતના આડા ધંધા કરતો આ સુકેશ પાછો ફાંકા ફોજદારી કરવામાં ઉસ્તાદ છે. એક OTT પ્લેટફોર્મ તેના ઘટનાપ્રચુર જીવન પર ડોક્યુ-સિરીઝ બનાવવા માંગે છે. આ OTTવાળાઓ જેક્લીનને મળ્યા. એને પૂછવામાં આવ્યું કે સુકેશની (એક્સ) ગર્લફ્રેન્ડ હોવાના નાતે તારે જે કહેવાનું છે તે શું તું અમારી ડોક્યુ-સિરીઝ માટે કેમેરા સામે બોલીશ? તારું જે કંઈ વર્ઝન હોય તે આ સિરીઝમાં પેશ કરીશ? હાલના તબક્કે જેક્લીને OTTવાળાઓને હા પણ નથી કહી અને ના પણ નથી કહી. એ પોતાના વકીલો સાથે ચર્ચા કરતી હોવી જોઈએ કે કેમેરા સામે વટાણા વેરવા કે નહીં? ને જો વટાણા વેરવા જ હોય તો કેટલા વેરવા? હું ક્યાંક લીગલ ચક્કરમાં તો નહીં ફસાઈ જઉં ને? મારું કશુંય બોલવાથી સુકેશ પર એની શી અસર થઈ શકે? વગેરે. અમને તો લાગે છે કે જેક્લીનનું કરિયર જે રીતે આગળ વધી રહ્યું છે - કે પછી ઊભું રહી ગયું છે - તે જોતા એણે જે કામ મળે તે સ્વીકારી લેવું જોઈએ. તમે શું કહો છો?
અભિષેક બચ્ચન: પાઈની પેદાશ નહીં અને...
'દસવી', 'ઘૂમર', 'આઈ વોન્ટ ટુ ટોક', 'બી હેપી'... સાચું કહેજો, અભિષેકની આ છેલ્લી ફિલ્મોમાંથી તમે કેટલી જોઈ? આ જ પ્રોબ્લેમ છે! અભિષેકની ફિલ્મોને 'ક્રિટિકલ એક્લઈમ' તો મળે છે, પણ આ ફિલ્મો જોતું કોઈ નથી. OTT પર પલંગ પર લાંબા થઈને સૂતાં સૂતાં જોઈ શકવાની સગવડ છે તોય નહીં! અભિષેકના બાયોડેટામાં નવી નવી ફિલ્મો ઉમેરાતી તો જાય છે, પણ આ ફિલ્મો જો થિયેટરોમાં રિલીઝ થઈ હોત તો બોક્સ ઓફિસની કમાણીના આંકડા ગરીબડા જ રહી ગયા હોત. અભિષેક આમ તો આખું વર્ષ બિઝી બિઝી રહે છે, પણ - એક રીતે કહી શકાય કે - આ તો પાઈની પેદાશ નહીં ને ઘડીની નવરાશ નહીં એવો ઘાટ છે. લાગે છે, અભિષેકના દુઃખના દહાડા કદાચ હવે પૂરા થશે. એની 'હાઉસફુલ 5' નજીકના ભવિષ્યમાં આવી રહી છે. 'હાઉસફુલ' સિરીઝનો ટ્રેક રેકોર્ડ સારો છે એટલે, સિનેમાદેવના આશીર્વાદ હશે તો, એની લેટેસ્ટ સિક્વલ બોક્સ ઓફિસ પર કદાચ ચાલી જશે. ખાટલે મોટી ખોડ એ છે કે ડિરેક્ટર તરુણ મનસુખાણીએ આ કોમેડી ફિલ્મમાં અડધું બોલિવુડ ઠાંસી દીધું છે. ફિલ્મમાં એટલા બધા હીરો અને હિરોઈનો છે કે ધારો કે ફિલ્મ સફળ થશે તો પણ અભિષેકને એનો જશ નહીં મળે. સેડ!
શ્રેયસ તલપડે: ઝુકેગા નહીં
છેલ્લા કેટલાક સમયથી શ્રેયસ તલપડેનું આગિકમ્ નહીં, પણ વાચિકમ્ ફેમસ થઈ ગયું છે. તમે જાણો જ છો કે 'પુષ્પા' સિરીઝના હિન્દી વર્ઝનમાં અલ્લુ અર્જુન માટે ડબિંગ શ્રેયસ તલપડે કરે છે. આ ફિલ્મો 'નોર્થ ઈન્ડિયા' માં જમાવટ કરે છે તેનું એક મોટું કારણ શ્રેયસનું અફલાતૂન ડબિંગ પણ છે. એમ તો કંગના રનૌતની ભારે અસરકારક એવી 'ઈમર્જન્સી' માં પણ શ્રેયસે યુવાન અટલ બિહારી બાજપેયીના રોલમાં સારો અભિનય કર્યો હતો. દુર્ભાગ્યે ફિલ્મ ફ્લોપ થઈ ગઈ એટલે ઓડિયન્સનું ધ્યાન તેના તરફ ખાસ ખેંચાયું નહીં. એનીવે, 'હાઉસફુલ 5' માં જે કલાકારોને જે કુંભમેળો એકઠો થયો છે એમાં શ્રેયસ તલપડે પણ છે. એના ભાગે એટલા ઓછા સીન અને ડાયલોગ્ઝ આવ્યા હશે કે પોતાના રોલ માટે ડબિંગ શ્રેયસને પોણી કલાક પણ નહીં થઈ હોય!
